Read La Bible en Sango courant – Mbeti ti Nzapa Luc 10 Bible Online

Luc 10 - La Bible en Sango courant – Mbeti ti Nzapa bible

Luc 10

¹Na pekoni, *Kota Gbia asoro ambeni disiple balembarambara na use; lo tokua ala use use titene ala hon kozoni na lo na ya ti agbata na akete kodro so kue lo ye ti gue daa.

²Lo tene na ala: “Kobe ti yaka ni ayeke mingi, me azo ti kua ni ayeke mingi pepe. Ayeke nzoni ala hunda na wa ti yaka ni ti tokua azo ti kua ti fâ ale ti kobe ti yaka ti lo.

³Ala gue! Mbi yeke tokua ala tongana amolenge ti taba na popo ti ambo ti ngonda.

⁴Ala mu bozo ti nginza, bozo ti lege na poro pepe; ala bara nga azo na lege pepe.

⁵Da so kue ala li na ya ni, ala tene kozoni na azo ni, atene: ‘Siriri aga na ya ti da so!’

⁶Tongana mbeni zo ti siriri ayeke na ya ni, fade siriri ti ala aduti na ndö ti lo; tongaso pepe, fade siriri ni akiri na ala.

⁷Ayeke nzoni ala duti na ya ti da ni, ala te kobe, ala nyon ye so fade azo ni ayeke mu na ala, ngbanga ti so zo ti kua alingbi na futa ti lo. Ala tambula na yanga ti da oko oko pepe.

⁸Gbata so kue ala yeke li na ya ni si azo ni ayamba ala, ayeke nzoni ala te kobe so azo ni ayeke mu na ala.

⁹Ala kai kobela ti azo ti gbata ni si ala tene na azo ni: ‘Kodro-gbia ti Nzapa aga nduru na ala awe!’

¹⁰Me gbata so kue ala yeke li na ya ni si azo ni ayamba ala pepe, ayeke nzoni ala sigigi ague na ndo so azo ti kodro ni ayeke bongbi daa si ala tene:

¹¹‘Ataa sese ti gbata ti ala so ayeke na gere ti e, e yeke zi ni kue ti kiri na ni na ala; me ayeke nzoni ala hinga atene, kodro-gbia ti Nzapa aga nduru awe!’

¹²Mbi tene na ala: na lango ti fango ngbanga, fade ngbanga so a yeke fâ na ndö ti gbata ni ayeke duti ngangu ahon ti Sodome.”

¹³“Mawa na mo, gbata ti Korazen! Mawa na mo, gbata ti Betsaida! Tongana aye ti kpene so asi na ndo ti ala so asi ando na sese ti Tir na ti Sidon, ka azo ni ayu bongo ti mua, ala duti na ya ti mburu ti wâ aninga awe ti fa atene, ala zia ngbene lege ti sarango ye ti ala awe!

¹⁴Ndani laa, na lango ti fango ngbanga, fade a yeke fâ ngbanga ngangu na li ti ala ahon ti Tir na ti Sidon.

¹⁵Ti mo, gbata ti Kapernaum, mo baa ti mo, mo tene, fade mo yeke gue ngbii ti kpo le ti nduzu? Fade mo yeke kiri ngbii ti si na ndo ti akuâ!”

¹⁶Jésus akiri atene na adisiple ti lo: “Zo so ama tënë ti ala, andaa lo ma tënë ti mbi; zo so ake ala, andaa lo ke mbi; zo so ake mbi, andaa lo ke lo so atokua mbi.”

¹⁷Adisiple balembarambara na use akiri na ngia na be ti ala si ala tene na lo: “*Kota Gbia, ataa asioni yingo ama yanga ti e tongana e mu yanga na ala na iri ti mo.”

¹⁸Jésus atene na ala: “Mbi baa Satan alondo na yayu ati tongana wâ ti bekpa.

¹⁹Ala ma! Mbi mu na ala ngangu ti do angbo na akparakongo na gere ti ala; mbi mu nga na ala ngangu ti hon ndö ti wato. Mbeni ye ti sarango sioni na ala ayeke daa pepe.

²⁰Ayeke nzoni tere ti ala anzere ndali ti so asioni yingo ama yanga ti ala pepe; me tere ti ala anzere, ngbanga ti so a su iri ti ala awe na ya ti mbeti na yayu.”

²¹Gi na ndembe ni so, be ti Jésus asi na ngia ti Yingo-Vuru si lo tene: “Mbi gonda mo Babâ, mo so mo yeke *Kota Gbia ti yayu na ti sese, ndali ti so mo honde aye so na azo ti ndara nga na azo ti hingango ye si mo sigigi na nda ni na akete molenge. Biani Babâ, ye ni ayeke tongaso, ngbanga ti so mo yeda.

