Read La Bible en Sango courant – Mbeti ti Nzapa Ndia ti fani use ni 22 Bible Online

Ndia ti fani use ni 22 - La Bible en Sango courant – Mbeti ti Nzapa bible

Ndia ti fani use ni 22

¹Moïse atene: Mbeni ye tongaso alingbi nga ti si: mbeni lâ, mo zo ti Israel, mo baa bagara, wala taba wala ngasa ti mba ti mo so agirisa si ayeke fono kirikiri, mo zia lo, mo hon pepe; me alingbi mo mu lo, mo kiri na lo na mba ti mo ni.

²Tongana lo lango yongoro na da ti mo, wala mo hinga lo pepe, alingbi mo bata nyama ni na da ti mo ngbii asi na lango so mba ti mo ni aga ti gi lo. Tongaso fade mo yeke kiri na lo nyama ni.

³Fade mo yeke sara legeoko tongaso ndali ti lele ti lo so mo wara, wala ndali ti yongoro bongo ti lo, wala mbeni ye ti lo so agirisa si mo wara ni; alingbi mo ke ti baa lege ti ye ni pepe.

⁴Tongana mo baa lele wala bagara ti ita ti mo ati na lege, alingbi mo zia wa ti nyama ni lo oko, lo yo nyama ni na nduzu pepe.

⁵Moïse atene: Alingbi wali ayu bongo ti koli pepe; alingbi koli ayu bongo ti wali pepe. Azo so asara mara ti ye tongaso aga sioni mingi na le ti *KOTA GBIA Nzapa ti ala, azo ti Israel.

⁶Tongana mo wara na lege, wala na ya ti keke wala na sese mbeni da ti ndeke so mama ti ndeke ni alango na ndö ti para ti lo wala lo yeke bata amolenge ti lo, alingbi mo mu mama ti ndeke ni nga na amolenge ni pepe.

⁷Mo mu gi amolenge ni, me mo zia mama ni ahuru ahon. Tongaso fade ala, azo ti Israel, ala yeke duti nzoni si gigi ti ala ague, ayo.

⁸Tongana mo sara fini da, alingbi mo leke kete gbagba angoro li ti da ni na nduzu. Tongaso, fade tënë ayeke ga na li ti mo pepe, tongana mbeni zo alondo na li ti da ni ati akui.

⁹Alingbi mo lu mbeni le ti kasa nde na ya ti yaka ti *vinye ti mo pepe. Tongaso pepe, fade a yeke zia ale ti vinye ni na ale ti kasa ni kue nde ndali ti KOTA GBIA.

¹⁰Tongana mo yeke fâ yaka, mo mu bagara na lele, mo kanga ala oko na masini ti fango yaka pepe.

¹¹Bongo so a fun na mara ti akamba use, ti kua ti tere ti taba nga na ti *len, alingbi mo yu ni pepe.

¹²Kota bongo so ala yeke bi na ndö ti ala, fade ala yeke mu mbeni kamba ti bongo so nzoroko ni akpa le ti nduzu, ala fu na yanga ni osio kue.

¹³Moïse atene: Mbeni ye tongaso alingbi ti si: mbeni koli amu mbeni wali si lo na lo aduti koli na wali; na pekoni, koli ni ake ti ye wali ni.

¹⁴Lo diko abuba tënë na tere ti wali ni si lo bi tënë na li ti lo senge senge ndali ti sarango ye ti kamene, lo tene: “Mbi mu wali so ti ga wali ti mbi, mbi duti na lo koli na wali; me mbi baa so lo hinga koli kozoni awe.”

¹⁵Tongana ye ni ayeke tongaso, fade babâ na mama ti maseka-wali ni ayeke mu mbeni ye so afa atene, molenge ti ala ade ti hinga koli kozoni pepe si ala yeke gue na ni na gbe ti *akangba ti gbata ni.

