Read La Bible en Sango courant – Mbeti ti Nzapa Luc 5 Bible Online

Luc 5 - La Bible en Sango courant – Mbeti ti Nzapa bible

Luc 5

¹Mbeni lâ, Jésus aluti na yanga ti kota ngu ti Genezaret, gba ti azo aga na tere ti lo si ala yeke gbugburu tere ti ma tënë ti Nzapa.

²Lo baa ango use na yanga ti ngu; azo ti gingo susu asigigi na ya ni awe si ala yeke sukula agbanda ti ala.

³Jésus ako na ya ti mbeni ngo ni oko so ayeke ti Simon. Lo hunda na lo ti gue na ngo ni yongoro kete na le ti ngu. Na pekoni, Jésus aduti na ya ti ngo ni si lo yeke fa ye na gba ti azo ni.

⁴So lo hunzi tënë ti lo awe, lo tene na Simon: “Mo gue na ngo ni na ndo so ngu ali mingi si ala bi gbanda daa ti gi asusu.”

⁵Simon akiri tënë na lo: “Kota zo, na bi so kue, e pika li ti e gbaa, e wara susu oko pepe. Me ndali ti tënë ti yanga ti mo, fade mbi yeke bi gbanda ni.”

⁶So ala bi gbanda ni, ala gbu asusu gbani gbani; gbanda ti ala aye ti suru.

⁷Ala sara maboko na amba ti ala so ayeke na ya ti mbeni ngo ni ti ga ti mu maboko na ala. Amba ti ala aga si ala tuku asusu ni na ya ti ango use kue; ango ni asi singo na asusu si aye ti linda ngu.

⁸So Simon Pierre abaa tongaso, lo ti na gbe ti Jésus si lo tene na lo: “*Kota Gbia, hon yongoro na tere ti mbi, ngbanga ti so mbi yeke zo ti siokpari!”

⁹Mbeto agbu Simon na azo so kue ayeke na tere ti lo, ngbanga ti so ala gbu asusu gbani gbani.

¹⁰Mbeto agbu nga Jacques na Jean, amolenge ti Zebede so ala yeke amba ti Simon. Jésus atene na Simon: “Sara mbeto pepe! Ti londo fadeso, mo yeke ga zo ti gingo azo.”

¹¹So ala kiri na ango ni na yanga ti ngu awe, ala zia aye ti ala kue si ala mu peko ti Jésus.

¹²So Jésus ayeke na ya ti mbeni gbata ni, mbeni koli so buruma amu tere ti lo kue asi. So lo baa Jésus, lo ti, lo kpo li ti lo na sese si lo voro lo, lo tene: “*Kota Gbia, tongana mo ye, mo lingbi ti sara si tere ti mbi aga *nzoni.”

¹³Jésus ayoro maboko ti lo, lo ndu koli ni si lo tene: “Mbi yeda! Ayeke nzoni tere ti mo aga *nzoni.” Gi na pekoni, buruma ni alondo na tere ti lo.

¹⁴Jésus amu yanga na lo, atene: “Mo tene tënë ni na mbeni zo oko pepe! Me mo gue, mo fa tere ti mo na wayango-sandaga titene lo baa mo; na pekoni, mo mu *sandaga so Moïse amu yanga ando ti mungo ni so. Tongaso si mo fa na le ti azo kue so tere ti mo aga *nzoni awe.”

¹⁵Sango ti Jésus angba ti mu yanga ti azo ti gue na ni. Gba ti azo aga ti ma tënë ti lo nga titene lo kai kobela ti ala.

¹⁶Me Jésus agboto tere ti lo, lo gue na mbeni ndo so zo ayeke daa pepe si lo sambela.

¹⁷Mbeni lâ, Jésus ayeke fa ye na azo. *Afarizien na awafango-ndia ayeke na popo ti azo ni; ala londo na ya ti akodro ti Galile na ti Judée nga na Jérusalem si ala ga. Ngangu ti *Kota Gbia ayeke na Jésus si lo yeke kai akobela na tere ti azo.

¹⁸Ambeni zo ayo mbeni koli so mbage ti tere ti lo abuba na ndö ti kelekpa si aga na lo. Ala yeke gi lege ti li na lo na ya ti da ni, ti zia lo na dawa ti Jésus.

