Read La Bible en Sango courant – Mbeti ti Nzapa Ndia ti fani use ni 9 Bible Online

Ndia ti fani use ni 9 - La Bible en Sango courant – Mbeti ti Nzapa bible

Ndia ti fani use ni 9

¹Moïse atene: Azo ti Israel, ala ma! Fadeso ala ga nduru ti fâ ngu ti Jourdain awe. Ala yeke gue ti tumba azo ti amara nde so awu mingi si ala yeke ngangu mingi ahon ala. Ala yeke gue ti mu akota gbata ti amara ni so angangu gbagba ayeke na tere ni si ayo ngbii akpo le ti nduzu.

²Ala yeke tumba azo ti mara ti Anak, azo ti mara so ayeke ayongoro zo mingi si ala yeke ngangu mingi. Ala azo ti Israel, ala hinga tënë ti ala nzoni, azo ayeke tene tënë ti ala, atene: “Zo wa laa alingbi ti gbu le ni na *ahale ti Anak ni, zo wa?”

³Alingbi ala hinga laso atene, *KOTA GBIA Nzapa ti ala wani laa ayeke tambula na dawa ti ala tongana wâ so ayeke gbi ndo kue. Fade lo yeke kinda azo ni na dawa ti ala si lo yeke nika ala. Ala azo ti Israel, ala yeke tumba azo ni si ala yeke fâ ala kue ti hunzi ala gi hio tongaso, alingbi na zendo so KOTA GBIA amu na ala.

⁴Tongana KOTA GBIA Nzapa ti ala atumba ande azo ti amara ni na dawa ti ala, ala pika kate ti ala pepe, atene: “Ndali ti mbirimbiri ti e laa KOTA GBIA asara titene e mu sese ni si aga ti e!” Me KOTA GBIA atumba amara ni so na dawa ti ala, azo ti Israel, ngbanga ti so sarango ye ti amara ni ayeke sioni.

⁵Ala azo ti Israel, tongana ala wara lege ti mu sese ti azo ti mara ni titene aga ti ala, ayeke ngbanga ti mbirimbiri ti ala pepe wala ayeke ngbanga ti so be ti ala ayeke mbirimbiri. Me KOTA GBIA ayeke tumba azo ni, ngbanga ti so sarango ye ti ala ayeke sioni. Lo yeke tumba nga azo ni ti sara si zendo so lo mu ando na akotara ti ala Abraham, Isaac na Jacob aga taa-tënë.

⁶Alingbi ala hinga atene, KOTA GBIA Nzapa ti ala ayeke mu ande sese ni na ala titene aga ti ala, me ayeke ndali ti mbirimbiri ti ala pepe. Biani, ala yeke azo ti ngangu li!

⁷Moïse atene: Ala azo ti Israel, alingbi ala dabe ti ala na ye so: ala zia lani ngonzo na be ti *KOTA GBIA Nzapa ti ala na benyama. Alingbi be ti ala agirisa na ni laoko pepe! Ti londo na lango so ala sigigi na Ezipte si ala ga ngbii asi ge so, ala tomboka na tere ti KOTA GBIA lakue.

⁸Na hoto ti Horeb, ala zia ngonzo mingi na be ti KOTA GBIA, asara si lo ye lani ti fâ ala kue.

⁹Mbi gue na li ti hoto ni ti mu akpangbara têne so a su atënë ti *mbuki na le ni, mbuki so KOTA GBIA asara lani na ala so. Mbi ngba na li ti hoto ni lango baleosio na bi baleosio; mbi te kobe pepe, mbi nyon ngu pepe.

¹⁰KOTA GBIA amu na mbi akpangbara têne use so lo wani, lo su na le ni atënë ti ndia ti lo kue. Lo tene lani atënë ti ndia ni na ala na ya ti wâ, na ndembe so ala bongbi na gbe ti hoto ni.

¹¹Na peko ti lango baleosio na bi baleosio so, KOTA GBIA amu na mbi akpangbara têne use so, akpangbara têne so a su atënë ti mbuki na le ni.

¹²Na pekoni, KOTA GBIA atene na mbi: “Mo londo ge, mo zu hio, ngbanga ti so azo ti mo so mo sara si ala sigigi na Ezipte so, ala sara siokpari so ayeke sioni mingi. Lege so lani mbi fa na ala, ala do ni hio azia awe. Ala mu lôro, ala kporo ni si asara na mbeni yanda!”

