Read La Bible en Sango courant – Mbeti ti Nzapa Jean 11 Bible Online

Jean 11 - La Bible en Sango courant – Mbeti ti Nzapa bible

Jean 11

¹Mbeni koli so iri ti lo Lazare ayeke na kobela. Lo yeke lango na kete kodro ti Betanii, kodro ti Marie na ti ita ti lo Marthe.

²— Marie ayeke wali so atuku lani yombo na ndö ti gere ti *Kota Gbia Jésus si lo mbo ni na kua ti li ti lo. Ita ti lo Lazare laa ayeke na kobela so. —

³A-ita ti Lazare ti wali atokua na Jésus, atene: “Kota Gbia, zo so mo ye lo mingi so, tere ti lo ayeke so.”

⁴So Jésus ama tënë ni, lo tene: “Kobela ti Lazare so ayeke fâ lo pepe; me ayeke sara si azo agonda Nzapa. Na lege ti kobela so si azo ayeke gonda ande Molenge ti Nzapa.”

⁵Jésus aye Marthe na ita ti lo ti wali nga na Lazare.

⁶So Jésus ama tënë ti kobela ti Lazare, lo kiri lo ngba lango use na ndo so lo yeke daa.

⁷Na pekoni, lo tene na adisiple: “E kiri na sese ti Judée.”

⁸Adisiple akiri tënë na lo, atene: “Wafango-ye, na ya ti alango so ahon, azuife so kâ agi lege ti bo mo na têne. Mo ye ti kiri kâ?”

⁹Jésus atene na ala: “Ti londo na ndaperere ngbii asi na lakui, lâ ayeke su na ya ti ngbonga baleoko na use pepe? Zo so ayeke tambula na kota lâ, lo yeke pika gere ti lo pepe, ngbanga ti so lo yeke baa ndo polele.

¹⁰Me tongana zo atambula na bi, lo yeke pika gere ti lo, ngbanga ti so ndo avuko na le ti lo.”

¹¹Na peko ti tënë so, Jésus atene na ala: “Lazare so e na lo, e ye tere, alango awe; me mbi yeke gue ti zingo lo.”

¹²Adisiple akiri tënë, atene: “Kota Gbia, tongana lo lango, fade kobela ti lo ayeke kai senge.”

¹³Andaa Jésus ayeke tene tënë ti kuâ ti Lazare, me adisiple abaa ti ala atene, lo yeke tene tënë ti senge lango so zo ayeke lango.

¹⁴Tongaso Jésus atene na ala polele, atene: “Lazare akui awe.

¹⁵Mbi yeke na ngia ndali ti ala, ngbanga ti so mbi yeke fade kâ pepe, tongaso si ala lingbi ti ma na be na mbi. Me e gue na tere ti lo.”

¹⁶Thomas, so mbeni iri ti lo ayeke Ngbo, atene na amba ti lo adisiple: “E nga, e na Jésus e gue si e na lo kue, e kui!”

¹⁷Na singo ti Jésus, lo ma a tene, Lazare asara lango osio na du ti kuâ awe.

¹⁸Betanii ayeke nduru na Jérusalem, ayo nduru na kilometere ota.

¹⁹Nilaa azuife mingi aga ti baa Marthe na Marie ti zi vundu na be ti ala na peko ti kuâ ti ita ti ala.

²⁰So Marthe ama a tene, Jésus ayeke ga, lo gue na lege ti lo. Marie angba ti duti na da.

²¹Marthe atene na Jésus: “*Kota Gbia, tongana mo yeke fade na ndo so, ka ita ti mbi akui pepe!

²²Me mbi hinga so Nzapa ayeke mu na mo ye so kue mo yeke hunda na lo.”

²³Jésus atene na lo: “Fade ita ti mo ayeke zingo na kuâ.”

²⁴Marthe akiri tënë, atene: “Mbi hinga so, lo yeke zingo na kuâ na lango ti ndani.”

²⁵Jésus atene na lo: “Mbi yeke zingongo ti akuâ, mbi yeke fini. Zo so ama na be na mbi, ataa lo kui, fade lo yeke duti na fini.

²⁶Zo so kue ayeke na fini si lo ma na be na mbi, lo yeke kui laoko pepe. Mo ma na be na tënë so?”

²⁷Marthe akiri tënë, atene: “Biani, Kota Gbia! Mbi ma na be so mo yeke *Mesii, Molenge ti Nzapa so aga na dunia so.”

²⁸So Marthe atene tënë so na Jésus awe, lo kiri, lo iri ita ti lo Marie si lo tene na ya ti mê ti lo, lo tene: “Wafango-ye ayeke na ndo so, lo iri mo.”

²⁹Gi so Marie ama tënë so, lo londo hio si lo gue ti wara Jésus na lege.

³⁰Andaa Jésus ade ti li na ya ti kodro ni pepe, me lo ngba gi na ndo so Marthe awara fade lo daa.

³¹Azuife ayeke na tere ti Marie na da, ala yeke gi ti zi vundu na be ti lo. So ala baa lo na sigingo ni na loro, ala londo si ala mu peko ti lo. Ala baa ti ala atene, lo yeke gue na du ti kuâ ti toto.

