Read La Bible en Sango courant – Mbeti ti Nzapa Luc 7 Bible Online

Luc 7 - La Bible en Sango courant – Mbeti ti Nzapa bible

Luc 7

¹So Jésus ahunzi ti tene atënë so kue na azo, lo gue na gbata ti Kapernaum.

²Mbeni kapita ti aturugu ti Rome ayeke na zo ti kua so lo ye lo mingi. Zo ti kua ni ayeke na kobela si lo ga nduru ti kui.

³So lo ma tënë ti Jésus, lo tokua ambeni *kangba ti azuife na lo ti hunda lo titene lo ga, lo kai kobela na tere ti zo ti kua ti lo ni.

⁴Ala si na tere ti Jésus, ala voro lo mingi, atene: “Ayeke nzoni mo sara ye so koli so ahunda na mo,

⁵ngbanga ti so lo ye mara ti e mingi; lo laa lo sara da ti sambelango Nzapa ti e so.”

⁶Tongaso Jésus amu lege si lo na ala ague. So lo si nduru na da ni, kapita ti aturugu ni atokua ambeni mba ti lo ti tene na lo: “*Kota Gbia, mo baa pasi senge senge pepe, ngbanga ti so mbi kpa zo so mo lingbi ti li na ya ti da ti lo pepe.

⁷Nilaa, mbi baa nga tere ti mbi, mbi tene, mbi lingbi ti si na tere ti mo pepe. Me mo tene tënë oko si kobela ti zo ti kua ti mbi akai!

⁸Mbi wani, mbi yeke na gbe ti ambeni makonzi so kamba ti ala ahon ti mbi; mbi yeke nga na aturugu na gbe ti mbi. Tongana mbi tene na mbeni oko, mbi tene: ‘Gue kâ!’, lo yeke gue. Tongana mbi tene na mbeni, mbi tene: ‘Ga na ndo so!’, lo yeke ga. Tongana mbi tene na zo ti kua ti mbi, mbi tene: ‘Sara ye so!’, lo yeke sara ni.”

⁹So Jésus ama tënë so, lo gonda lo mingi. Lo baa ndo na mbage ti gba ti azo so amu peko ti lo si lo tene na ala: “Mbi tene na ala: ataa na kodro ti Israel, mbi de ti baa mara ti mabe tongaso laoko pepe.”

¹⁰Azo ti tokua ni akiri na da, ala wara zo ti kua ni, andaa tere ti lo aga nzoni awe.

¹¹Na pekoni, Jésus ague na mbeni gbata so iri ni Naine. Lo na adisiple ti lo na gba ti azo ayeke tambula oko na lege ti gue.

¹²Na ndembe so lo si nduru na yanga ti gbata ni, lo baa azo ayo mbeni kuâ ti gue ti lu ni: kuâ ni ayeke ti oko molenge-koli ti mbeni wali-mua. Gba ti azo ti gbata ni ayeke na tere ti mama ni si ayeke gue ti lu kuâ ni.

¹³So *Kota Gbia abaa wali-mua ni, mawa ti lo agbu lo si lo tene na lo: “Mo toto pepe!”

¹⁴Jésus ague nduru si lo ndu kelekpa ti kuâ ni; azo ti yongo kuâ ni aluti. Jésus atene: “Maseka-koli, mbi tene na mo, zingo!”

¹⁵Tongaso kuâ ni alondo aduti si lo to nda ti tene tënë. Jésus akiri na lo na mama ti lo.

¹⁶Mbeto agbu azo ni kue si ala yeke gonda Nzapa, atene: “Mbeni kota wayanga-Nzapa aga na popo ti e awe! Nzapa aga ti baa azo ti lo!”

¹⁷Tënë ti ye so Jésus asara so amu yanga ti azo ti Judée na azo so ayeke na akodro ti tere ni kue.

¹⁸Adisiple ti Jean atene tënë ti aye so kue na Jean. Tongaso lo iri adisiple ti lo use

¹⁹si lo tokua ala na *Kota Gbia ti hunda lo, atene: “Mo yeke *Mesii so ayeke ga ande so? Wala alingbi e ku mbeni zo nde?”

²⁰So ala si na tere ti Jésus, ala atene na lo: “Jean-Baptiste atokua e ti hunda mo: ‘Mo yeke Mesii so ayeke ga ande so? Wala alingbi e ku mbeni zo nde?’ ”

²¹Na ndembe ni so, Jésus akai kobela na tere ti azo mingi, lo sara si azo so mbage ti tere ti ala abuba, aga nzoni, lo tumba asioni yingo na ya ti azo, lo sara si awaziba abaa ndo.

²²Na pekoni, lo tene na azo so Jean atokua ala so, lo tene: “Ala gue, atene na Jean tënë ti aye so ala baa na aye so ala ma: awaziba akiri abaa ndo, azo so gere ti ala abuba akiri atambula, tere ti azo ti buruma aga *nzoni, azo so mê ti ala akanga akiri ama ndo, azo azingo na kuâ, a fa Nzoni Tënë na azo ti mawa.

²³Ti lo nzoni, lo so lo ma na be na mbi awe si lo kiri lo zia lege ni pepe!”

²⁴So azo so Jean atokua ala so amu lege akiri awe, Jésus ato nda ti tene tënë ti Jean na gba ti azo so aga so, atene: “Nyen laa ala gue ti baa ni kâ na ya ti benyama so? Ala gue ti baa mbeni sosongo so pupu ayeke yingi ni?