¹³KOTA GBIA akiri atene na mbi: “Mbi baa azo ni awe, ala yeke azo ti ngangu li!

¹⁴Mo zia na mbi lege: mbi ye ti fâ ala kue, mbi ye ti zi iri ti ala biani biani na ndö ti sese so. Na pekoni, na lege ti mo, mbi yeke sara titene mbeni ngangu mara abaa gigi, mbeni mara so ayeke kota ahon mara ti azo ti Israel.”

¹⁵Tongaso mbi londo na li ti hoto ni, mbi zu; andaa hoto ni kue gi wâ. Akpangbara têne use so a su atënë ti mbuki na le ni ayeke na maboko ti mbi.

¹⁶Mbi baa so ala sara siokpari biani ti ke KOTA GBIA Nzapa ti ala: ala mu lôro, ala kporo ni si asara na bagara ndali ti ala wani. Gi hio tongaso, lege so KOTA GBIA afa na ala, ala do ni azia.

¹⁷Ndani laa, mbi mu akpangbara têne use so, mbi bo na sese si mbi fâ ya ni na le ti ala.

¹⁸Moïse atene: Na pekoni, mbi ti na sese na gbe ti KOTA GBIA. Mbi ngba na ndo so lango baleosio na bi baleosio tongana ti kozoni; mbi te kobe pepe, mbi nyon ngu pepe. Mbi sara ye so ndali ti siokpari so kue ala sara: ala sara ye so ayeke sioni mingi na le ti KOTA GBIA, ala zia ngonzo mingi na be ti lo.

¹⁹Mbeto asara mbi ndali ti ngonzo ti KOTA GBIA na sioni ngonzo ti lo. Biani, ngonzo ti lo alondo tongana wâ na tere ti ala si lo ye ti fâ ala kue ti hunzi ala. Me ti so ni, KOTA GBIA akiri ama sambela ti mbi.

²⁰Sioni ngonzo ti KOTA GBIA alondo nga na tere ti Aaron si lo ye ti fâ lo, me mbi sambela nga ndali ti Aaron na lango ni so.

²¹Mbi mu bagara so ala sara so, ye ti peko ti siokpari ti ala ni, mbi bi ni na le ti wâ. Na pekoni, mbi fâ ya ni nduru nduru, mbi nika ni si aga fuku. Mbi tuku fuku ni na ya ti ngu so alondo na li ti hoto si ayeke sua.

²²Lani so ala yeke na Tabera, na Masa, na Kibrot-Taava, ala zia nga ngonzo na be ti KOTA GBIA.

²³Na Kades-Barnea, KOTA GBIA atokua ala lani si lo tene na ala: “Ala gue, asara bira si ala mu sese so mbi mu titene aga ti ala.” Me ala ke ti sara ye alingbi na yanga so KOTA GBIA Nzapa ti ala amu. Ala zia be ti ala na ndö ti lo pepe, ala ke ti ma yanga ti lo.

²⁴Ngbene ye so mbi hinga ala, ala sara gi ngangu li na KOTA GBIA ngbii asi laso.

²⁵So KOTA GBIA aye ti fâ ala kue, mbi ti na sese na gbe ti lo. Mbi ngba na ndo so lango baleosio na bi baleosio.

²⁶Mbi sambela lo, mbi tene: “Kota Gbia NZAPA, mo fâ azo ti mo kue pepe, ala ga ye ti mo awe; mo zi ala na lege ti kota ngangu ti mo, mo sara si ala sigigi na Ezipte na lege ti ngangu ti maboko ti mo.

²⁷Ayeke nzoni mo dabe ti mo na azo ti kua ti mo Abraham, Isaac na Jacob. Mo baa ndo na ngangu li ti azo so pepe; mo baa ndo na sioni ye ti ala nga na siokpari ti ala pepe.

²⁸Tongana mo fâ azo ti mo kue, fade azo ti kodro so mo sara si e sigigi na ya ni so ayeke tene: ‘KOTA GBIA alingbi lani pepe ti sara si azo ti lo ali na sese so lo mu lani zendo ni na ala’, wala ala tene: ‘Lo ye ala pepe; lo sara si ala sigigi gi titene ala kui na ya ti benyama.’

²⁹Andaa ala yeke azo ti mo, ala ga ye ti mo awe. Mo sara si ala sigigi na lege ti kota ngangu ti mo nga na lege ti maboko ti mo so mo yoro.”