Read La Bible en Sango courant – Mbeti ti Nzapa Luc 20 Bible Online

Luc 20 - La Bible en Sango courant – Mbeti ti Nzapa bible

Luc 20

¹Mbeni lâ, Jésus ayeke fa ye na azo na ya ti kota da ti Nzapa; lo yeke fa nga Nzoni Tënë na ala. Akota wayango-sandaga, awafango-ndia na *akangba aga.

²Ala hunda lo, atene: “Tene na e, na iri ti zo wa laa mo yeke sara aye so? Zo wa laa amu lege na mo ti sara ni, zo wa?”

³Lo kiri tënë na ala, lo tene: “Mbi nga, mbi yeke hunda ala na mbeni tënë:

⁴Zo wa laa atokua Jean ti batize azo? Nzapa wala azo?”

⁵Azo ni agbu li ti ala si ala tene na popo ti ala: “Tongana e tene: ‘Nzapa laa atokua Jean’, fade lo hunda e, lo tene: ‘Ngbanga ti nyen si ala yeda na tënë ti lo pepe?’

⁶Tongana e tene: ‘Azo laa atokua lo’, fade azo ni kue ayeke bo e na têne, ngbanga ti so ala hinga biani atene, Jean ayeke wayanga-Nzapa.”

⁷Tongaso ala tene na Jésus: “E hinga zo so atokua lo pepe.”

⁸Jésus atene na ala: “Zo so amu lege na mbi ti sara aye so, mbi nga, mbi yeke di iri ti lo na ala pepe.”

⁹Na pekoni, Jésus atene toli so na azo ni, lo tene: “Mbeni zo afâ yaka ti *vinye; lo zia yaka ni na maboko ti azo ti fango yaka ti vinye si lo gue na mbeni kodro ti ninga kâ mingi.

¹⁰So ngoi ti kongo ale ti vinye ni alingbi awe, lo tokua mbeni zo ti kua oko na azo ti fango yaka ni titene ala mu ti lo ale ti vinye ni aga na ni. Me azo ti fango yaka ni apika zo ni si ala tumba lo, maboko ti lo senge.

¹¹Wa ti yaka ni akiri atokua mbeni zo ti kua ti lo. Lo so nga, ala pika lo, ala sara kua ti mbana na lo si ala tumba lo, maboko ti lo senge.

¹²Lo kiri lo tokua ota zo ni. Lo nga, ala pika lo, azia ka na tere ti lo si ala tumba lo.

¹³Wa ti yaka ni atene na be ti lo, atene: ‘Fade mbi yeke sara tongana nyen? Mbi yeke tokua molenge ti mbi so mbi ye lo mingi; mbi hinga pepe, fade ala yeke kpe mbeto ti lo.’

¹⁴Me so azo ti fango yaka ni abaa molenge ni, ala tene na popo ti ala: ‘Baa, lo so lo yeke ga wa ti yaka ni na peko ti babâ ti lo laa! E fâ lo si yaka ni aga ti e!’

¹⁵Ala gbu lo, ala sigigi na lo na ya ti yaka ni si ala fâ lo.” Jésus ahunda ala, atene: “Fade wa ti yaka ni ayeke sara nyen na ala?

¹⁶Fade lo yeke ga ti fâ azo ti fango yaka so si lo yeke mu yaka ni na ambeni zo nde.” So azo ni ama tënë so, ala tene: “Ye ni ayeke si oko pepe!”

¹⁷Me Jésus abaa le ti ala si lo tene na ala: “Nda ti tënë so a su na ya ti Mbeti ti Nzapa so atene nyen? Tënë so atene: ‘Têne so azo ti sarango da ake ni, ni laa akiri aga ngangu têne ti gere ti da ni.’

¹⁸Zo so kue ayeke ti na ndö ti têne so, fade tere ti lo ayeke kungbi. Tongana têne ni ati na ndö ti mbeni zo, fade ayeke nika lo nikango!”

¹⁹Gi na ndembe ni so, awafango-ndia na akota wayango-sandaga ayeke gi lege ti gbu Jésus, me ala sara mbeto ti azo ti kodro. Ala hinga so toli so lo tene so, lo tene gi ti kpo ala.

²⁰Ala to nda ti *bembe ndo na tere ti Jésus. Ndani laa ala tokua ambeni zo na lo so asara tere ti ala tongana anzoni zo. Azo ni ague ti hunda lo na mbeni tënë titene na lege ti tënë ti yanga ti lo wani, lo ti na ya ti gbanda ti ala. Ala ye ti wara lege ti gbu lo ti zia lo na maboko ti akota zo ti kodro nga na govoronere.

