Read La Bible en Sango courant – Mbeti ti Nzapa Jean 18 Bible Online

Jean 18 - La Bible en Sango courant – Mbeti ti Nzapa bible

Jean 18

¹Na peko ti sambela so, Jésus na adisiple ti lo ague na mbage ti ngu ti Sedron. Mbeni ndo so a lu akeke daa ayeke kâ si Jésus na adisiple ti lo ague kâ.

²Judas, zo ti kango Jésus, ahinga ndo ni, ngbanga ti so Jésus na adisiple ti lo abongbi kâ lege mingi.

³Judas amu li ti mbeni bongbi ti aturugu na awabatango kota da ti Nzapa si ala gue na ndo ni so; akota wayango-sandaga na *afarizien laa atokua ala. Ala mu aye ti bira na alamba na wâ ti pere.

⁴Jésus ahinga fade ye so kue ayeke si ande na lo. Nilaa lo gue nduru na ala si lo hunda ala, lo tene: “Ala yeke gi zo wa?”

⁵Ala kiri tënë na lo, atene: “E yeke gi Jésus, zo ti Nazaret.” Lo kiri tënë, lo tene: “Mbi laa.” Andaa Judas, zo ti kango Jésus ayeke na popo ti azo ni.

⁶So Jésus atene na ala, atene: “Mbi laa”, ala kiri na peko si ala ti na sese.

⁷Jésus akiri ahunda ala, atene: “Ala yeke gi zo wa?” Ala tene na lo: “E yeke gi Jésus, zo ti Nazaret.”

⁸Jésus atene na ala: “Mbi tene fade na ala, mbi tene: ‘Mbi laa.’ Tongana mbi laa ala yeke gi mbi, ala zia tanga ti azo ni ague!”

⁹Ye ni asi si tënë so Jésus atene lani alingbi ti ga taa-tënë, lo tene: “Babâ, azo so mo mu ala na mbi, mbi girisa mbeni oko pepe”.

¹⁰Andaa yongoro zeme ayeke na maboko ti Simon Pierre. Lo gboto ni, lo de na zo ti kua ti kota wayango-sandaga si lo fâ mê ti lo ti mbage ti koli. Iri ti zo ti kua ni ayeke Malkus.

¹¹Me Jésus atene na Pierre: “Kiri na yongoro zeme ti mo na ya ti bozo ni. Kopo ti pasi so Babâ amu na mbi so, mo baa ti mo, mo tene, mbi yeke nyon ni ande pepe?”

¹²Tongaso, bongbi ti aturugu ni na makonzi ti ala nga na awabatango kota da ti Nzapa ti azuife agbu Jésus, akanga lo.

¹³Ala gue na lo kozoni na Hane, babâ ti wali ti Kaife so ayeke kota wayango-sandaga na ngu ni so.

¹⁴Andaa Kaife laa amu lani wango na amakonzi ti azuife, atene: “Ayeke nzoni zo oko akui ndali ti azo ni.”

¹⁵Simon Pierre na mbeni disiple amu peko ti Jésus. Kota wayango-sandaga ahinga disiple ni so nzoni, nilaa disiple ni ali na peko ti Jésus na ya ti gbagba ti kota wayango-sandaga ni.

¹⁶Me Pierre angba ti lo na gigi nduru na yanga ti gbagba ni. Mbeni disiple ni, lo so kota wayango-sandaga ahinga lo so, asigigi, lo tene tënë na wali so ayeke bata yanga ti gbagba ni si lo zia lege na Pierre ti li.

¹⁷Wali so ayeke bata yanga ti gbagba ni atene na Pierre: “Mo nga, mo yeke mbeni disiple ti koli so-aa!” Pierre abere, atene: “Ên-en! Mbi yeke disiple ti lo pepe.”

¹⁸Andaa de ayeke sara, nilaa azo ti kua na aturugu asara wâ si ala yeke duti na tere ni ti tumba de na tere ti ala. Pierre nga ague, aluti na popo ti ala titene tere ti lo amu wâ.

¹⁹Kota wayango-sandaga ahunda Jésus na tënë na ndö ti adisiple ti lo nga na ndö ti ye so lo yeke fa.

²⁰Jésus akiri tënë, atene: “Mbi yeke fa ye na azo kue polele; lakue mbi yeke fa ye na ya ti ada ti sambelango Nzapa nga na ya ti kota da ti Nzapa, na ndo so azuife kue ayeke bongbi daa. Mbi tene mbeni tënë na hondengo ni pepe.

