Read La Bible en Sango courant – Mbeti ti Nzapa Luc 19 Bible Online

Luc 19 - La Bible en Sango courant – Mbeti ti Nzapa bible

Luc 19

¹So Jésus ali na ya ti gbata ti Jéricho awe, lo yeke fâ ya ti gbata ni ti hon.

²Mbeni koli ayeke kâ so iri ti lo Zachée; lo yeke makonzi ti azo ti rongo nginza ti lapo, lo yeke nga zo ti mosoro.

³Lo yeke gi lege ti baa Jésus ti hinga lo, me lo lingbi ti baa Jésus pepe, ngbanga ti so azo ayeke gbani si lo yeke ti lo nduru zo.

⁴Tongaso lo kpe, lo hon na li ni, lo ko na ya ti keke ti sikomor titene lo baa Jésus na hongo ti lo na lege ni so.

⁵So Jésus asi na ndo ni so, lo yo le ti lo na nduzu si lo tene na Zachée: “Zachée, zu na sese hio! Alingbi mbi lango na da ti mo laso!”

⁶Zachée azu na sese hio si lo yamba Jésus na ngia na be ti lo.

⁷So azo abaa tongaso, ala kue akasa Jésus, atene: “Lo gue, lo lango na ndo ti zo ti siokpari!”

⁸Me Zachée aluti na le ti *Kota Gbia si lo tene: “Kota Gbia, baa, mbi yeke mu ndambo ti aye ti mbi kue na azo ti mawa. Tongana mbi nzi nginza ti zo na mayere, fade mbi yeke kiri ni na lo lege osio!”

⁹Jésus atene na lo: “Laso, Nzapa asoo azo ti da so awe, ngbanga ti so Zachée nga ayeke *hale ti Abraham.

¹⁰Biani, *Molenge ti Zo aga ti gi na ti soo azo so agirisa awe.”

¹¹Jésus akiri atene mbeni toli na azo so ayeke ma tënë ti lo so. Lo tene ni, ngbanga ti so lo ga nduru na Jérusalem. Andaa azo ni abaa ti ala atene, Kodro-gbia ti Nzapa ayeke si fafadeso.

¹²Lo tene: “Mbeni zo so asewa ti lo ayeke akota zo ague na mbeni kodro yongoro titene a mu lo ti ga gbia ti kodro ti lo wani si na pekoni, fade lo yeke kiri.

¹³Kozoni si lo hon, lo iri azo ti kua ti lo baleoko. Lo mu ale ti nginza baleoko so a sara na lôro si lo kangbi ni na ala; lo tene na ala: ‘Ala mu nginza so ade na buze ngbii asi na ngoi so mbi yeke kiri.’

¹⁴Me amba ti lo azo ti kodro ni aye tënë ti lo pepe. Nilaa ala tokua ambeni zo na peko ti lo titene ala gue, atene: ‘E ye si koli so ale-gbia na ndö ti e pepe.’

¹⁵So lo ga gbia awe, lo kiri na kodro ti lo. Lo iri azo ti kua ti lo so lo mu nginza ti lo na ala so titene ala fa peko ti ye so ala sara na nginza ni.

¹⁶Kozo zo ni aga si atene: ‘Kota Gbia, le ti nginza so lani mo mu na mbi so, mbi wara ambeni baleoko na ndö ni.’

¹⁷Gbia ni atene na lo: ‘So nzoni! Mo yeke nzoni zo ti kua! Kete ye so a mu na mo, mo sara kua na ni na legeni. Tongaso, mbi mu mo titene mo sara komandema na ndö ti agbata baleoko.’

¹⁸Use zo ni aga si atene: ‘Kota Gbia, le ti nginza so lani mo mu na mbi so, mbi wara ambeni oku na ndö ni.’

¹⁹Gbia ni atene na lo: ‘Mo nga, ayeke nzoni mo sara komandema na ndö ti agbata oku.’

²⁰Mbeni aga atene ti lo, atene: ‘Kota Gbia, baa, le ti nginza ti mo laa; mbi mu ni, mbi kanga na ya ti bongo si mbi bata ni.

²¹Mbi sara mbeto ti mo, ngbanga ti so mo yeke koli so mo so mingi: mo yeke mu ye na ndo so mo bata ye daa pepe si mo yeke ko le ti kobe na ndo so mo lu ye daa pepe.’

²²Gbia ni atene na lo: ‘Mo, sioni zo ti kua! Mbi yeke luti gi na ndö ti atënë ti yanga ti mo wani ti fâ ngbanga na li ti mo. Mo hinga kue: mbi yeke koli so mbi so mingi, mbi yeke mu ye na ndo so mbi bata ye daa pepe si mbi yeke ko le ti kobe na ndo so mbi lu ye daa pepe.

²³Ngbanga ti nyen si mo zia nginza ti mbi na ndo-kua ti batango nginza pepe? Tongana mo zia ni fade kâ, ka nginza ni adu mbeni na ndö ni si na kiringo ti mbi, mbi yeke mu ni kue.’

