Read La Bible en Sango courant – Mbeti ti Nzapa Jean 19 Bible Online

Jean 19 - La Bible en Sango courant – Mbeti ti Nzapa bible

Jean 19

¹Tongaso Pilate amu yanga titene a gue na Jésus si a pika lo na fimbo.

²Aturugu amu akamba ti ki aleke ni tongana kpoto ti gbia si ala zia na li ti lo; ala yu na lo mbeni kota bengba bongo.

³Ala ga nduru na tere ti lo si ala tene: “E bara mo, gbia ti azuife!” Ala yeke pika ngbangba ti lo.

⁴Pilate akiri asigigi si lo tene na azuife: “Ala baa, lo laa mbi yeke sigigi na lo na ala so. Ayeke nzoni ala hinga so mbi wara ti mbi mbeni tënë oko pepe ti fâ ngbanga na li ti koli so ndali ni.”

⁵Tongaso Jésus asigigi na kpoto ti ki ni na li ti lo, na kota bengba bongo ni na tere ti lo. Pilate atene na ala: “Baa, koli ni laa!”

⁶So akota wayango-sandaga na aturugu ti kota da ti Nzapa abaa Jésus, ala dekongo, atene: “Fâ lo na ndö ti keke ti kroa! Fâ lo na ndö ti keke ti kroa!” Pilate atene na ala: “Ala wani amu lo, afâ lo na ndö ti keke ti kroa ni. Mbi wara ti mbi mbeni tënë oko pepe ti fâ ngbanga na li ti lo ndali ni.”

⁷Azuife akiri tënë na lo: “Mbeni ndia ti e ayeke daa; na lege ti ndia ni so, lo lingbi na kuâ, ngbanga ti so lo tene, ni yeke Molenge ti Nzapa.”

⁸So Pilate ama tënë so, mbeto agbu lo ahon ndoni.

⁹Lo kiri lo li na da si lo hunda Jésus, lo tene: “Mo londo ti mo na ndo wa?” Me Jésus akiri tënë na lo pepe.

¹⁰Tongaso, Pilate atene na lo: “Taa mbi laa mo ke ti zi yanga na mbi? Ayeke nzoni mo hinga, mo tene, mbi yeke na ngangu ti zi mo, mbi yeke nga na ngangu ti mu yanga titene a fâ mo na ndö ti keke ti kroa.”

¹¹Jésus akiri tënë na lo: “Mo yeke na ngangu na ndö ti mbi pepe, gi ngangu so Nzapa amu na mo. Ndani laa zo so azia mbi na maboko ti mo so, kungba ti siokpari ti lo ane ahon ti mo.”

¹²Ti londo na ndembe ni so, Pilate ayeke gi lege ti zi Jésus, me azuife akiri adekongo, atene: “Tongana mo zi lo, andaa mo yeke zo ti kota gbia ti Rome pepe! Zo so kue atene, ni yeke gbia, andaa lo ke kota gbia ti Rome awe!”

¹³So Pilate ama tënë so, lo hunda titene a sigigi na Jésus. Pilate aduti na ndö ti mbata ti lo ti fango ngbanga, na ndo so iri ni “Litostrotos”; a iri ni na yanga ti hebro “Gabata”.

¹⁴Andaa lango ni so ayeke lango ti lekengo tere ndali ti *matanga ti Pake. Nduru na bekombite, Pilate atene na azuife: “Baa, gbia ti ala laa!”

¹⁵Ala kiri adekongo, atene: “Fâ lo! Fâ lo! Fâ lo na ndö ti keke ti kroa!” Pilate ahunda ala, atene: “Ala ye mbi fâ gbia ti ala na ndö ti keke ti kroa?” Akota wayango-sandaga akiri tënë, atene: “E yeke na mbeni gbia nde pepe, gi kota gbia ti Rome oko!”

¹⁶Tongaso Pilate azia Jésus na maboko ti ala titene ala gue, afâ lo na ndö ti keke ti kroa. Ala mu Jésus ahon na lo.

¹⁷Lo wani, lo yo keke ti kroa ti lo, lo sigigi si lo gue na ndo so ala iri ni “Ndo-ti-abio-ti-li”; a iri ni na yanga ti hebro “Golgota.”

¹⁸Kâ laa aturugu akanga Jésus na ndö ti keke ti kroa. Ala kanga nga ambeni koli use na ndö ti akeke ti kroa, oko na mbage, oko na mbage; Jésus ayeke na popo ti ala.

¹⁹Pilate amu yanga titene a su mbeti si a kanga na li ti keke ti kroa ni. Mbeti ni atene: “Jésus, zo ti Nazaret, gbia ti azuife.”

²⁰Ndo so a kanga Jésus na ndö ti keke ti kroa daa so ayo na gbata ni pepe, nilaa azuife mingi adiko mbeti ni. A su mbeti ni na yanga ti hebro, na greke nga na laten.