²⁵Nyen laa ala gue ti baa ni kâ? Ala gue ti baa mbeni zo so ayu pendere bongo? Azo so ayu apendere bongo si ala yeke te ti ala nzoni so, ala yeke duti ti ala na ya ti ada ti agbia!

²⁶Nyen laa ala gue ti baa ni kâ? Ala gue ti baa mbeni wayanga-Nzapa? Mbi tene na ala taa-tënë: zo so ala gue ti baa lo so ayeke kota ahon wayanga-Nzapa.

²⁷Lo laa a su tënë ti lo na Mbeti ti Nzapa, atene: ‘Baa, mbi yeke tokua zo ti kua ti mbi kozo ti mo; fade lo yeke leke lege na dawa ti mo.’

²⁸Mbi tene na ala: na popo ti azo so awali adu ala, mbeni oko so ayeke kota ahon Jean-Baptiste ayeke daa pepe; me ndangba zo ti ya ti *Kodro-gbia ti Nzapa ayeke kota ahon lo.”

²⁹Azo so kue ama lo, ataa azo ti rongo nginza ti lapo, ala hinga atene, Nzapa ayeke sara ye ti lo na legeni si ala yeda ti wara bateme ti Jean.

³⁰Me *afarizien na awafango-ndia ake ti yeda na nzoni ye so Nzapa aleke ndali ti ala si ala ke ti wara bateme ti Jean.

³¹Jésus akiri atene: “Fade mbi yeke haka azo ti fadeso na azo wa? Ala yeke tongana azo wa?

³²Ala yeke tongana amolenge so aduti na le ti kodro si ala yeke tene na popo ti ala: ‘E huru *ngoli titene ala dodo, me ala dodo pepe. E he na ala bia ti totongo kuâ, me ala toto pepe.’

³³Jean-Baptiste aga, lo ke ti te kobe si lo ke nga ti nyon vin, me ala tene: ‘Sioni yingo ayeke na ya ti lo!’

³⁴*Molenge ti Zo aga, lo yeke te, lo yeke nyon, me ala tene: ‘Ala baa, koli so ayeke gbongo ti kobe si lo yeke nyon samba mingi! Lo ye tënë ti azo ti rongo nginza ti lapo na azo ti siokpari!’

³⁵Me amolenge ti Nzapa kue ahinga so ndara ti lo ayeke mbirimbiri.”

³⁶Mbeni *farizien atisa Jésus ti te kobe na da ti lo. Lo li na da ti *farizien ni si lo duti ti te kobe.

³⁷Mbeni wali ti gbata ni asi, lo yeke mbeni wali-ndumba. So lo ma a tene, Jésus ayeke te kobe na da ti farizien ni, lo ga na mbeni ngbenda ti yombo; a sara ngbenda ni na mbeni têne so iri ni albatre.

³⁸Lo luti na peko ti Jésus, nduru na tere ti lo. Lo yeke toto, ngu ti le ti lo ayeke yuru na ndö ti gere ti Jésus si lo yeke mbo ni na kua ti li ti lo; lo gbu gere ti Jésus si lo yeke tuku yombo ni na ndö ni.

³⁹Farizien so airi Jésus ti te kobe so abaa ye ni si lo tene na be ti lo: “Tongana koli so ayeke fade wayanga-Nzapa biani, ka lo hinga lo tene, wali so ayeke ndu lo so ayeke mbeni wali-ndumba.”

⁴⁰Jésus amu tënë si lo tene na farizien ni: “Simon, mbi yeke na mbeni tënë ti tene na mo.” Simon atene: “Wafango-ye, tene tënë ni!”

⁴¹Jésus atene: “Mbeni zo ayeke daa, nginza ti lo ayeke na li ti azo use. Lo mu na mbeni zo ni ale ti nginza ngbangbo oku na boon si lo mu na mbeni ale ti nginza baleoku.

⁴²So ala yeke na nginza ti kiri na ni na lo pepe, lo zia nginza ni na ala use kue. Zo wa na popo ti azo use so si ayeke ye ande wa ti nginza so mingi?”

⁴³Simon akiri tënë: “Ti be ti mbi, mbi tene ayeke lo so a zia na lo kota nginza so.” Jésus atene na lo: “Tënë ti mo ayeke na legeni.”

⁴⁴Na pekoni, Jésus abaa ndo na mbage ti wali ni si atene na Simon: “Mo baa wali so? So mbi li na da ti mo, mo mu na mbi ngu pepe ti sukula na gere ti mbi; me lo, lo sukula gere ti mbi na ngu ti le ti lo si lo mbo ni na kua ti li ti lo.

⁴⁵Mo su ngbangba ti mbi pepe; me lo, so lo li na da ti mo so, lo zia ti gbu gere ti mbi pepe.

⁴⁶Mo sara mafuta na li ti mbi pepe; me lo, lo tuku yombo na gere ti mbi.

⁴⁷Ndani laa mbi tene na mo: kota ndoye so lo yeke na ni afa atene, gba ti asiokpari so lo sara, Nzapa azi ni na li ti lo awe. Me zo so a zi tënë na li ti lo gi kete, lo yeke na ndoye gi kete.”

⁴⁸Na pekoni, lo tene na wali ni, lo tene: “A zi asiokpari ti mo awe.”

⁴⁹Azo so ayeke te kobe na lo so atene na be ti ala, atene: “Koli so ayeke zo wa si ayeke zi asiokpari na li ti azo so?”

⁵⁰Me Jésus atene na wali ni: “Mabe ti mo asoo mo awe. Mo gue nzoni!”