Read La Bible en Sango courant – Mbeti ti Nzapa Marc 9 Bible Online

Marc 9 - La Bible en Sango courant – Mbeti ti Nzapa bible

Marc 9

¹Jésus akiri atene na ala: “Mbi tene na ala taa-tënë: na popo ti azo so ge so, ambeni ayeke kui pepe, ngbii ala baa gango ti *Kodro-gbia ti Nzapa, na ngangu ti lo kue.”

²Lango omene na pekoni, Jésus amu Pierre, Jacques na Jean na tere ti lo, lo gue na ala na li ti mbeni kota hoto si ala duti kâ gi ala oko. Tere ti lo akiri aga nde na le ti ala:

³abongo ti lo ayeke za zango si avuru ahon ndoni. Mbeni zo ti ndö ti sese so alingbi ti sukula bongo avuru tongaso pepe.

⁴Ala baa Élie na Moïse so ayeke tene tënë na Jésus.

⁵Tongaso Pierre atene na Jésus: “Wafango-ye, ayeke nzoni e ngba na ndo so! E leke gbefa ota: oko ti mo, oko ti Moïse, oko ti Élie.”

⁶Biani, lo hinga tënë so lo ye ti tene pepe, ngbanga ti so mbeto agbu lo mingi, lo na tanga ti azo ni.

⁷Mbeni mbinda aga amu ndö ti ala kue. Na ya ti mbinda ni, mbeni go atene: “So ayeke Molenge ti mbi so mbi ye lo mingi. Ala ma yanga ti lo!”

⁸Mo ye ti baa, so adisiple agi ndo na tere ti ala kue, ala baa mbeni zo oko pepe, gi Jésus oko si angba na tere ti ala.

⁹So ala londo na ndö ti hoto ni si ala yeke zu, Jésus amu yanga na ala, atene: “Ala tene tënë ti ye so ala baa so na zo oko pepe, ngbii asi na ngoi so *Molenge ti Zo ayeke zingo ande na kuâ.”

¹⁰Ala yeda, me ala hunda tere ti ala, atene: “Tënë ti zingongo na kuâ ni atene nyen?”

¹¹Tongaso ala hunda Jésus, atene: “Ngbanga ti nyen si awafango-ndia ayeke tene lakue atene, alingbi Élie aga kozoni si so?”

¹²Lo kiri tënë na ala: “Taa-tënë, alingbi Élie aga kozoni ti leke ye kue na legeni. Me ngbanga ti nyen laa Mbeti ti Nzapa atene nga atene: ‘Fade Molenge ti Zo ayeke baa pasi si azo ayeke baa lo tongana senge zo so?’

¹³Mbi tene na ala: Élie aga ti lo awe si azo asara ye ti be ti ala na lo, tongana ti so Mbeti ti Nzapa atene tënë ni na ndö ti lo so.”

¹⁴So ala ga awara tanga ti adisiple, ala baa gba ti azo so ayeke na tere ti ala. Azo ni na awafango-ndia ayeke *bingbi tënë na adisiple ni.

¹⁵Gi so azo ni abaa Jésus, li ti ala akpe si ala mu loro ti ga ti bara lo.

¹⁶Jésus ahunda adisiple ti lo, atene: “Nyen laa ala na azo so ayeke bingbi tënë ndali ni so?”

¹⁷Mbeni koli so ayeke na popo ti gba ti azo ni atene na lo: “Wafango-ye, mbi ga na mo molenge ti mbi so lo yeke na mbeni sioni yingo so akanga yanga ti lo.

¹⁸Na ndo kue, tongana sioni yingo ni agbu lo, lo yeke kinda lo na sese, *furu ayeke sigigi na yanga ti lo, lo yeke te pembe ti lo ngangu si tere ti lo kue akpengba kpengbango. Mbi hunda na adisiple ti mo ti tumba sioni yingo so, me ala ha gbaa.”

¹⁹Jésus atene na ala: “Ala azo ti fadeso, ala so ayeke na mabe pepe so! Fade mbi yeke ngba ti duti na tere ti ala ngbii asi lawa? Fade mbi yeke ngba ti kanga be ti mbi na ala ngbii asi lawa? Ala ga na mbi molenge ni!”

²⁰Ala ga na molenge ni na lo. Gi so sioni yingo ni abaa Jésus, lo yingi molenge ni ngangu. Molenge ni ati, lo yeke rule tere ti lo na sese si furu ayeke sigigi na yanga ti lo.

²¹Jésus ahunda babâ ni, atene: “Ye ni ato nda ti sara lo lawa?” Babâ ni atene: “Na ndembe so lo de molenge.

²²Lakue yingo ni ayeke bi lo na le ti wâ wala na ya ti ngu titene lo kui. Me tongana mo lingbi ti sara mbeni ye ndali ti lo, baa mawa ti e, mu maboko na e!”

²³Jésus atene na lo: “Ngbanga ti nyen si mo tene: ‘Tongana mo lingbi ti sara?’ Zo so ama na be, lo lingbi ti sara ye kue!”

²⁴Gi hio tongaso, babâ ti molenge ni adekongo, atene: “Mbi ma na be! Me mu na mbi maboko, ngbanga ti so mabe atia mbi!”

²⁵Jésus abaa gba ti azo so ayeke kpe ti ga na tere ti ala; lo suku ngangu na sioni yingo so, lo tene: “Mo, yingo so mo yeke kanga yanga na mê ti zo: sigigi na ya ti molenge so! Kiri mo li na ya ti lo pepe!”