²¹Akota wayango-sandaga ti azuife atene na Pilate: “Mo su mbeti ni pepe, mo tene: ‘Gbia ti azuife’, me mo su ni, mo tene: ‘Koli so atene, ni yeke gbia ti azuife.’ ”

²²Pilate akiri tënë, atene: “Ye so mbi su na mbeti awe, mbi su awe!”

²³So aturugu akanga Jésus na ndö ti keke ti kroa awe, ala mu abongo ti lo si ala kangbi ya ni osio, zo oko oko na ti lo. Ala mu nga yongoro bongo ti lo so a fu ni fungo pepe, me ti londo na nduzu asi na gbeni, a leke ni gi le ni oko tongana mapia-bongo.

²⁴Aturugu ni atene na popo ti ala: “E suru ya ti bongo ni pepe, me e bi *dee ti hinga zo so ayeke wara ni.” Ye so asi si tënë ti Mbeti ti Nzapa aga taa-tënë; tënë ni atene: “Ala kangbi ya ti abongo ti mbi na popo ti ala si ala bi dee ti hinga zo so ayeke mu yongoro bongo ti mbi.” Ye so aturugu asara laa.

²⁵Mama ti Jésus, na ita ti mama ti lo, na Marie, wali ti Klopas nga na Marie ti kodro ti Magdala ayeke luti nduru na tere ti keke ti kroa ti Jésus.

²⁶Jésus abaa mama ti lo na mbeni disiple ti lo so lo ye lo mingi, ala yeke luti kâ. Tongaso Jésus atene na mama ti lo: “Wali, baa, molenge ti mo laa.”

²⁷Na pekoni, lo tene na disiple ni: “Baa, mama ti mo laa.” Ti londo na ndembe ni so, disiple ni amu mama ti Jésus na da ti lo.

²⁸Na pekoni, Jésus ahinga atene, fadeso ye kue ahunzi awe. Ti sara si tënë ti Mbeti ti Nzapa aga taa-tënë, lo tene: “Nzara ti ngu asara mbi!”

²⁹Mbeni ta ayeke kâ so kpingo vin ayeke na ya ni. Aturugu amu ndokoro ayoro na ya ti kpingo vin ni, ala kanga na li ti mbeni kete keke ti *izope, ala zia ni na yanga ti Jésus.

³⁰Jésus anyon kpingo vin ni si na pekoni, lo tene: “Ye kue ahunzi awe!” Lo ba li ti lo na sese si lo kui.

³¹Lango ni ayeke lango ti lekengo tere ndali ti *lango ti wungo tere. Azuife aye ka titene akuâ angba na ndö ti akeke ti kroa na lango ti wungo tere pepe. Andaa lango ti wungo tere ni ayeke mbeni kota lango mingi. Tongaso ala gue, ahunda Pilate ti mu yanga titene a kungbi agere ti akoli so a kanga ala na ndö ti akeke ti kroa so si ala zi akuâ ni na ndö ti akeke ti kroa ni.

³²Aturugu ague, akungbi agere ti kozo zo ni si ala kungbi nga agere ti use zo so a kanga ala na ndö ti keke ti kroa na tere ti Jésus so.

³³Me so ala si na Jésus, ala baa so lo kui awe, nilaa ala kungbi agere ti lo pepe.

³⁴Mbeni turugu akpo kate ti Jésus na likongo, gi hio tongaso, mene na ngu asigigi daa.

³⁵Zo so abaa ye ni na le ti lo so, lo laa lo yeke fa peko ti tënë ni, tënë so lo yeke tene ayeke taa-tënë. Lo hinga so, lo yeke tene taa-tënë, tongaso si ala nga, ala lingbi ti ma na be.

³⁶Ye so asi titene tënë ti Mbeti ti Nzapa aga taa-tënë; tënë ni atene: “Fade bio ti lo oko ayeke kungbi pepe.”

³⁷Mbeni tënë so a su ayeke so: “Lo so ala kpo lo so, fade azo ayeke baa lo.”

³⁸Na pekoni, Joseph, mbeni zo ti gbata ti Arimate ague, ahunda Pilate ti mu kuâ ti Jésus. — Joseph ayeke mbeni disiple ti Jésus, me lo mu peko ti lo na hondengo ni, ngbanga ti so mbeto ti amakonzi ti azuife asara lo. — Pilate ayeda. Tongaso Joseph ague, amu kuâ ni.

³⁹Nikodeme so ague lani na bi ti baa Jésus, lo na Joseph laa aga. Lo mu mbeni yombo so a bongbi *mire na aloes si asara na ni; lo ga na ni kilo baleota.

⁴⁰Akoli use so amu kuâ ti Jésus, ala kanga na bongo, ala zia yombo daa tongana ti so azuife ayeke sara lakue ti lu na akuâ ti ala.

⁴¹Mbeni ndo so a lu akeke daa ayeke nduru na ndo so a fâ Jésus daa na ndö ti keke ti kroa so; mbeni fini du ti kuâ ayeke kâ so ade ti lu zo daa pepe.

⁴²Ala lu Jésus na ya ti du ti kuâ ni, ngbanga ti so ndo ni ayo pepe si lango ni ayeke lango ti lekengo tere ndali ti *lango ti wungo tere.