Read La Bible en Sango courant – Mbeti ti Nzapa Jean 10 Bible Online

Jean 10 - La Bible en Sango courant – Mbeti ti Nzapa bible

Jean 10

¹Jésus atene: “Biani, mbi tene na ala taa-tënë: zo so ali na ya ti gbagba ti ataba na yanga ti gbagba ni pepe, me lo li na mbeni lege nde, andaa lo yeke zo ti nzi si lo yeke sioni zo.

²Zo so ali na taa yanga ti gbagba ni ayeke wabatango-taba.

³Wabatango yanga ti gbagba ni azi yanga ni na lo, ataba ni ama go ti lo. Lo iri ataba ti lo na iri ti ala oko oko si lo sigigi na ala.

⁴Tongana lo sigigi na ala kue awe, lo hon na li ni si ala mu peko ti lo, ngbanga ti so ala hinga go ti lo.

⁵Ala yeke mu peko ti mbeni zo nde laoko pepe. Tongana ayeke mbeni zo nde, ala yeke kpe lo, ngbanga ti so ala hinga go ti zo ni pepe.”

⁶Jésus atene na ala toli so, me ala ma ya ni pepe.

⁷Jésus akiri atene: “Biani, mbi tene na ala taa-tënë: mbi laa mbi yeke yanga ti gbagba ti ataba ni.

⁸Azo so kue aga kozo ti mbi ayeke azo ti nzi na asioni zo; me ataba ni ama yanga ti ala pepe.

⁹Mbi yeke yanga ti gbagba ni. Zo so ali na lege ti mbi, fade lo yeke soo kuâ; lo yeke li, lo yeke sigigi si lo yeke wara kobe ti tengo ni.

¹⁰Zo ti nzi aga ti lo gi ti nzi ye, ti fâ ye, ti buba ye. Ti mbi, mbi ga ti sara si azo aduti na fini si fini so awu ahon ndoni.

¹¹Mbi yeke nzoni wabatango-taba. Nzoni wabatango-taba ayeke ka fini ti lo ndali ti ataba ti lo.

¹²Me ti zo so ayeke taa wabatango-taba pepe si lo yeke sara gi kua ndali ti nginza, ataba ni ayeke ti lo pepe. Tongana lo baa mbo ti ngonda na gango ni, lo zia ataba ni, lo kpe. Tongaso mbo ti ngonda agbu ataba ni si lo tumba ala kirikiri.

¹³Zo so ayeke sara kua gi ndali ti nginza ayeke bata ataba ni nzoni pepe.

¹⁴Mbi yeke nzoni wabatango-taba. Mbi hinga ataba ti mbi si ala nga, ala hinga mbi,

¹⁵tongana ti so Babâ ahinga mbi si mbi hinga Babâ. Mbi yeke ka fini ti mbi ndali ti ataba ti mbi.

¹⁶Ambeni taba ti mbi ayeke na ya ti gbagba ti ataba so pepe. Alingbi mbi fa na ala lege; fade ala yeke ma go ti mbi si ala kue aga bongbi oko ti ataba na wabatango-taba oko.

¹⁷Babâ ti mbi aye mbi, ngbanga ti so mbi yeke ka fini ti mbi si mbi yeke kiri ti wara ni.

¹⁸Mbeni zo laa ayeke zi fini ti mbi pepe, me mbi wani laa mbi yeda ti ka ni. Mbi yeke na ngangu ti ka ni, mbi yeke nga na ngangu ti kiri ti wara ni. Babâ ti mbi amu yanga na mbi ti sara tongaso.”

¹⁹Na ndö ti tënë so, popo ti azuife akiri akangbi.

²⁰Ambeni zo mingi na popo ti ala atene: “Sioni yingo ayeke na ya ti lo! Li ti lo aga kirikiri awe! Ala yeke ma lo ngbanga ti nyen?”

²¹Ambeni atene ti ala: “Zo so sioni yingo ayeke na ya ti lo ayeke tene amara ti tënë tongaso pepe! Sioni yingo alingbi ti zi le ti waziba?”

²²Ngoi ti de asi awe. Na Jérusalem, azo ayeke sara matanga ti ziango kota da ti Nzapa nde.

²³Na ya ti kota da ti Nzapa, Jésus ayeke tambula, lo si kâ, lo si ge na gbe ti veranda so a iri ni Veranda ti Salomon.

²⁴Azuife abongbi na tere ti lo, ala hunda lo, atene: “Mo ye e ku mo ngbii asi lawa si mo tene na e taa-tënë so? Tongana mo yeke *Mesii ni, tene na e polele ma!”

²⁵Jésus akiri tënë na ala, atene: “Mbi tene na ala awe, me ala yeda na ni pepe. Aye so mbi yeke sara na iri ti Babâ ti mbi ayeke tene tënë na ndö ti mbi.

²⁶Me ala ma na be pepe, ngbanga ti so ala yeke na popo ti ataba ti mbi pepe.

²⁷Ataba ti mbi ahinga go ti mbi; mbi hinga ala si ala yeke mu peko ti mbi.

²⁸Mbi yeke mu na ala fini so angba lakue lakue; ala yeke kui ande laoko pepe, zo oko alingbi ti gboto ala na maboko ti mbi pepe.

²⁹Babâ ti mbi so amu ala na mbi, lo yeke kota ahon ye kue; zo oko ayeke na ngangu ti gboto ala na maboko ti Babâ pepe.

³⁰Mbi na Babâ, e yeke oko.”

³¹Tongaso azuife akiri amu têne ti bo na Jésus.

³²Lo hunda ala, lo tene: “Na dawa ti ala, mbi sara anzoni ye mingi so alondo na Babâ. Ti so wa laa ala ye ti bo mbi na têne ngbanga ni so?”

³³Azuife akiri tënë, atene: “E ye ti bo mo ngbanga ti mbeni nzoni ye ni pepe, me ngbanga ti so mo zonga Nzapa: mo yeke gi zo senge, me mo ye ti sara tere ti mo Nzapa!”

³⁴Jésus akiri tënë na ala, atene: “Na ya ti mbeti ti *Ndia ti ala, Nzapa atene: ‘Ala yeke anzapa.’

³⁵E hinga so, tënë so Mbeti ti Nzapa atene, zo alingbi ti mingo ni pepe. Andaa azo so Nzapa atene tënë ti ala ge so ayeke azo senge, me mbeti ti Ndia airi ala anzapa.

³⁶Me ti mbi, Babâ ti mbi azia mbi nde si lo tokua mbi na ndö ti dunia so. Ngbanga ti nyen laa ala tene: ‘Mo yeke zonga Nzapa!’ Ngbanga ti so mbi tene: ‘Mbi yeke Molenge ti Nzapa’ so?

³⁷Tongana mbi sara pepe aye so Babâ ti mbi amu na mbi ti sara, ayeke nzoni ala yeda na tënë ti mbi pepe!

³⁸Me tongana mbi yeke sara ni, ataa ala yeda na tënë ti mbi pepe, ayeke nzoni ala yeda na aye so mbi yeke sara si ala hinga so mbi na Babâ, e ga oko.”

³⁹Ala kiri agi lege ti gbu Jésus, me lo kpe na maboko ti ala, lo hon.

⁴⁰Jésus akiri ague na mbage ti ngu ti Jourdain, na ndo so Jean abatize azo kozoni daa si lo duti kâ.

⁴¹Azo mingi aga na tere ti lo; ala tene na lo: “Jean asara aye ti kpene oko pepe, me atënë so kue Jean atene na ndö ti koli so ayeke taa-tënë.”

⁴²Kâ, azo mingi ama na be na Jésus.