Read La Bible en Sango courant – Mbeti ti Nzapa Marc 15 Bible Online

Marc 15 - La Bible en Sango courant – Mbeti ti Nzapa bible

Marc 15

¹Gi na kota ndaperere, akota wayango-sandaga, *akangba, awafango-ndia na azo kue ti *Kota Bongbi ti Fango Ngbanga abongbi ti ma tere. Ala kanga Jésus, ague na lo si azia lo na maboko ti Pilate.

²Pilate ahunda lo, atene: “Mo yeke gbia ti azuife?” Jésus akiri tënë na lo, atene: “Ni laa mo tene so.”

³Akota wayango-sandaga ni abi tënë mingi na li ti Jésus.

⁴Tongaso Pilate akiri ahunda Jésus, atene: “Mo yeke kiri tënë oko pepe? Mo ma atënë so kue ala yeke bi na li ti mo so!”

⁵Me Jésus akiri tënë oko pepe; nilaa li ti Pilate kue akpe.

⁶Lakue na *matanga ti Pake, Pilate ayeke zi mbeni zo ti kanga oko, lo so be ti gba ti azo ni aye titene a zi lo.

⁷Andaa, mbeni koli so iri ti lo Barabas, lo na ambeni zo so asara wusuwusu na ya ti kodro ayeke na da ti kanga, ngbanga ti so ala fâ mbeni zo na ya ti wusuwusu ni.

⁸Gba ti azo ni ague na ndo ti Pilate si ala hunda na lo titene lo sara ye so lo yeke sara lakue na ala so.

⁹Pilate ahunda ala, atene: “Ala ye mbi zi na ala gbia ti azuife?”

¹⁰Biani, lo hinga lo tene, akota wayango-sandaga azia Jésus na maboko ti lo, ngbanga ti so kota be asara ala na tere ti lo.

¹¹Me akota wayango-sandaga apusu gba ti azo ni titene ala hunda na Pilate ti zi na ala Barabas.

¹²Pilate akiri ahunda azo ni, atene: “Lo so ala iri lo gbia ti azuife so, ala ye mbi sara nyen na lo?”

¹³Ala kiri adekongo, atene: “Fâ lo na ndö ti keke ti kroa!”

¹⁴Pilate ahunda ala, atene: “Sioni ti nyen laa lo sara?” Me ala kiri adekongo ngangu, atene: “Fâ lo na ndö ti keke ti kroa!”

¹⁵Pilate aye ti sara si be ti gba ti azo ni anzere; nilaa lo zi na ala Barabas. Na pekoni, lo mu yanga titene a pika Jésus na fimbo si lo zia lo na maboko ti ala titene a fâ lo na ndö ti keke ti kroa.

¹⁶Aturugu amu Jésus, ague na lo na yangbo ti govoronere si ala iri amba ti ala kue.

¹⁷Ala yu mbeni kota bengba bongo na lo; ala mu akamba ti ki aleke ni tongana kpoto ti gbia si ala zia na li ti lo.

¹⁸Na pekoni, ala to nda ti bara lo, atene: “E bara mo, gbia ti azuife!”

¹⁹Ala pika li ti lo na sosongo, ala tuku ngu ti yanga ti ala na tere ti lo si ala kuku akpo li ti ala na sese na gbe ti lo.

²⁰So ala zia lege ti hengo lo awe, ala zi bengba bongo ni na tere ti lo si ala yu na lo bongo ti lo wani. Na pekoni, ala sigigi na lo ti gue ti fâ lo na ndö ti keke ti kroa.

²¹Mbeni koli ti kodro ti Sirene so iri ti lo ayeke Simon, babâ ti Alexandre na Rufus, alondo na yaka si lo yeke hon na lege ni so. Aturugu agbu lo na ngangu titene lo yo keke ti kroa ti Jésus.

²²Ala gue na Jésus na ndo so iri ni Golgota; nda ti iri ni atene: “Ndo-ti-abio-ti-li”.

²³Ala ye ti mu na lo vin so ala tuku *mire daa, me Jésus ake ti nyon ni.

²⁴Na pekoni, ala kanga lo na ndö ti keke ti kroa, ala kangbi bongo ti lo na popo ti ala si ala bi *dee ti hinga zo so alingbi ti wara bongo ni.

²⁵Na ngbonga gumbaya ti ndaperere laa ala kanga lo na ndö ti keke ti kroa.

