Read La Bible en Sango courant – Mbeti ti Nzapa Ndia ti fani use ni 16 Bible Online

Ndia ti fani use ni 16 - La Bible en Sango courant – Mbeti ti Nzapa bible

Ndia ti fani use ni 16

¹Moïse atene: Na nze ti Abib, fade ala yeke sara *matanga ti Pake ndali ti *KOTA GBIA Nzapa ti ala, ngbanga ti so na nze so laa KOTA GBIA Nzapa ti ala asara si ala sigigi na sese ti Ezipte na bi.

²Na popo ti anyama ti ala, ala yeke mu abagara, ataba na ngasa si ala yeke ya ni na *sandaga na KOTA GBIA na lango ti matanga ti Pake ni. Ala yeke sara matanga ni na ndo so lo yeke soro titene iri ti lo aduti daa.

³Na ndembe ti matanga ni, mapa so a sara na mama ni, fade ala yeke te ni pepe. Na ya ti lango mbarambara, ala yeke te gi mapa so a sara na mama ni pepe, ngbanga ti so ala sigigi na loro na sese ti Ezipte. Tongana ala yeke te mapa ti ye ti vundu so, ala yeke dabe ti ala na lango so ala sigigi na sese ti Ezipte; ala yeke dabe ti ala na ni na lango ti fini ti ala kue.

⁴Na ya ti lango mbarambara so kue, alingbi a wara mama ti mapa oko na ndo ti ala pepe, ataa na ya ti kodro ti ala kue. Âdu ti nyama so ala fâ ti mu na sandaga na lakui ti kozo lango ti matanga ni, ala bata kasa ti nyama ni ngbii asi na ndaperere pepe.

⁵Ala lingbi ande pepe ti mu sandaga ti Pake na ya ti mbeni gbata nde so KOTA GBIA Nzapa ti ala amu na ala.

⁶Ala yeke mu sandaga ni gi na ndo so lo soro titene iri ti lo aduti daa. Ala yeke mu sandaga ni na lakui, so ti tene na oko ngbonga so ala sigigi lani na ni na sese ti Ezipte.

⁷Ala yeke to nyama ni si ala yeke te lo na ndo so KOTA GBIA Nzapa ti ala ayeke soro ni. Na ndade ni, na ndaperere, ala yeke kiri na ndo ti ala.

⁸Na ya ti lango omene, ala yeke te mapa so a sara na mama ni pepe. Na lango mbarambara ni, ala yeke sara matanga ndali ti KOTA GBIA Nzapa ti ala; ala yeke sara kua pepe.

⁹Moïse atene: Ala azo ti Israel, ti londo na lango so ala yeke to nda ti fâ ale ti *ble, fade ala yeke diko yenga mbarambara.

¹⁰Na pekoni, ala yeke sara matanga ti *Pantekote ndali ti *KOTA GBIA Nzapa ti ala. Na be ti ala wani, ala yeke ga na *sandaga ti aye ti maboko ti ala, alingbi na nzoni ye so KOTA GBIA Nzapa ti ala ayeke sara na ala.

¹¹Ala yeke gue na ndo so KOTA GBIA Nzapa ti ala ayeke soro titene iri ti lo aduti daa. Kâ, ala yeke sara ngia, ala na amolenge ti ala ti koli na ti wali, na azo ti kua ti ala ti koli na ti wali, na azo ti mara ti Lévi so aduti na ya ti gbata ti ala, azo ti Israel, na awande, anyindu nga na awali-mua so ayeke na popo ti ala.

¹²Ayeke nzoni ala dabe ti ala so ala wani, ala yeke ando angbaa na sese ti Ezipte. Fade ala yeke bata andia ti lo si ala yeke sara ye alingbi na ni.

¹³Moïse atene: Tongana ala hunzi ti pika ale ti kobe na ndö ti lakere awe si ala hunzi ti pete vin na ya ti du ti petengo vin awe, fade ala yeke sara matanga ti Akpangba na ya ti lango mbarambara.

¹⁴Ala yeke sara matanga ni na ngia, ala na amolenge ti ala ti koli na ti wali, na azo ti kua ti ala ti koli na ti wali, na azo ti mara ti Lévi so aduti na ya ti agbata ti ala, azo ti Israel, na awande, anyindu nga na awali-mua so ayeke na popo ti ala.

¹⁵Na ya ti lango mbarambara kue, ala yeke sara matanga ni ndali ti *KOTA GBIA Nzapa ti ala, na ndo so lo yeke soro ti duti daa. Ala yeke sara ngia na be ti ala kue, ngbanga ti so KOTA GBIA Nzapa ti ala ayeke sara tufa na ndö ti ala na ya ti akua so kue ala yeke sara; lo yeke sara si akobe ti yaka ti ala ale mingi.

¹⁶Lakue na ya ti ngu oko oko, alingbi akoli ti amara ti ala ague fani ota ti luti na le ti KOTA GBIA Nzapa ti ala, na ndo so lo yeke soro ni: na matanga ti Mapa so a sara na mama ni pepe, na matanga ti *Pantekote nga na matanga ti Akpangba. Fade ala yeke gue ti luti na le ti KOTA GBIA, maboko ti ala senge pepe.

¹⁷Me koli oko oko ayeke gue na mbeni ye ti mu ni, alingbi na nzoni so KOTA GBIA asara na lo.

¹⁸Moïse atene: Ala azo ti Israel, na ya ti agbata so kue *KOTA GBIA Nzapa ti ala ayeke mu na ala, fade ala yeke soro na ya ti mara ti ala oko oko, awafango-ngbanga na akota zo ti tere ti ala; fade ala yeke fâ ngbanga ti azo ti mara ni na legeni.

¹⁹Ala buba ya ti ngbanga pepe! Tongana ala yeke fâ ngbanga, alingbi ala mu mbage ti mbeni zo pepe; ala yeda titene azo apete na ala goro pepe, ngbanga ti so goro ayeke vuko le ti zo ti ndara si ayeke buba ya ti tënë ti zo ti mbirimbiri.

²⁰Fade ala yeke sara ngangu kue ti fâ ngbanga mbirimbiri; tongaso si ala lingbi ti ngba na fini si ala mu sese so KOTA GBIA Nzapa ti ala amu na ala titene aga ti ala.

²¹Moïse atene: Na tere ti gbalaka so ala sara ndali ti *KOTA GBIA Nzapa ti ala, fade ala yeke lu mbeni yongoro keke pepe, wala mbeni keke pepe ndali ti *Ashera.

²²Fade ala yeke leke angbongboro têne aluti na nduzu nga pepe; be ti KOTA GBIA Nzapa ti ala ake ye so mingi.