²²“Babâ ti mbi azia ye kue na maboko ti mbi. Zo oko ahinga Molenge ni pepe, gi Babâ oko; zo oko ahinga Babâ ni pepe, gi Molenge ni oko nga na azo so Molenge ni aye ti fa Babâ ni na ala titene ala hinga lo.”

²³Na pekoni, Jésus abaa ndo na mbage ti adisiple ti lo si lo tene tënë gi na ala, lo tene: “Ti ala nzoni, ala so ayeke baa ye so ala yeke baa ni so!

²⁴Biani, mbi tene na ala: awayanga-Nzapa mingi na agbia mingi aye ando ti baa ye so ala, azo ti mbi, ayeke baa ni laso so, me ala baa ni pepe; ala ye ando ti ma tënë so ala yeke ma ni laso so, me ala ma ni pepe!”

²⁵Mbeni wafango-ndia aye ti sara si Jésus ati na ya ti gbanda ti lo si lo hunda lo: “Wafango-ye, nyen laa mbi lingbi ti sara ti wara fini so angba lakue lakue?”

²⁶Jésus atene na lo: “Tënë ti nyen laa a su na ya ti mbeti ti *Ndia? Ti mo, nda ti tënë so mo diko so atene nyen?”

²⁷Zo ni akiri tënë na lo: “Alingbi mo ye *Kota Gbia Nzapa ti mo na be ti mo kue, na yingo ti mo kue, na ngangu ti mo kue, na tënë ti be ti mo kue. Mo ye nga mba ti mo zo tongana ti so mo ye tere ti mo wani.”

²⁸Jésus atene na lo: “Mo kiri tënë na legeni. Sara ye ni tongaso si fade mo ngba na fini.”

²⁹Me wafango-ndia ni aye ti zi kamene na le ti lo si lo tene na Jésus: “Ka mba ti mbi ni ayeke zo wa?”

³⁰Jésus amu tënë si atene: “Mbeni lâ, mbeni koli alondo na Jérusalem si lo yeke zu ti gue na Jéricho. Lo ti na maboko ti *azaragina so anzi aye ti lo kue, ala pika lo nduru na kuâ si ala do lo azia lo, ala hon.

³¹Mbeni wayango-sandaga aga ahon na lege ni so, lo baa koli so si lo ngoro na mbage, lo hon ti lo.

³²Mbeni zo ti mara ti Lévi nga aga, abaa lo, lo ngoro si lo hon ti lo.

³³Me mbeni zo ti Samarii so ayeke gue na mbeni kodro yongoro asi na tere ti koli so. Lo baa koli ni si mawa ti lo agbu be ti lo.

³⁴Lo ga nduru na tere ti lo, lo tuku mafuta na vin na le ti aka ni si lo kanga ni. Lo mu lo, lo zia lo na ndö ti lele ti lo wani, lo gue na lo na ya ti mbeni da so azo ayeke futa ti lango daa si lo bata lo nzoni.

³⁵Na ndade ni, na hongo ti lo, lo sigigi na ale ti nginza use, lo mu na wa ti da ni si lo tene na lo: ‘Bata lo nzoni. Tongana mo zia mbeni nginza ti mo na ndö ti so ti vo na ye na lo, na kiringo ti mbi, fade mbi yeke kiri ni na mo.’ ”

³⁶Jésus ahunda lo, atene: “Na popo ti azo ota so, na le ti mo, lo so wa laa ayeke mba ti koli so ati na maboko ti asioni zo so?”

³⁷Wafango-ndia ni atene: “Zo so asara nzoni be na lo so.” Jésus atene na lo: “Gue, mo nga, mo sara gi tongaso!”

³⁸So Jésus na adisiple ti lo ayeke hon na lege, ala li na ya ti mbeni kete kodro si mbeni wali so iri ti lo Marthe ayamba lo na ya ti da ti lo.

³⁹Lo yeke na mbeni ita ti lo ti wali so iri ti lo Marie. Marie aduti na sese na tere ti gere ti *Kota Gbia si lo yeke ma tënë so lo yeke tene.

⁴⁰Ti Marthe, tënë ti kua ti ya ti da agbu be ti lo mingi si akua ni ahon ndö ti lo. Lo ga si lo tene: “Kota Gbia, so ita ti mbi azia gi mbi oko na tere ti kua ni, so ayeke senge na le ti mo? Mo tene na lo ti ga ti mu na mbi maboko maa!”

⁴¹Me Kota Gbia akiri tënë na lo: “Marthe, Marthe, mo yeke gi be ti mo si mo yeke do tere ti mo ndali ti aye mingi.

⁴²Taa nzoni ye ayeke gi oko. Marie laa asoro ti lo taa nzoni ye ni: fade mbeni zo ti zi ni na maboko ti lo ayeke daa pepe.”