²¹Ala hunda lo, atene: “Wafango-ye, e hinga so mo yeke tene tënë si mo yeke fa ye gi na legeni mbirimbiri; mo yeke mu mbage ti zo oko pepe, me mo yeke fa mbirimbiri lege ti sarango ye so Nzapa aye.

²²Tene na e: *Ndia amu lege na e ti futa lapo na kota gbia ti Rome, wala e futa ni pepe?”

²³Me Jésus ahinga mayere ti ala kue si lo tene na ala:

²⁴“Ala fa na mbi mbeni le ti nginza, e baa. So li ti zo wa laa? So iri ti zo wa laa na le ti nginza ni so?” Ala kiri tënë na lo, atene: “Ti kota gbia ti Rome.”

²⁵Lo tene na ala: “Ala futa na kota gbia ti Rome ye so ayeke ti lo, ala futa na Nzapa ye so ayeke ti Nzapa.”

²⁶Tongaso ala wara tënë na yanga ti lo pepe ti gbu lo ndali ni na le ti azo ni. Li ti ala kue akpe ndali ti tënë so lo kiri na ni na ala so si ala zi yanga oko pepe.

²⁷Ambeni *sadusien aga nduru na tere ti Jésus. — Asadusien ayeke azo so atene, akuâ ayeke zingo pepe. — Ala hunda lo, atene:

²⁸“Wafango-ye, Moïse asu ando ndia so na mbeti ndali ti e, lo tene: ‘Tongana mbeni zo akui si lo zia wali na peko ti lo, me zo ni adu amolenge pepe, alingbi ita ti lo amu wali ti wakuâ ni si lo du amolenge na ita ti lo so akui so.’

²⁹Ando, ambeni ita mbarambara ayeke daa. Kozo ita ni amu wali, lo du molenge pepe si lo kui.

³⁰Use ita ni amu wali ni.

³¹Na pekoni, ota ita ni amu wali ni. Ala mbarambara kue amu wali ni, ala du molenge pepe si ala kui.

³²Na ndani, wali ni nga akui.

³³Na lango ti zingongo ti akuâ, fade wali ni ayeke duti wali ti zo wa na popo ti ala so? So ala mbarambara kue amu lo ti ga wali ti ala so!”

³⁴Jésus akiri tënë na ala, atene: “Azo ti dunia so ayeke mu awali wala akoli,

³⁵me azo so Nzapa abaa ala atene, ala laa alingbi ande ti zingo na kuâ si ala duti na fini na ya ti dunia so ayeke ga gbanda, fade ala yeke mu koli wala wali pepe.

³⁶Ala lingbi nga ti kui pepe, ngbanga ti so ala yeke ga tongana *a-ange. Ala yeke amolenge ti Nzapa, ngbanga ti so ala zingo na kuâ awe.

³⁷Moïse wani afa ando polele atene, fade akuâ ayeke zingo. Biani, na ndo so lo tene tënë ti kete keke ti ki daa, lo iri Kota Gbia, atene: ‘Nzapa ti Abraham, Nzapa ti Isaac, Nzapa ti Jacob.’ ”

³⁸Jésus akiri atene: “Nzapa ayeke Nzapa ti akuâ pepe, me lo yeke Nzapa ti azo so ayeke na fini, ngbanga ti so ala kue ayeke na fini ndali ti lo.”

³⁹Ambeni wafango-ndia atene na lo: “Wafango-ye, tënë ti mo ayeke nzoni mingi.”

⁴⁰Nilaa, nzara ti kiri ti hunda lo na mbeni tënë asigigi na ya ti ala kue.

⁴¹Jésus atene na ala: “Tongana nyen si azo alingbi ti tene, *Mesii ayeke molenge ti David so?

⁴²David wani asu na ya ti mbeti ti Abia, atene: ‘*Kota Gbia Nzapa atene na Kota Gbia ti mbi, atene: Mo duti na mbage ti maboko ti mbi ti koli

⁴³ngbii mbi sara titene awato ti mo aga tongana mbata na gbe ti gere ti mo si.’

⁴⁴So David airi lo atene, Kota Gbia so, Mesii ayeke kiri ti ga molenge ti David tongana nyen?”

⁴⁵So gba ti azo ayeke ma Jésus, lo tene na adisiple ti lo:

⁴⁶“Ala sara hange na awafango-ndia so aye ti fono gi na ya ti kota bongo si ala ye titene azo abara ala na ndo so azo abongbi daa; ala ye ti duti na ya ti akozo ngende na ya ti ada ti sambelango Nzapa nga na ya ti amatanga.

⁴⁷Ala yeke ro aye kue ti ya ti da ti awali-mua si ala yeke sara ayongoro sambela titene azo abaa ala. Fade Nzapa ayeke fâ ngbanga na li ti ala ngangu ahon ti azo kue.”