¹⁹Me ala gi lege ti li na lo gbaa, ngbanga ti so azo ayeke gbani gbani. Ala gue na lo na li ti da ni, ala zi mbage ti li ni si ala yoro lo na kelekpa ti lo kue na popo ti azo ni, ala zia lo na dawa ti Jésus.

²⁰So Jésus abaa mabe ti ala, lo tene na koli ni: “A zi asiokpari ti mo awe.”

²¹Awafango-ndia na afarizien ato nda ti tene na be ti ala, atene: “Lo yeke zo wa si lo yeke zonga Nzapa so? Zo wa laa alingbi ti zi asiokpari ti azo? Gi Nzapa oko!”

²²Me Jésus ahinga tënë ti be ti ala kue si lo tene na ala: “Ngbanga ti nyen laa ala yeke tene mara ti tënë tongaso na be ti ala?

²³Titene zo atene: ‘A zi asiokpari ti mo awe’, wala titene zo atene: ‘Londo, mo tambula!’, so wa laa ayeke ngangu pepe?

²⁴Me ti sara si ala hinga atene, *Molenge ti Zo ayeke na ngangu ti zi asiokpari ti azo na sese so, Jésus atene na zo so mbage ti tere ti lo abuba so, atene: ‘Mbi tene na mo: londo, mo mu kelekpa ti mo, mo gue na da ti mo!’ ”

²⁵Gi hio tongaso, koli ni alondo na le ti azo kue, lo mu kelekpa ti lo, lo gue na da ti lo si lo yeke gonda Nzapa.

²⁶Li ti azo ni kue akpe; ala yeke gonda Nzapa, mbeto agbu ala si ala tene: “Laso, e baa akota ye ti kpene!”

²⁷Na pekoni, Jésus asigigi si lo baa mbeni zo ti rongo nginza ti lapo so iri ti lo ayeke Lévi; lo yeke duti na ndo so azo ayeke futa lapo ti ala daa. Jésus atene na lo: “Mu peko ti mbi!”

²⁸Lévi alondo, lo zia aye kue si lo mu peko ti Jésus.

²⁹Na pekoni, Lévi asara kota matanga na da ti lo ndali ti Jésus. Azo ti rongo nginza ti lapo na ambeni zo mingi ayeke te kobe na ala.

³⁰*Afarizien na awafango-ndia ti ala ayeke kasa tënë ni si ala tene na adisiple ti Jésus, atene: “Ngbanga ti nyen laa ala yeke te, ala yeke nyon na azo ti rongo nginza ti lapo nga na azo ti siokpari so?”

³¹Jésus akiri tënë na ala: “Azo so ayeke na nzoni tere laa ayeke na nzara ti gue na wanganga pepe, me azo ti kobela.

³²Mbi ga ti iri azo ti mbirimbiri pepe, me mbi ga ti iri azo ti siokpari titene ala zia ngbene lege ti sarango ye ti ala.”

³³*Afarizien atene na Jésus: “Adisiple ti Jean na adisiple ti e ayeke ke kobe lege mingi si ala yeke sambela, me adisiple ti mo ayeke te ye si ayeke nyon ye.”

³⁴Jésus atene na ala: “Azo so a tisa ala na matanga ti mungo tere ti koli na wali, fade ala yeke hunda na azo ni ti ke kobe na ndembe so koli ni ade na popo ti ala? Oko pepe!

³⁵Me ambeni lango ayeke ga so fade a yeke mu koli ni na popo ti ala, a hon na lo; na ngoi so laa, fade ala yeke ke kobe.”

³⁶Jésus atene nga na ala mbeni toli, atene: “Zo alingbi ti suru yanga ti fini bongo ti fu na le ti ka ti ngbene bongo pepe. Tongaso pepe, fade fini bongo ni ayeke suru si nduru yanga ti fini bongo ni alingbi na ngbene bongo ni pepe.

³⁷Zo alingbi nga ti tuku fini vin na ya ti ngbene bozo ti poro pepe. Tongaso pepe, fade fini vin ni ayeke sara si bozo ni asungba, vin ni atuku na sese si bozo ni abuba.

³⁸Me alingbi atuku fini vin na ya ti fini bozo.

³⁹Zo so anyon ngbene vin awe, lo ye ti nyon fini vin pepe, ngbanga ti so lo baa lo tene, ngbene ni laa anzere.”