²⁶Na li ti keke ti kroa ni, ala su mbeni mbeti ti fa nda ti ngbanga so a fâ na li ti lo; mbeti ni atene: “Gbia ti azuife.”

²⁷Na tere ti Jésus, ala kanga asioni zo use na ndö ti akeke ti kroa, oko na mbage ti maboko ti lo ti koli, oko na mbage ti maboko ti lo ti wali. [

²⁸Tongaso si tënë ti Mbeti ti Nzapa aga taa-tënë: “A diko lo na popo ti azo ti sioni.”]

²⁹Azo so ayeke hon na lege ayeke yingi li ti ala si ala yeke zonga lo, atene: “He! Mo so mo ye lani ti kungbi kota da ti Nzapa ti kiri ti leke ni na ya ti lango ota so,

³⁰mo soo tere ti mo wani na kuâ ma! Londo na ndö ti keke ti kroa ni, mo zu na sese, e baa!”

³¹Akota wayango-sandaga nga na awafango-ndia ahe Jésus si ala tene na popo ti ala, atene: “Lo soo ambeni zo, me lo lingbi ti soo tere ti lo wani pepe!

³²Ayeke nzoni *Mesii ni, gbia ti Israel, alondo fadeso na ndö ti keke ti kroa ni azu na sese, e baa! Tongaso, fade e ma na be na lo.” Ala so a kanga ala na ndö ti akeke ti kroa na tere ti Jésus ayeke zonga nga lo.

³³Ti londo na bekombite ngbii asi na ngbonga ota, ndo avuko na ya ti kodro ni kue.

³⁴Na ngbonga ota ni, Jésus adekongo ngangu, atene: “Eloi, Eloi, lema sabaktani?” Ndani atene: “Nzapa ti mbi, Nzapa ti mbi, mo zia mbi ngbanga ti nyen?”

³⁵Ambeni zo so ayeke kâ ama dekongo ti lo ni si ala tene: “Ala ma, lo yeke iri Élie!”

³⁶Mbeni zo akpe, amu mbeni ndokoro ayoro na ya ti kpingo vin, lo kanga na li ti mbeni sosongo si lo yoro ni na Jésus titene lo nyon; lo tene: “Ala ku, e yeke baa wala Élie ayeke ga ti zi lo na ndö ti keke ti kroa ni!”

³⁷Me Jésus adekongo ngangu si lo kui.

³⁸Ya ti ridoo so a kanga na ya ti kota da ti Nzapa asuru use, alondo na nduzu ngbii asi na gbeni.

³⁹Kapita ti aturugu ti Rome so aluti na dawa ti Jésus abaa lege so Jésus akui na ni si lo tene: “Taa-tënë, koli so ayeke Molenge ti Nzapa!”

⁴⁰Ambeni wali nga ayeke daa, ala luti ti ala yongoro si ala yeke baa ye ni. Marie ti kodro ti Magdala ayeke na popo ti awali ni so, lo na Marie, mama ti Jacques Kete na ti Yozes, na Salome.

⁴¹Awali so amu lani peko ti Jésus si ala sara kua na lo na ndembe so lo yeke na Galile. Ambeni wali mingi ayeke nga kâ, ala so amu peko ti lo si aga na Jérusalem.

⁴²Na lango ni so, azo ayeke leke aye ndali ti lango ti matanga. Na lakui ni, titene ndade si *lango ti wungo tere asi,

⁴³Joseph, zo ti gbata ti Arimate asi; lo yeke mbeni kota zo ti kota ndo ti fango ngbanga. Lo nga lo yeke ku gango ti *Kodro-gbia ti Nzapa. Lo kanga be ti lo, lo gue, lo baa Pilate si lo hunda ti mu kuâ ti Jésus.

⁴⁴Li ti Pilate kue akpe so lo ma a tene, Jésus akui awe. Lo iri kapita ti aturugu si lo hunda lo, lo tene: “Jésus akui aninga?”

⁴⁵So lo ma tënë ti turugu ni awe, lo yeda na Joseph ti mu kuâ ni.

⁴⁶Joseph avo mbeni kota vuru bongo. Lo zi kuâ ti Jésus na ndö ti keke ti kroa, lo kanga ni na kota vuru bongo ni si lo gue, lo lu ni na ya ti du ti kuâ so a zi ni na ya ti têne. Na pekoni, lo mu mbeni kota têne si lo kanga na yanga ti du ti kuâ ni.

⁴⁷Marie ti kodro ti Magdala na Marie, mama ti Yozes ayeke baa ndo so ala yeke zia Jésus daa.