¹⁶Babâ ti maseka-wali ni ayeke tene na akangba ni, atene: “So molenge ti mbi ti wali laa. Mbi mu lo na koli so ti ga wali ti lo; me lo kiri lo ye lo pepe.

¹⁷Ndani laa lo diko abuba tënë na tere ti lo si lo tene na mbi, lo tene: ‘Ye so afa atene, molenge ti mo ade ti hinga koli kozoni pepe so, mbi baa ti mbi pepe!’ Ala baa, ye so afa atene, lo de ti hinga koli kozoni pepe laa.” Fade ala yeke zi ya ti bongo ti ndö ti gbogbo ni na le ti akangba ti gbata ni.

¹⁸Akangba ti gbata ni ayeke gbu koli ni titene a pika lo.

¹⁹Na pekoni, a yeke diko mbeni lamande na li ti lo so wungo ni alingbi na ale ti nginza ngbangbo oko; lo yeke futa ni na babâ ti maseka-wali ni, ngbanga ti so koli ni abuba iri ti mbeni maseka-wali ti Israel. Fade maseka-wali ni ayeke ngba wali ti koli ni; na lango ti fini ti lo kue, lo lingbi ti tumba wali ni oko pepe.

²⁰Me tongana tënë so koli ni abi na li ti wali ni ayeke taa-tënë, tongana a baa so maseka-wali ni ahinga koli kozoni awe,

²¹fade a yeke gue na lo na yanga ti da ti babâ ti lo; akoli ti gbata ni ayeke bo lo na têne ngbii lo kui. Biani, lo sara ye ti sioni mingi na sese ti Israel na lege ti sarango ye ti ndumba na ndembe so lo de na da ti babâ ti lo. Lege so ala, azo ti Israel, ala yeke zi sioni ye na popo ti ala laa.

²²Tongana a wara mbeni koli so ayeke lango na wali ti mbeni zo, fade a yeke fâ ala use kue, koli ni na wali ni. Lege so fade ala yeke zi sioni ye na popo ti ala laa.

²³Na ya ti mbeni gbata, mbeni maseka-wali alingbi ti duti daa so ade ti hinga koli pepe si mbeni koli ahunda ti mu lo na wali; tongana mbeni koli nde awara maseka-wali ni si alango na lo,

²⁴fade ala, azo ti Israel, ala yeke gue na azo use so kue na yanga ti gbagba ti gbata ni; ala yeke bo ala na têne ti fâ ala. Ala yeke fâ maseka-wali ni, ngbanga ti so lo dekongo pepe ti iri ndo titene azo aga amu na lo maboko; ala yeke fâ koli ni, ngbanga ti so lo lango na wali ti mbeni zo nde. Lege so fade ala yeke zi sioni ye na popo ti ala laa.

²⁵Me tongana koli awara mbeni maseka-wali na ya ti ngonda, maseka-wali so koli ahunda ti mu lo na wali, tongana koli ni agbu lo na ngangu si alango na lo, fade a yeke fâ koli ni lo oko.

²⁶Ala yeke sara ye oko na maseka-wali ni pepe: lo sara siokpari so alingbi na kuâ pepe. — Ye ni ayeke legeoko tongana ti mbeni koli so ati na ndö ti mba ti lo si afâ lo. —

²⁷Ti so ni, koli ni awara maseka-wali ni na ya ti ngonda. Ataa maseka-wali ni adekongo fade, zo oko ayeke daa pepe ti ga ti mu maboko na lo.

²⁸Mbeni maseka-wali so ade ti hinga koli pepe, so koli ade nga ti hunda tënë ti lo pepe alingbi ti duti daa. Tongana mbeni koli agbu lo na ngangu si alango na lo, tongana a gbu ala,

²⁹fade koli ni ayeke futa na babâ ti maseka-wali ni ale ti nginza baleoku. Na pekoni, lo yeke mu maseka-wali ni ti ga wali ti lo. Na lango ti fini ti lo kue, lo lingbi ti tumba wali ni oko pepe.