Read La Bible en Sango courant – Mbeti ti Nzapa Luc 17 Bible Online

Luc 17 - La Bible en Sango courant – Mbeti ti Nzapa bible

Luc 17

¹Jésus atene na adisiple ti lo: “Aye so ayeke gboto azo ti sara siokpari ayeke duti daa lakue. Me mawa na zo so ahanda amba ti lo ti sara siokpari ni!

²Tongana a kanga fade kota têne na go ti lo, a bi lo na ya ti kota ngu-ingo, ka ayeke nzoni ahon titene lo sara si mbeni oko ti akete molenge so ati na ya ti siokpari.

³Ala sara hange! “Tongana ita ti mo asara sioni na mo, ayeke nzoni mo fa sioni ti lo na lo. Tongana lo zia lege ti sarango sioni ni, mo zi tënë ni na li ti lo.

⁴Tongana lo sara sioni na mo lege mbarambara na ya ti lango oko si lege mbarambara nga lo kiri na mbage ti mo, lo tene: ‘Mbi ye ti zia lege ti sioni so mbi sara’, ayeke nzoni mo zi tënë ni na li ti lo.”

⁵*Awatokua atene na *Kota Gbia: “Sara si mabe ti e akono.”

⁶Kota Gbia atene na ala: “Tongana konongo ti mabe ti ala alingbi na konongo ti le ti keke ti mutarde, fade ala lingbi ti tene na keke ti sikomor so, atene: ‘Gboto tere ti mo na agunda ti mo kue, mo gue, mo lu tere ti mo na ya ti kota ngu-ingo’, fade keke ni ayeke ma yanga ti ala.”

⁷“E mu mbeni tapande: mbeni zo ayeke na mbeni zo ti kua so ayeke fâ yaka ti lo wala ayeke bata anyama ti lo. Tongana zo ti kua ni alondo na yaka, lo ga, makonzi wa laa alingbi ti tene ande na lo, atene: ‘Ga hio, mo duti, mo te kobe’?

⁸Lo lingbi ti tene na lo tongaso pepe. Me fade lo yeke tene na lo: ‘To na mbi kobe ti mbi ti lakui; mo yu mbeni bongo nde, mo mu na mbi kobe ti te na ye ti nyongo ni. Na pekoni, fade mo yeke te ti mo kobe ni si mo nyon ti mo ye ni.’

⁹So zo ti kua ni asara ye so kue makonzi ti lo amu yanga daa na lo awe, fade makonzi ti lo ni ayeke gonda lo? Oko pepe!

¹⁰Ala nga, tongana ala sara ye so kue a mu yanga daa na ala awe, ayeke nzoni ala tene: ‘E yeke gi asenge senge zo ti kua; e sara gi ye so e lingbi fade ti sarango ni.’ ”

¹¹So Jésus amu lege si lo yeke gue na Jérusalem, lo hon na ya ti sese ti Samarii na ti Galile.

¹²Na ndembe so lo yeke li na ya ti mbeni kete kodro, azo ti buruma baleoko aga ti tengbi na lo. Ala luti yongoro

¹³si ala dekongo, atene: “Jésus, kota zo, baa mawa ti e!”

¹⁴So lo baa ala, lo tene na ala: “Ala gue, afa tere ti ala na awayango-sandaga.” Na lege ti guengo ni, tere ti ala aga *nzoni.

¹⁵Mbeni oko na popo ti ala, so lo baa tere ti lo aga nzoni awe, lo kiri lo ga, lo yeke gonda Nzapa na kota go.

¹⁶Lo ti, lo kpo li ti lo na sese na gere ti Jésus si lo yeke mu singila na Jésus. Andaa lo yeke mbeni zo ti Samarii.

¹⁷Jésus ahunda ndo, atene: “Ala baleoko kue laa tere ti ala aga *nzoni so pepe? Atanga ni gumbaya ayeke na ndo wa?

¹⁸Mbeni zo na popo ti ala ti kiri ti gonda Nzapa ayeke daa pepe? Gi wande oko so?”

¹⁹Na pekoni, Jésus atene na lo: “Londo, mo gue, mabe ti mo asoo mo awe.”

²⁰*Afarizien ahunda Jésus, atene: “Kodro-gbia ti Nzapa ayeke ga lawa?” Lo kiri tënë na ala, lo tene: “Gango ti Kodro-gbia ti Nzapa ayeke ye so zo ayeke baa ni na le pepe.

²¹Fade azo ayeke tene pepe: ‘Ni laa ge!’ wala ‘Ni laa kâ!’ Biani, Kodro-gbia ti Nzapa ayeke na popo ti ala awe.”

²²Na pekoni, Jésus atene na adisiple: “Ambeni lango ayeke ga so fade ala yeke sara nzara ti bango *Molenge ti Zo gi ti lango oko, me ala yeke baa lo pepe.

²³Fade azo ayeke tene na ala: ‘Lo yeke kâ!’ wala ‘Lo yeke ge!’ Ala gue pepe, ala kpe ague kâ pepe!

²⁴Tongana ti so zango ti bekpa alondo na mbeni mbage ti nduzu aza ngbii ague, asi na mbeni mbage ni, fade lango ti kiringo ti Molenge ti Zo ayeke duti tongaso.

²⁵Me kozoni, alingbi lo baa pasi mingi si azo ti fadeso ake lo.

²⁶Ye so ayeke si ande na lango ti gango ti Molenge ti Zo ayeke duti tongana ye so asi ando na ngoi ti Noe.

²⁷Ando azo ayeke te, ayeke nyon, akoli na awali ayeke mu tere, ngbii asi na lango so Noe ali na ya ti kota mangboko: kota ngu apika, asuku amu ndo kue si afâ ala kue.

²⁸Ye ni ayeke duti ande nga tongana ti so asi na ngoi ti Lot: ando azo ayeke te, ayeke nyon, ala yeke vo ye, ala yeke ka ye, ala yeke sara ada si ala yeke lu akobe.

²⁹Me na lango so Lot asigigi na Sodome, Nzapa atokua wâ na *sufre na ndö ti ala tongana ngu so ayeke pika si afâ ala kue.

³⁰Fade ye ni ayeke duti nga tongaso na lango so Molenge ti Zo ayeke si na le ti azo.

³¹“Na lango ni so, zo so ayeke duti ande na li ti da si aye ti lo ayeke na ya ti da ni, fade lo yeke zu ti gue ti mu ni pepe. Zo so ayeke duti ande na yaka, fade lo yeke kiri na kodro pepe.

³²Ala dabe ti ala na wali ti Lot!

³³Zo so agi lege ti bata fini ti lo, fade lo yeke girisa ni; me zo so agirisa fini ti lo, fade lo yeke bata ni.

³⁴Mbi tene na ala: na bi ni so, azo use so ayeke lango na ndö ti gbogbo oko, fade a yeke mu oko si a zia oko.

³⁵Awali use so ayeke nika ye, fade a yeke mu oko si a zia oko. [

³⁶Akoli use so ayeke na yaka, fade a yeke mu oko si a zia oko.”]

³⁷Adisiple ti Jésus ahunda lo, atene: “*Kota Gbia, aye ni so ayeke si ande na ndo wa?” Lo tene na ala: “Ndo so akuâ ayeke daa, ndo so laa *angoalo ayeke bongbi tere ti ala daa.”