Read La Bible en Sango courant – Mbeti ti Nzapa Matthieu 8 Bible Online

Matthieu 8 - La Bible en Sango courant – Mbeti ti Nzapa bible

Matthieu 8

¹So Jésus alondo na li ti hoto si lo yeke zu, gba ti azo amu peko ti lo.

²Mbeni zo ti buruma aga nduru na tere ti lo si akuku na gbe ti lo, atene: “*Kota Gbia, tongana mo ye, mo lingbi ti sara si tere ti mbi aga nzoni.”

³Jésus ayoro maboko ti lo, lo ndu koli ni si lo tene: “Mbi yeda! Ayeke nzoni tere ti mo aga nzoni!” Gi hio tongaso, buruma ti koli ni akai.

⁴Na pekoni, Jésus atene na lo: “Ma mbi nzoni! Mo tene tënë ni na zo oko pepe; me mo gue, mo fa tere ti mo na wayango-sandaga titene lo baa mo, mo mu *sandaga so Moïse amu ando yanga ti mungo ni so, tongaso si mo fa na le ti azo kue so, tere ti mo aga nzoni awe.”

⁵So Jésus ali na ya ti gbata ti Kapernaum, mbeni kapita ti aturugu ti Rome aga nduru na tere ti lo si adema tere ti lo,

⁶atene: “*Kota Gbia, zo ti kua ti mbi ayeke lango na gbogbo na da, tere ti lo aso mingi, lo lingbi ti londo na nduzu pepe.”

⁷Jésus atene na lo: “Fade mbi yeke gue ti kai kobela ti lo.”

⁸Me kapita ti aturugu ni akiri tënë, atene: “Kota Gbia, mbi kpa zo so mo lingbi ti li na ya ti da ti lo pepe. Mo tene gi mbeni tënë oko si fade kobela ti zo ti kua ti mbi akai!

⁹Mbi wani, mbi yeke na gbe ti ambeni makonzi so kamba ti ala ahon ti mbi; mbi yeke nga na aturugu na gbe ti mbi. Tongana mbi tene na mbeni oko, mbi tene: ‘Gue kâ!’, lo yeke gue. Tongana mbi tene na mbeni, mbi tene: ‘Ga na ndo so!’, lo yeke ga. Tongana mbi tene na zo ti kua ti mbi, mbi tene: ‘Sara ye so!’, lo yeke sara ni.”

¹⁰So Jésus ama tënë so, lo gonda lo mingi si lo tene na azo so amu peko ti lo, lo tene: “Mbi tene na ala taa-tënë: mbi de ti baa mara ti mabe tongaso na kodro ti Israel pepe.

¹¹Mbi tene na ala so fade azo mingi ayeke londo na mbage ti To, ambeni ayeke londo na mbage ti Do ti ga ti duti na ya ti matanga ti tengo kobe na *Kodro-gbia ti yayu, ala na Abraham, Isaac na Jacob.

¹²Me azo so a diko ando ala ndali ti Kodro-gbia ti yayu ni, fade a yeke bi ala na gigi na ya ti vukongo ndo; kâ, gi toto na tengo pembe.”

¹³Na pekoni, Jésus atene na kapita ti aturugu ni, atene: “Kiri na da ti mo! Fade ye ni ayeke si alingbi na mabe ti mo.” Gi na ndembe ni so, kobela ti zo ti kua ni akai.

¹⁴Jésus ague na da ti Pierre. Lo baa mama ti wali ti Pierre na kobela na ndö ti gbogbo: tere ti lo amu wâ mingi.

¹⁵Jésus andu maboko ti lo si tere ti lo ade; mama ni alondo si lo to nda ti sara na Jésus.

¹⁶So lâ akui awe, azo aga na gba ti azo so ayeke na asioni yingo na Jésus. Gi na lege ti tënë ti yanga ti lo, Jésus atumba asioni yingo ni si lo kai kobela na tere ti azo so kue tere ti ala aso.

¹⁷Lo sara tongaso titene tënë so wayanga-Nzapa Ésaïe atene ando, aga taa-tënë; lo tene: “Lo mu pasi ti e, lo hon na ni, lo yo akobela ti e na ndö ti lo.”

¹⁸So Jésus abaa gba ti azo na tere ti lo, lo mu yanga na adisiple ti lo titene lo na ala ague na mbage ti ngu.

¹⁹Mbeni wafango-ndia aga nduru na tere ti lo si atene na lo: “*Kota Gbia, fade mbi yeke mu peko ti mo na ndo so kue mo yeke gue daa.”

²⁰Jésus atene na lo: “Anyama ti gbungo kondo ayeke na du so ala yeke lango na ya ni, andeke ti nduzu ayeke na da ti lango ti ala; me *Molenge ti Zo ayeke na mbeni ndo ti ziango li ti lo daa pepe.”

²¹Mbeni oko ti adisiple atene na lo: “Kota Gbia, zia mbi gue, mbi lu kuâ ti babâ ti mbi si.”

²²Jésus akiri tënë na lo: “Mu peko ti mbi; zia akuâ alu akuâ ti ala.”

²³Jésus ako na ya ti ngo si adisiple ti lo amu peko ti lo.

²⁴Mo ye ti baa, mbeni kota pupu alondo si ayeke ya na le ti kota ngu. *Amapo ayeke tuku na ya ti ngo ni, me Jésus ayeke lango.

²⁵Adisiple ti lo ague na tere ti lo si ala zingo lo, atene: “*Kota Gbia, e yeke kui! Soo e na kuâ!”

²⁶Jésus atene na ala: “Ala azo ti kete mabe, mbeto agbu ala ngbanga ti nyen?” Na pekoni, lo londo, lo suku na pupu nga na amapo ni si ndo ade ngii.

²⁷Be ti azo ni kue ado si ala tene: “Zo so ayeke zo wa si pupu na amapo kue ayeke ma yanga ti lo so?”

²⁸So Jésus asi na mbage ti ngu ni, na sese ti azo ti Gadara, ambeni koli use alondo na popo ti adu ti kuâ, ala sigigi si aga atengbi na lo. Akoli so ayeke na asioni yingo na ya ti ala. Ala yeke asioni zo mingi, nilaa zo alingbi ti hon pepe na lege so ala yeke daa.

²⁹Ala dekongo, atene: “Mo, Molenge ti Nzapa! Ti mo na e nyen? Mo ga ti sara pasi na e kozoni si lango ni asi?”

³⁰Andaa na ndo ni so, gba ti anguru ayeke gi kobe ti ala ti tengo ni; anguru ni ayo kete na tere ti akoli ni so.

³¹Asioni yingo ni ahunda na Jésus, atene: “Tongana mo ye ti tumba e, mo tokua e na ya ti gba ti anguru so kâ so.”

³²Jésus atene na ala: “Ala gue!” Asioni yingo ni asigigi na ya ti akoli ni si ala gue, ali na ya ti anguru ni. Tongaso anguru ni kue alondo na loro na li ti hoto ni, ala ague, atuku na ya ti kota ngu ni si ala kue akui.

³³Awabatango-nguru ni akpe, ala gue na gbata ni si ala tene tënë ti ye so kue asi so. Ala tene nga tënë ti ye so asi na akoli use so ayeke na asioni yingo so.

³⁴Tongaso azo ti gbata ni kue ague ti tengbi na Jésus. So ala baa lo, ala voro lo ti londo na sese ti ala ti hon.