Read La Bible en Sango courant – Mbeti ti Nzapa Jean 21 Bible Online

Jean 21 - La Bible en Sango courant – Mbeti ti Nzapa bible

Jean 21

¹Na pekoni, Jésus akiri asi na adisiple ti lo na yanga ti kota ngu ti Tiberiade. Lege so Jésus asi na ni ayeke so:

²Simon Pierre, Thomas — so a iri lo Ngbo — , Natanael, zo ti kodro ti Kana na Galile, amolenge ti Zebede na ambeni disiple use kue abongbi na ndo oko.

³Simon Pierre atene na amba ti lo: “Mbi yeke gue ti gi susu.” Ala tene na lo: “E na mo, e gue.” Tongaso ala gue, ako na ya ti ngo si ala hon. Me na bi ni kue, ala wara susu oko pepe.

⁴So ndo ahan awe, Jésus aluti na yanga ti ngu ni, me adisiple ti lo ahinga pepe, atene lo laa.

⁵Lo hunda ala, lo tene: “Tongana nyen amolenge, ala gbu susu pepe?” Ala kiri tënë na lo, atene: “E gbu susu pepe.”

⁶Lo tene na ala: “Ala bi gbanda ni na mbage ti maboko ti koli, fade ala yeke gbu asusu.” Tongaso ala bi gbanda ni, me ala gboto ni na gigi gbaa, ngbanga ti so ala gbu asusu mingi.

⁷Disiple so Jésus aye lo mingi so atene na Pierre: “*Kota Gbia laa!” So Pierre ama a tene, so Kota Gbia laa, lo yu bongo ti lo, ngbanga ti so lo zi ni. Na pekoni, lo huru lo ti na ya ti ngu.

⁸Ambeni disiple ni akiri na ngo ni na yanga ti ngu si ala yeke gboto gbanda ni so asi singo na asusu. Ala yeke fade yongoro na yanga ti ngu ni pepe, ala yeke nduru na metere ngbangbo oko.

⁹So ala si na yanga ti ngu ni, ala baa ambeni le ti wâ, susu ayeke na ndö ni; ala baa nga mapa.

¹⁰Jésus atene na ala: “Ala ga na ambeni susu so ala gbu so.”

¹¹Simon Pierre ako na ya ti ngo si lo gboto gbanda ni lo sigigi na ni: akota susu so wungo ti ala ayeke ngbangbo oko na baleoku na ota ayeke na ya ni. Ataa so asusu ni ayeke mingi ahon ndoni, gbanda ni asuru pepe.

¹²Jésus atene na ala: “Ala ga, ate ye.” Mbeni disiple oko ti hunda lo: “Mo yeke zo wa?” ayeke daa pepe, ngbanga ti so ala hinga atene, so Kota Gbia laa.

¹³Tongaso Jésus ague, lo mu mapa si lo kangbi ni na ala; lo kangbi nga asusu ni.

¹⁴Lege ota titene Jésus asi na adisiple ti lo na peko ti zingongo ti lo na kuâ laa.

¹⁵Na peko ti kobe ni, Jésus ahunda Simon Pierre, atene: “Simon, molenge ti Jean, mo ye mbi ahon ala so?” Simon akiri tënë: “Biani, *Kota Gbia, mo hinga so mbi ye mo.” Jésus atene na lo: “Bata akete taba ti mbi!”

¹⁶Jésus akiri ahunda lo ti fani use ni, atene: “Simon, molenge ti Jean, mo ye mbi?” Pierre akiri tënë na lo: “Biani, Kota Gbia, mo hinga so mbi ye mo.” Jésus atene na lo: “Bata ataba ti mbi!”

¹⁷Jésus akiri ahunda lo ti fani ota ni, atene: “Simon, molenge ti Jean, mo ye mbi?” Vundu asara Pierre, ngbanga ti so Jésus ahunda lo fani ota, atene: “Mo ye mbi?” Tongaso lo tene na Jésus: “Kota Gbia, mo hinga ye kue, mo hinga so mbi ye mo!” Jésus atene na lo: “Bata ataba ti mbi.

¹⁸Biani, mbi tene na mo taa-tënë: na ndembe so mo de maseka, mo wani laa mo yeke kanga kamba ti ndö ti bongo ti mo si mo yeke gue na ndo so kue be ti mo aye. Me tongana mo ga mbakoro awe, fade mo yeke yoro maboko ti mo si mbeni zo nde ayeke kanga kamba ti ndö ti bongo ti mo si lo yeke gue na mo na ndo so be ti mo aye pepe.”

¹⁹Jésus atene tënë so ti fa mara ti kuâ so Pierre ayeke kui ande na ni si fade Nzapa ayeke wara gonda na lege ti kuâ ni. Na pekoni, Jésus atene na lo: “Mu peko ti mbi!”

²⁰Pierre abaa ndo na peko si lo baa disiple so Jésus aye lo mingi, lo so na ndembe ti tengo kobe aba tere ti lo na mbage ti Jésus si ahunda lo, atene: “*Kota Gbia, zo wa laa ayeke ka mo so?”

²¹So Pierre abaa lo, lo hunda Jésus, lo tene: “Kota Gbia, ti lo so, nyen laa ayeke si ande na lo?”

²²Jésus akiri tënë na lo: “Tongana mbi ye titene lo ngba ngbii mbi ga, ti mo daa nyen? Ti mo, mo mu peko ti mbi!”

²³Gi na ndö ti tënë so laa azo ti Christ atene na popo ti ala atene, disiple so ayeke kui ande pepe. Me Jésus atene na disiple ni pepe, atene: “Fade lo yeke kui pepe”. Andaa tënë so Jésus atene ayeke so: “Tongana mbi ye titene lo ngba ngbii mbi ga, ti mo daa nyen?”

²⁴Disiple ni so laa abaa aye ni, lo fa peko ni si lo su tënë ni na mbeti. E hinga so, tënë so lo tene ayeke taa-tënë.

²⁵Ambeni ye mingi ayeke daa so Jésus asara. Tongana a su ni oko oko kue na mbeti, mbi baa mbi tene, dunia kue alingbi ti wara ndo pepe ti zia ambeti ni daa.