²⁴Na pekoni, lo tene na azo so ayeke na tere ti lo, lo tene: ‘Ala zi le ti nginza ni na maboko ti lo, ala mu na lo so ayeke na ni baleoko so.’

²⁵Azo ni atene na lo: ‘Kota Gbia, lo yeke na ambeni baleoko awe!’

²⁶Gbia ni akiri tënë, atene: ‘Mbi tene na ala: zo so kue ayeke na ye, fade a kiri amu mbeni na ndö ni na lo; me zo so ayeke na ye pepe, ataa kete ye so lo yeke na ni, fade a yeke zi na maboko ti lo.

²⁷Âdu ti awato ti mbi so aye titene mbi le-gbia na ndö ti ala pepe so, ala mu ala, aga na ala na ndo so si ala fâ go ti ala na le ti mbi.’ ”

²⁸So Jésus atene tënë so awe, lo hon na li ni ti gue na Jérusalem.

²⁹So lo ga nduru na Betfaze na Betanii, na tere ti hoto ti a-olive, lo iri adisiple use si lo tene na ala:

³⁰“Ala gue na kete kodro so ayeke na dawa ti ala so. Na lingo ti ala na ya ti kodro ni, fade ala yeke wara mbeni molenge ti lele so a kanga lo na tere ti mbeni ye, mbeni zo ade ti duti na ndö ti lo pepe. Ala zi lo, aga na lo.

³¹Tongana mbeni zo ahunda ala, atene: ‘Ala yeke zi lele so ngbanga ti nyen?’, ala tene na lo: ‘*Kota Gbia aye lele ni.’ ”

³²Azo so Jésus atokua ala so ague, awara ye ni tongana ti so lo tene tënë ni na ala.

³³So ala yeke zi molenge ti lele ni, awa ti lo ahunda ala, atene: “Ala yeke zi lo ngbanga ti nyen?”

³⁴Ala kiri tënë: “Kota Gbia aye lele ni.”

³⁵Na pekoni, ala mu lo, ague na lo na Jésus. Ala bi abongo ti ala na ndö ti lo si ala sara titene Jésus ako na ndö ti lo.

³⁶Na hongo ti Jésus, azo ayeke gbara abongo ti ala na ndö ti lege.

³⁷So ala ga nduru na Jérusalem, na lege so alondo na ndö ti hoto ti a-olive ni ti zu, adisiple gbani gbani ayeke dekongo ti sepela Nzapa na ngia na be ti ala, ndali ti aye ti kpene so ala baa ni so.

³⁸Ala tene: “Ayeke nzoni Nzapa asara tufa na ndö ti gbia so aga na iri ti Kota Gbia! Siriri aduti na yayu kâ si a gonda Nzapa so ayeke na yayu kâ na ndö ti aye kue!”

³⁹Ambeni *farizien so ayeke na popo ti gba ti azo ni atene na Jésus, atene: “Wafango-ye, suku na adisiple ti mo titene ala kai!”

⁴⁰Lo kiri tënë na ala, lo tene: “Mbi tene na ala: tongana ala kai, fade atêne ayeke dekongo!”

⁴¹Jésus asi nduru na Jérusalem, lo baa gbata ni si lo toto ndali ni.

⁴²Lo tene: “Âa! Tongana mo nga, mo hinga fade ye so alingbi ti mu na mo siriri! Me mawa ni ayeke so ye ni angba na hondengo ni si le ti mo abaa ni pepe!

⁴³Biani, ambeni lango ayeke ga so awato ti mo ayeke bongbi sese aga koto, angoro mo kue. Ala yeke ngoro mo si ala yeke pete mo mbage na mbage kue.

⁴⁴Awato ti mo ni ayeke nika mo na azo ti mo kue; mbeni têne oko ayeke ngba na ndö ti mba ti lo pepe, ngbanga ti so lango so Nzapa aga ti baa mo asi awe, me mo hinga ni pepe!”

⁴⁵Na pekoni, Jésus ali na ya ti kota da ti Nzapa si lo to nda ti tumba azo so ayeke ka ye na ya ni.

⁴⁶Lo tene na ala: “A su na ya ti Mbeti ti Nzapa, atene: ‘Da ti mbi ayeke duti ande da ti sambelango Nzapa.’ Me ti ala, ala sara si da ni aga tongana du so azo ti nzi ayeke honde tere ti ala daa!”

⁴⁷Lakue Jésus ayeke fa ye na ya ti da ti Nzapa. Akota wayango-sandaga, awafango-ndia na akota zo ti kodro ni kue ayeke gi lege ti fâ lo.

⁴⁸Me ala hinga ye so ala lingbi ti sara pepe, ngbanga ti so azo kue azia mê ti ala kue ti ma atënë so ayeke sigigi na yanga ti lo.