Read La Bible en Sango courant – Mbeti ti Nzapa Luc 15 Bible Online

Luc 15 - La Bible en Sango courant – Mbeti ti Nzapa bible

Luc 15

¹Azo ti rongo nginza ti lapo na azo ti siokpari aga nduru na tere ti Jésus ti ma lo.

²*Afarizien na awafango-ndia ayeke kasa lo, atene: “Koli so ayeke yamba azo ti siokpari si lo na ala ayeke te kobe!”

³Jésus atene na ala toli so, lo tene:

⁴“Na popo ti ala, tongana mbeni zo ayeke na ataba ngbangbo oko si mbeni oko agirisa, lo yeke zia atanga ni balegumbaya na gumbaya na benyama ti gue ti gi lo so agirisa so, ngbii lo wara lo si pepe?

⁵Tongana lo wara lo awe, ngia asi be ti lo, lo yo lo na ndö ti go ti lo

⁶si lo kiri na kodro. Na pekoni, lo iri azo so lo na ala aye tere nga na azo ti tere ti da ti lo, lo tene: ‘Ala ga, e sara ngia, ngbanga ti so taba ti mbi so agirisa so, mbi wara lo awe!’

⁷Mbi tene na ala: ngia ayeke tongaso na yayu ndali ti zo ti siokpari oko so azia ngbene lege ti sarango ye ti lo; ngia so ahon ngia ndali ti azo ti mbirimbiri balegumbaya na gumbaya so nzara ti zia ngbene lege ti sarango ye ti ala ayeke sara ala pepe.”

⁸“Tongana mbeni wali ayeke na ale ti nginza baleoko si mbeni oko agirisa, lo yeke zia wâ na ya ti lamba, lo balee ya ti da ti gi ni ngbii lo wara ni si pepe?

⁹Tongana lo wara ni awe, lo iri awali so lo na ala aye tere nga na awali ti tere ti da ti lo si lo tene na ala, lo tene: ‘Ala ga, e sara ngia, ngbanga ti so le ti nginza ti mbi so agirisa so, mbi wara ni awe.’

¹⁰Ndani laa mbi tene na ala: ngia ayeke na popo ti *a-ange ti Nzapa, ndali ti zo ti siokpari oko so azia ngbene lege ti sarango ye ti lo.”

¹¹Jésus akiri atene: “Mbeni koli ayeke na amolenge ti lo ti koli use.

¹²Ngambe ni atene na babâ ti lo: ‘Babâ, mu na mbi fadeso aye so ayeke ga ande ti mbi.’ Tongaso babâ ni akangbi ya ti aye ti lo na ala use kue.

¹³Lango kete na pekoni, ngambe ni aka aye ti lo kue si lo mu lege, lo gue na mbeni kodro yongoro. Kâ, lo buba aye ti lo kue na sarango aye ti kirikiri.

¹⁴So lo buba nginza ti lo ni kue awe, kota nzara ati na ya ti kodro ni si ye oko angba na lo pepe.

¹⁵Lo gue ti sara kua na gbe ti mbeni zo ti kodro ni si zo ni atokua lo ti bata anguru na yaka ti lo.

¹⁶Lo yeke fade na nzara ti te akobe so anguru ni ayeke te titene ya ti lo asi, me zo ti mungo ni na lo ayeke daa pepe.

¹⁷Tongaso lo to nda ti gbu li ti lo si lo tene na be ti lo, lo tene: ‘Kobe ti tengo ni asi singo na azo ti kua ti babâ ti mbi si mbi yeke kui nzara ge so!

¹⁸Fade mbi yeke londo ti kiri na babâ ti mbi si mbi tene na lo: Babâ, mbi sara siokpari so ake Nzapa si ake nga mo.

¹⁹Mbi lingbi titene mo kiri mo iri mbi molenge ti mo pepe; mu mbi tongana mbeni zo ti kua ti mo.’

²⁰Lo mu lege ti kiri na ndo ti babâ ti lo. “So lo de yongoro na lege, babâ ti lo abaa lo, mawa agbu be ti lo, lo kpe, lo gbu lo na kate ti lo si lo su ngbangba ti lo.

²¹Molenge ni atene na lo: ‘Babâ, mbi sara siokpari so ake Nzapa si ake nga mo; mbi lingbi titene mo kiri mo iri mbi molenge ti mo pepe.’

²²Me babâ ni atene na azo ti kua ti lo: ‘Ala mu bongo so ayeke pendere ahon atanga ni kue aga na ni hio, ayu na lo, ala yoro bage na maboko ti lo, ala yu na lo poro.

²³Ala mu bagara ti mafuta afâ lo, e te, e sara matanga,

²⁴ngbanga ti so molenge ti mbi so ala baa lo so, lo kui si lo zingo na kuâ; lo girisa si mbi wara lo.’ Ala to nda ti sarango matanga ni.

²⁵“Andaa kozo molenge ni ayeke ti lo na yaka. Na kiringo ti lo, so lo si nduru na tere ti da, lo ma mozoko na dodo.

²⁶Lo iri mbeni zo ti kua si lo hunda lo na nda ti ye so asi.

²⁷Zo ti kua ni atene na lo: ‘Ita ti mo laa akiri si babâ ti mo afâ bagara ti mafuta ndali ti lo, ngbanga ti so lo wara lo na nzoni tere.’

²⁸Tongaso ngonzo agbu kozo molenge ni si lo ke ti li na da. Babâ ti lo asigigi, avoro lo titene lo li.

²⁹Me lo tene na Babâ ti lo: ‘Baa, mbi sara kua na mo ngu mingi; laoko mbi ke yanga ti mo pepe. Me laoko mo mu na mbi mbeni molenge ti ngasa pepe titene mbi fâ ti sara na matanga na amba ti mbi so mbi na ala e ye tere.

³⁰Me molenge ti mo so kâ abuba aye ti mo kue na awali-ndumba! Fadeso lo ga si mo fâ bagara ti mafuta ndali ti lo!’

³¹Tongaso babâ ni atene na lo: ‘Molenge ti mbi, mo yeke lakue na tere ti mbi; aye ti mbi kue ayeke ti mo.

³²Me ayeke fade nzoni titene e sara matanga, e sara ngia, ngbanga ti so ita ti mo so akui awe si lo kiri na fini; lo girisa si e kiri e wara lo.’ ”