Read La Bible en Sango courant – Mbeti ti Nzapa Jean 2 Bible Online

Jean 2 - La Bible en Sango courant – Mbeti ti Nzapa bible

Jean 2

¹Lango use na pekoni, mbeni matanga ti mungo tere ti koli na wali aduti na kete kodro ti Kana, na sese ti Galile. Mama ti Jésus ayeke kâ.

²A tisa nga Jésus na adisiple ti lo na matanga ni.

³Na ndembe so vin ahunzi awe, mama ti Jésus atene na lo: “Azo ni ayeke na vin mbeni pepe.”

⁴Jésus akiri tënë na lo, atene: “Wali, ti mo daa nyen? Ngbonga ti mbi ade alingbi pepe.”

⁵Tongaso mama ti Jésus atene na azo ti kua ni, atene: “Ala sara ye so kue lo yeke hunda na ala.”

⁶Kâ, ambeni kota ta ti sese omene ayeke daa. Azuife ayeke to ngu na ya ni ti *sukula sioni na tere ti ala. Ta oko alingbi ti mu litere nduru na ngbangbo oko.

⁷Jésus atene na azo ti kua ni: “Ala tuku ngu na ya ti ata ni, asi.” Ala tuku ngu na ya ti ata ni, asi.

⁸Jésus atene na ala: “Ala to mbeni ngu ni, ague na ni na kota zo ti li ti matanga ni.” Ala to ngu ni, ague na ni.

⁹Kota zo ti li ti matanga ni atara ngu ni, andaa aga vin awe. Lo hinga ndo so vin ni alondo daa si aga pepe. Me gi azo ti kua so ato ngu ni laa ahinga tënë ni. Tongaso lo iri koli ti mungo wali ni

¹⁰si lo tene na lo: “Azo kue ayeke mu ka nzoni vin na azo kozoni, ala nyon alingbi na ala awe si na pekoni, ala mu na ala vin so ayeke nzoni kete. Me ti mo, mo bata nzoni vin ni ngbii asi na ndembe so!”

¹¹Lege so Jésus asara kozo ye ti kpene na Kana, mbeni kodro ti Galile laa. Lo fa gonda ti lo si adisiple ti lo ama na be na lo.

¹²Na pekoni, Jésus ague na Kapernaum, lo na mama ti lo, a-ita ti lo na adisiple ti lo. Ala lango kâ gi kete.

¹³Matanga ti azuife so iri ni *Pake aga nduru awe, tongaso Jésus ague na Jérusalem.

¹⁴Na ya ti kota da ti Nzapa, lo wara azo ti kango abagara, ataba na *ambipa; lo wara nga azo so aduti na tere ti meza si ala yeke sanze nginza.

¹⁵Tongaso lo mu akamba, lo leke na fimbo si lo tumba ala na ataba ti ala na abagara ti ala na gigi. Lo tuku nginza ti azo ti sanzengo nginza na sese, lo kinda nga na sese ameza ti ala.

¹⁶Lo tene na azo ti kango ambipa ni, lo tene: “Ala zi aye so kue, ahon na ni! Ala sara si da ti Babâ ti mbi aga ndo ti dengo buze pepe!”

¹⁷Adisiple ti lo adabe ti ala na tënë so Mbeti ti Nzapa atene: “Nzapa, fade nzara ti da ti mo ayeke gbi mbi tongana wâ.”

¹⁸Amakonzi ti azuife ahunda lo, atene: “Ye ti kpene wa laa mo yeke sara ti fa na e so, Nzapa laa amu na mo lege ti sara ye so?”

¹⁹Jésus akiri tënë na ala, atene: “Ala kungbi kota da ti Nzapa so na sese, fade na ya ti lango ota, mbi yeke kiri ti leke ni na nduzu.”

²⁰Azuife ahunda lo, atene: “Kota da ti Nzapa so e sara ni na ya ti ngu baleosio na omene, mo tene ti mo, mo tene, mo yeke leke ni na ya ti lango ota?”

²¹Andaa kota da ti Nzapa so lo yeke tene tënë ni so, ayeke tere ti lo wani.

²²Na ndembe so Jésus azingo na kuâ awe, adisiple ti lo adabe ti ala na atënë so lo tene na ala si ala ma na be na Mbeti ti Nzapa nga na atënë so Jésus atene.

²³So Jésus ayeke na Jérusalem, na *matanga ti Pake, azo mingi abaa aye ti kpene so lo sara si ala ma na be na lo.

²⁴Me Jésus azia be ti lo na ndö ti ala pepe, ngbanga ti so lo hinga ala kue.

²⁵Mbeni zo alingbi ti fa peko ti tënë na Jésus na ndö ti zo pepe, ngbanga ti so lo hinga tënë ti be ti zo nzoni mingi.