²¹Ngbanga ti nyen laa mo kiri mo hunda mbi na tënë? Mo hunda azo so ama tënë ti mbi: atënë so mbi tene na ala, ala hinga ni nzoni.”

²²So Jésus atene tënë so, mbeni turugu so ayeke kâ apika ngbangba ti lo si atene na lo: “Lege ti kiringo tënë na kota wayango-sandaga laa?”

²³Jésus akiri tënë na lo, atene: “Tongana mbi tene mbeni sioni tënë, mo fa ni; me tongana mbi tene tënë nzoni, ngbanga ti nyen laa mo pika mbi?”

²⁴Andaa Jésus angba na ya ti kamba si Hane atokua lo na kota wayango-sandaga Kaife.

²⁵Na ndembe so Simon Pierre angba ti luti kâ titene tere ti lo amu wâ, mbeni zo ahunda lo, atene: “Mo nga, mo yeke mbeni disiple ti koli so pepe?” Pierre abere, atene: “Ên-en, mbi yeke disiple ti lo pepe.”

²⁶Mbeni zo ti kua ti kota wayango-sandaga so lo yeke zo ti sewa ti koli so Pierre afâ mê ti lo, ahunda Pierre, atene: “Mbi baa mo na lo na ndo so a lu akeke daa so; so mvene?”

²⁷Pierre akiri abere. Gi hio tongaso, koli-kondo atoto.

²⁸Na ndaperere, ala mu Jésus na ndo ti Kaife, ague na lo na da ti govoronere. Amakonzi ti azuife ali na da ni pepe, ngbanga ti so ala ye ti bata tere ti ala *nzoni si ala lingbi ti te kobe ti *Pake.

²⁹Pilate asigigi, lo gue na mbage ti ala si lo hunda ala, lo tene: “Ala yeke bi tënë na li ti koli so ngbanga ti nyen?”

³⁰Ala kiri tënë na lo: “Tongana lo sara fade sioni pepe, ka e ga na lo na mo?”

³¹Pilate atene na ala: “Ala mu lo, ala wani afâ ngbanga na li ti lo na lege ti ndia ti ala.” Ala kiri tënë: “A mu lege na e ti fâ zo pepe.”

³²Ye ni asi si tënë so Jésus atene na ndö ti mara ti kuâ so fade lo yeke kui aga taa-tënë.

³³Pilate ali na da si lo iri Jésus, lo hunda lo: “Mo yeke gbia ti azuife?”

³⁴Jésus akiri tënë na lo: “Tënë so mo hunda so, alondo na be ti mo wani wala ambeni zo laa atene tënë ni na ndö ti mbi na mo?”

³⁵Pilate akiri tënë na lo, atene: “Mbi yeke zuife? Azo ti mara ti mo na akota wayango-sandaga laa amu mo aga na mo na mbi. Nyen laa mo sara?”

³⁶Jésus akiri tënë na lo: “Kodro-gbia ti mbi ayeke ti dunia so pepe. Tongana kodro-gbia ti mbi ayeke fade ti dunia so, ka azo ti mbi atiri bira ti kanga lege si azo aga na mbi na amakonzi ti azuife pepe. Me fadeso, kodro-gbia ti mbi ayeke ti ndo so ge pepe.”

³⁷Pilate ahunda lo, atene: “Ye ni, mo yeke gbia?” Jésus akiri tënë: “Gi tënë ni laa mo tene awe so: mbi yeke gbia. A du mbi si mbi ga na dunia so ti fa ye na ndö ti taa-tënë na azo. Zo so ayeke zo ti taa-tënë, fade lo yeke ma tënë ti mbi.”

³⁸Pilate ahunda lo, atene: “Taa-tënë ayeke nyen?” Na pekoni, Pilate akiri asigigi, lo gue, lo wara azuife si lo tene na ala: “Mbi wara ti mbi mbeni tënë oko pepe ti fâ ngbanga na li ti koli so ndali ni.

³⁹Me na lege ti sarango ye ti kodro ti ala, lakue na *matanga ti Pake, mbi yeke zi mbeni zo ti kanga oko. Ala ye mbi zi na ala gbia ti azuife?”

⁴⁰Azo ni ato nda ti dekongo, atene: “Ên-en, lo pepe! Me Barabas!” Andaa Barabas ayeke mbeni sioni zo.