²⁶Yingo ni adekongo, ayingi molenge ni ngangu si asigigi. Molenge-koli ni aga tongana zo so akui awe. Azo so aduti na tere ni atene: “Lo kui awe.”

²⁷Me Jésus agbu maboko ti lo, amu lo na nduzu si lo luti.

²⁸So Jésus akiri na da si lo na adisiple ti lo ayeke gi ala oko, ala hunda lo, atene: “Ngbanga ti nyen si e tumba sioni yingo so gbaa?”

²⁹Jésus atene na ala: “Gi na lege ti sambela si zo alingbi ti tumba mara ti yingo so.”

³⁰Ala londo na ndo so si ala fâ na ya ti Galile ahon. Jésus aye titene azo ahinga ndo so lo yeke daa pepe,

³¹ngbanga ti so lo ngba ti fa ye na adisiple ti lo; lo tene na ala: “Fade a yeke zia *Molenge ti Zo na maboko ti azo titene ala fâ lo. Lango ota na pekoni, fade lo yeke zingo na kuâ.”

³²Me adisiple ni ahinga nda ti tënë so pepe si mbeto ti hunda lo na tënë asara ala.

³³Ala si na Kapernaum. So ala yeke na ya ti da, Jésus ahunda adisiple ti lo, atene: “Ala yeke *bingbi tënë fade na lege na ndö ti nyen?”

³⁴Me ala zi yanga pepe, ngbanga ti so kâ na lege, ala bingbi tënë na popo ti ala ti hinga zo wa laa ayeke kota zo ahon amba ti lo.

³⁵Tongaso Jésus aduti, lo iri adisiple ti lo baleoko na use si lo tene na ala: “Tongana mbeni zo aye ti duti zo ti li ni, ayeke nzoni lo duti zo ti ndani, lo duti nga zo ti kua ti atanga ni kue.”

³⁶Na pekoni, lo mu mbeni kete molenge si lo zia lo, lo luti na le ti ala; lo gbu lo na ya ti maboko ti lo si lo tene na ala:

³⁷“Zo so ayamba oko ti akete molenge so na iri ti mbi, andaa mbi laa lo yamba mbi. Zo so ayamba mbi, andaa mbi oko laa lo yamba mbi pepe, me lo so atokua mbi.”

³⁸Jean atene na Jésus: “Wafango-ye, e baa mbeni zo so ayeke tumba asioni yingo na iri ti mo si e ye ti kanga lege na lo, ngbanga ti so lo yeke zo ti e pepe.”

³⁹Me Jésus akiri tënë na lo: “Ala kanga lege na lo pepe. Biani, tongana mbeni zo asara mbeni ye ti kpene na iri ti mbi, kete na pekoni, lo lingbi ti tene sioni tënë ti mbi pepe.

⁴⁰Zo so ake tënë ti e pepe, ayeke zo ti e.

⁴¹Zo so ayeke mu na ala kopo ti ngu oko, ngbanga ti so ala yeke azo ti Christ, mbi tene na ala taa-tënë: fade lo yeke wara nzoni ye na peko ni.”

⁴²“Zo so asara si oko ti akete molenge so ama na be ati na ya ti siokpari, ayeke nzoni a kanga kota têne na go ti lo si a bi lo na ya ti kota ngu-ingo.

⁴³Tongana maboko ti mo laa ayeke handa mo titene mo ti na ya ti siokpari, ayeke nzoni mo fâ ni. Titene mo li na ndo so zo ayeke duti na fini daa na maboko oko, so laa ayeke nzoni ahon titene mo bata maboko ti mo use si mo gue na ni na ndo so wâ ayeke gbi daa si ayeke mingo oko pepe so. [

⁴⁴Kâ, ‘akete ngusu so ayeke te tere ti zo ayeke kui pepe si wâ ni nga ayeke mingo oko pepe.’]

⁴⁵Tongana gere ti mo laa ayeke handa mo titene mo ti na ya ti siokpari, ayeke nzoni mo fâ ni. Titene mo li na ndo so zo ayeke duti na fini daa na gere oko, so laa ayeke nzoni ahon titene mo bata gere ti mo use si a bi mo na ni na ndo so wâ ayeke gbi daa lakue. [

⁴⁶Kâ, ‘akete ngusu so ayeke te tere ti zo ayeke kui pepe si wâ ni nga ayeke mingo oko pepe.’]

⁴⁷Tongana le ti mo laa ayeke handa mo titene mo ti na ya ti siokpari, ayeke nzoni mo gboto ni. Titene mo li na ya ti *Kodro-gbia ti Nzapa na le oko, so laa ayeke nzoni ahon titene mo bata ale ti mo use si a bi mo na ni na ndo so wâ ayeke gbi daa lakue.

⁴⁸Kâ, ‘akete ngusu so ayeke te tere ti zo ayeke kui pepe si wâ ni nga ayeke mingo oko pepe.’

⁴⁹Fade wâ ayeke gbu zo oko oko kue tongana ti so ingo ayeke gbu kobe.

⁵⁰“Ingo ayeke nzoni ye; me tongana nzerengo ti ingo ni ahon awe, fade zo ayeke sara tongana nyen ti kiri na ni daa? Ayeke nzoni ala yeke na ingo na ya ti fini ti ala si ala duti na siriri na amba ti ala.”