³²Marie ague, asi na ndo so Jésus ayeke daa. So Marie abaa Jésus, lo ti na gbe ti lo si lo tene na lo: “*Kota Gbia, tongana mo yeke fade na ndo so, ka ita ti mbi akui pepe!”

³³So Jésus abaa Marie na azuife so ague na peko ti lo kue na toto, vundu agbu lo si be ti lo ayeke na siriri pepe.

³⁴Lo hunda ala, lo tene: “Ala lu lo na ndo wa?” Ala tene na lo: “Kota Gbia, ga, mo baa.”

³⁵Jésus atoto.

³⁶Azuife ni atene: “Ala baa yengo so lo ye na Lazare!”

³⁷Me ambeni atene ti ala: “Lo so lo zi le ti waziba so, lo lingbi fade pepe ti kanga lege na Lazare ti kui?”

³⁸Vundu akiri agbu be ti Jésus si lo gue na du ti kuâ ni. Du ti kuâ ni ayeke na ya ti mbeni kota du ti têne si a kanga yanga ni na mbeni kota têne.

³⁹Lo mu yanga na ala, lo tene: “Ala zi têne ni!” Marthe, ita ti kuâ ni, atene: “*Kota Gbia, kuâ ti lo ni ato nda ti fun awe. Lo sara lango osio awe.”

⁴⁰Jésus akiri tënë na lo, atene: “Mbi tene fade na mo, mbi tene: ‘Tongana mo ma na be, fade mo yeke baa gonda ti Nzapa!’ ”

⁴¹Tongaso ala zi têne ni. Jésus ayo le ti lo na nduzu si lo tene: “Babâ, mbi mu singila na mo, ngbanga ti so mo ma mbi awe.

⁴²Mbi hinga so, mo yeke ma mbi lakue, me mbi yeke tene tënë so titene azo so ayeke na tere ti mbi ge so alingbi ti ma na be so mo laa mo tokua mbi.”

⁴³Na peko ti tënë so, Jésus adekongo, lo tene: “Lazare, sigigi!”

⁴⁴Tongaso Lazare asigigi, maboko ti lo na gere ti lo angba na kangango ni na ya ti abongo so a lu lo na ni; bongo so a kanga na le ti lo angba na le ti lo. Jésus atene na azo ni: “Ala zi abongo ni na tere ti lo, ala zia lo, lo gue.”

⁴⁵Azuife mingi so aga ti baa Marie, so ala baa ye so Jésus asara, ambeni mingi ama na be na lo.

⁴⁶Me ambeni ague, abaa *afarizien si ala fa na ala peko ti ye so Jésus asara.

⁴⁷Tongaso afarizien na akota wayango-sandaga airi *Kota Bongbi ti Fango Ngbanga, ala tene: “Fade e yeke sara nyen? Koli so ayeke sara aye ti kpene mingi!

⁴⁸Tongana e ngba ti baa lo bango na aye so lo yeke sara so, fade azo kue ayeke ma na be na lo si akota zo ti Rome ayeke ga ti buba kota da ti Nzapa ti e nga na mara ti e!”

⁴⁹Mbeni oko na popo ti ala so iri ti lo Kaife, ayeke kota wayango-sandaga na ngu ni so; lo tene: “Li ti ala ayeke daa pepe!

⁵⁰Ala gbu li ti ala si! Ayeke nzoni zo oko akui ndali ti azo ni si a buba mara ni kue pepe.”

⁵¹Andaa tënë so lo tene so alondo na lo wani pepe; me ndali ti so lo yeke kota wayango-sandaga na ngu ni so, lo tene gi peko ti tënë ti yanga ti Nzapa ti fa so Jésus ayeke kui ngbanga ti mara ti azuife.

⁵²Lo yeke kui gi ngbanga ti mara so oko pepe, me lo yeke kui nga ti bongbi amolenge ti Nzapa so ayeke na ando nde nde si ala ga tere oko.

⁵³Ti londo na lango ni so, amakonzi ti azuife aleke tënë ti fâ Jésus.

⁵⁴Tongaso Jésus ake ti hon na le ti azuife polele. Lo gboto tere ti lo si lo gue na mbage ti benyama, na mbeni gbata so iri ni Efraim, lo na adisiple ti lo aduti kâ.

⁵⁵Andaa matanga ti azuife so ayeke *Pake aga nduru awe. Azo mingi alondo na akete kodro, ague na Jérusalem ti *sukula sioni ti ala kozoni si ala sara matanga ni.

⁵⁶Ala yeke gi Jésus. So ala yeke na ya ti kota da ti Nzapa, ala tene na popo ti ala: “Ala baa ti ala tongana nyen? Lo yeke ga ande na matanga ni oko pepe!”

⁵⁷Akota wayango-sandaga na afarizien amu yanga, atene: “Tongana mbeni zo ahinga ndo so Jésus ayeke daa, lo tene tënë ni si a lingbi ti gbu lo.”