Read La Bible en Sango courant – Mbeti ti Nzapa Ndia ti fani use ni 26 Bible Online

Ndia ti fani use ni 26 - La Bible en Sango courant – Mbeti ti Nzapa bible

Ndia ti fani use ni 26

¹Moïse atene: Ala ga nduru ti li na sese so *KOTA GBIA Nzapa ti ala ayeke mu na ala titene aga ti ala. Tongana ala mu sese ni si ala duti daa awe,

²fade zo oko oko na popo ti ala ayeke mu akozo li ti kobe ti lo so lo lu ni na sese so KOTA GBIA Nzapa ti ala amu na ala. Lo yeke zia ni na ya ti sakpa si lo yeke gue na ni na ndo so KOTA GBIA Nzapa ti ala ayeke soro titene iri ti lo aduti daa.

³Zo ni ayeke gue ti baa wayango-sandaga so ayeke sara kua na lango ni so si lo yeke tene na lo: “Laso na le ti KOTA GBIA Nzapa ti mo, mbi tene, mbi si awe na sese so KOTA GBIA adeba yanga ti lo lani ti mu na akotara ti e.”

⁴Na pekoni, fade wayango-sandaga ayeke mu sakpa ni na maboko ti zo ni si lo yeke zia ni na dawa ti gbalaka ti KOTA GBIA Nzapa ti ala, azo ti Israel.

⁵Zo so aga na akobe ni ayeke tene na le ti KOTA GBIA, atene: “Kotara ti mbi ayeke ando zo ti mara ti Aram so ayeke si ge, asi kâ. Lo gue na sese ti Ezipte, lo sara kodro kâ; azo so amu peko ti lo ayeke mingi pepe. Na pekoni, ala ga kota mara, ngangu mara nga na mara so awu mingi.

⁶Me azo ti Ezipte asara ngangu na e, ala sara sana na e, ala gbu e na ngangu ti sara akua ti ngbaa.

⁷Tongaso e dekongo na KOTA GBIA Nzapa ti akotara ti e. Lo ma dekongo ti e; lo baa lege so azo ti Ezipte ayeke sara sana na e, lege so e yeke na ya ti vundu nga na ya ti pasi.

⁸KOTA GBIA asara si e sigigi na sese ti Ezipte na lege ti ngangu ti maboko ti lo nga na lege ti maboko ti lo so lo yoro; na lege ti akota ye ti ziango mbeto na be ti zo, na lege ti aye ti kpene nga na lege ti aye ti dongo be.

⁹Lo ga na e na ndo so si lo mu na e *sese so ngu ti me ti bagara na mafuta ti wotoro asi singo daa.

¹⁰Ndani laa fadeso, mbi ga na KOTA GBIA akozo li ti kobe ti yaka so mbi lu na sese so lo mu na mbi.” Zo ni ayeke zia sakpa ti akobe so lo ga na ni so na dawa ti KOTA GBIA. Na pekoni, lo yeke kuku, lo kpo li ti lo na sese ti voro KOTA GBIA Nzapa ti ala, azo ti Israel.

¹¹Na pekoni, zo ni, na azo ti mara ti Lévi nga na awande so ayeke na popo ti ala ayeke sara ngia ndali anzoni ye so kue KOTA GBIA Nzapa ti ala amu na ala, ala na azo ti sewa ti ala.

¹²Moïse atene: Lakue na peko ti ngu ota, fade zo oko oko ayeke mu *dime ti akobe ti lo. Tongana ala hunzi ti bongbi adime ti akobe ti ala ni awe, fade ala yeke mu ni na azo ti mara ti Lévi, awande, anyindu na awali-mua. Tongaso, fade azo ni ayeke wara kobe na ya ti agbata ti ala, azo ti Israel ti te, alingbi na nzara ti ala.

¹³Na pekoni, fade ala yeke tene na le ti KOTA GBIA Nzapa ti ala, atene: “Aye so a zia nde ndali ti KOTA GBIA, mbi zi ni na ya ti da ti mbi, mbi mu na azo ti mara ti Lévi, awande, anyindu na awali-mua, alingbi na atënë ti ndia so kue mo mu na mbi; mbi sara ye alingbi na atënë ti ndia ti mo kue, be ti mbi agirisa na mbeni oko pepe.

¹⁴Na ngoi so mbi yeke na mua, mbi te mbeni ye na ya ti dime ni oko pepe; na ngoi so mbi ga *sioni, mbi zi mbeni ye oko daa pepe, mbi mu mbeni ye oko na kuâ pepe. Mbi ma yanga ti mo, KOTA GBIA Nzapa ti mbi; mbi sara ye kue alingbi na yanga so mo mu na mbi.

¹⁵So mo yeke na yayu kâ, na ndo ti mo so ayeke nde si ayeke nzoni kue, mo baa ndo, mo sara tufa na ndö ti azo ti Israel, azo ti mo; mo sara nga tufa na ndö ti kodro so mo mu na e, alingbi na zendo so mo mu na akotara ti e; *kodro so ngu ti me ti bagara na mafuta ti wotoro asi singo daa.”

¹⁶Moïse atene: Laso, *KOTA GBIA Nzapa ti ala amu yanga na ala ti sara ye alingbi na andia so nga na atënë ti ndia so. Fade ala yeke bata ni, ala yeke sara ye alingbi na ni na be ti ala kue, na yingo ti ala kue.

¹⁷Laso ala sara si KOTA GBIA amu zendo so na ala: lo yeke Nzapa ti ala, tongana ala tambula na lege so lo fa na ala, tongana ala sara ye alingbi na andia ti lo, tongana ala sara ye alingbi na yanga so lo mu na ala nga na atënë ti ndia ti lo, tongana ala ma yanga ti lo.

¹⁸Laso KOTA GBIA asara si ala mu zendo so, atene: fade ala yeke duti azo ti lo wani, ala yeke sara ye alingbi na atënë ti ndia ti lo kue.

¹⁹Biani, KOTA GBIA Nzapa ti ala aye ti mu iri ti ala na nduzu, ti ne ala, ti sara titene ala wara gonda ahon tanga ti amara so kue lo sara ala. Lo ye titene ala ga azo ti lo wani so ayeke nde si ayeke nzoni kue, tongana ti so lo tene na ala.