Read La Bible en Sango courant – Mbeti ti Nzapa Jean 5 Bible Online

Jean 5 - La Bible en Sango courant – Mbeti ti Nzapa bible

Jean 5

¹Na pekoni, mbeni matanga ti azuife ayeke daa si Jésus ague na Jérusalem.

²Na Jérusalem, nduru na yanga ti gbagba ti gbata ni so iri ni Ti-ataba, mbeni ngu ayeke daa, iri ni na yanga ti hebro ayeke Betzata. Averanda oku ayeke na tere ti ngu ni.

³Gba ti azo ti kobela alango na gbe ti averanda ni: awaziba, azo so gere ti ala abuba na azo so mbeni mbage ti tere ti ala abuba. [Ala yeke ku ndembe so ngu ni ayeke yingi,

⁴ngbanga ti so na ambeni ngoi, mbeni *ange ti *Kota Gbia ayeke zu na ya ti ngu ni ti yingi ni. Zo ti kobela so ayeke zu kozo na ya ti ngu ni na peko ti so ngu ni ayingi, ataa kobela ti lo ni ayeke nyen, kobela ni ayeke kai.]

⁵Mbeni koli ayeke kâ so lo yeke na kobela asara ngu baleota na miombe.

⁶Jésus abaa lo yeke lango na sese, lo ma a tene, kobela ti lo aninga mingi si lo hunda lo, atene: “Mo ye tere ti mo aga nzoni?”

⁷Zo ti kobela ni akiri tënë na lo, atene: “Kota Gbia, na ndembe so ngu ni ayeke yingi, mbeni zo ti bi mbi na ya ni ayeke daa pepe. Tongana mbi londo ti gue, mbeni zo ali daa kozo ti mbi awe.”

⁸Jésus atene na lo: “Londo, mo mu konza ti mo, mo tambula!”

⁹Gi hio tongaso, tere ti koli ni aga nzoni si lo mu konza ti lo, lo tambula. Andaa, lango ni so ayeke *lango ti wungo tere.

¹⁰Tongaso azuife atene na koli so tere ti lo aga nzoni so, atene: “Laso ayeke lango ti wungo tere; *Ndia ake na mo ti yo konza ti mo ti tambula na ni.”

¹¹Me koli so akiri tënë na ala, atene: “Koli so asara si tere ti mbi aga nzoni so laa atene na mbi, atene: ‘Mu konza ti mo, mo tambula.’ ”

¹²Ala hunda lo, atene: “Zo wa laa atene na mo, atene: ‘Mu konza ti mo, mo tambula’ so?”

¹³Koli so tere ti lo aga nzoni so ahinga lo pepe, ngbanga ti so Jésus asigigi na popo ti gba ti azo so ayeke kâ si lo hon ti lo.

¹⁴Na pekoni, Jésus atengbi na koli ni na ya ti kota da ti Nzapa si lo tene na lo: “Tere ti mo aga nzoni fadeso awe. Kiri mo sara siokpari pepe, ngbanga ti fade mbeni ye ti sioni asi na mo ahon ti kozo.”

¹⁵Koli ni ague, lo tene na amakonzi ti azuife, lo tene: “Jésus laa asara si tere ti mbi aga nzoni.”

¹⁶Nilaa ala to nda ti gi Jésus na tënë, ngbanga ti so lo sara ye so na lango ti wungo tere.

¹⁷Me Jésus akiri tënë na ala: “Babâ ti mbi ayeke sara kua lakue, mbi nga, mbi yeke sara kua.”

¹⁸Na ndö ti tënë so, amakonzi ti azuife ayeke gi lege ngangu ti fâ Jésus, ngbanga ti so lo ke ti kpe ndia ti lango ti wungo tere si na ndö ni, lo kiri lo tene, Nzapa ayeke taa Babâ ti ni; so aye ti fa atene, lo yeke legeoko na Nzapa.

¹⁹Jésus amu tënë si lo tene na ala: “Biani, mbi tene na ala taa-tënë: Molenge ni ayeke sara ye ti be ti lo wani pepe, lo yeke sara gi ye so lo baa Babâ ti lo na sarango ni. Ye so kue Babâ asara, Molenge ni nga ayeke sara,

²⁰ngbanga ti so Babâ aye Molenge ti lo si lo fa na Molenge ni aye so kue lo yeke sara. Fade lo yeke fa na Molenge ni ambeni ye ti sarango ni so ayeke kota ahon so si fade li ti ala azo, akpe.

²¹Tongana ti so Babâ ayeke zingo akuâ si lo yeke mu na ala fini, Molenge nga ayeke mu fini na zo so be ti lo aye.

²²Babâ ayeke fâ ngbanga na li ti zo oko pepe, me lo zia fango ngbanga ni kue na maboko ti Molenge ni

²³si azo kue alingbi ti ne Molenge ni tongana ti so ala yeke ne Babâ. Zo so ane Molenge ni pepe, andaa lo so Babâ atokua lo, lo ne lo pepe.

²⁴“Biani, mbi tene na ala taa-tënë: zo so ama tënë ti mbi si lo ma na be na lo so atokua mbi, lo yeke na fini so angba lakue lakue. A yeke fâ ngbanga na li ti lo pepe, me lo sigigi na ya ti kuâ awe si lo yeke na fini.

²⁵Biani, mbi tene na ala taa-tënë: mbeni ngbonga ayeke ga si ngbonga ni alingbi awe so akuâ ayeke ma go ti Molenge ti Nzapa si ala so ama go ni ayeke kiri ti duti na fini.

²⁶Babâ ni ayeke na ngangu ti mu fini na zo, Molenge ni nga ayeke na ngangu ti mu fini na zo, ngbanga ti so Babâ amu na lo ngangu ni awe.

²⁷Tongaso lo mu ngangu ti fango ngbanga na Molenge ni, ngbanga ti so Molenge ni ayeke *Molenge ti Zo.

²⁸Nilaa, ayeke nzoni li ti ala azo, akpe pepe, ngbanga ti so ngbonga ni ayeke ga so, azo so ayeke na ya ti du ti kuâ ayeke ma go ti lo

²⁹si ala yeke zingo na kuâ. Azo so asara aye ti nzoni, fade ala yeke zingo na kuâ ti kiri ti duti na fini; me azo so asara aye ti sioni, ala yeke zingo na kuâ titene a fâ ngbanga na li ti ala.

³⁰Mbi lingbi ti sara ye ti be ti mbi wani pepe. Mbi yeke fâ ngbanga gi na lege ti tënë so mbi ma. Ngbanga ti mbi ayeke na legeni, ndali ti so mbi yeke gi ti sara ye ti be ti mbi wani pepe, me ye so be ti lo so atokua mbi aye.”

³¹“Tongana mbi tene fade tënë na ndö ti mbi wani, ka tënë ti mbi ayeke taa-tënë pepe.

³²Me mbeni zo nde laa ayeke tene tënë na ndö ti mbi. Mbi hinga so, tënë so lo yeke tene na ndö ti mbi ayeke taa-tënë.

³³Ala, amakonzi ti azuife, lani ala tokua azo na Jean si Jean atene na ala tënë na ndö ti taa-tënë.

³⁴Ti mbi, mbi yeke gi titene zo atene tënë na ndö ti mbi pepe; me mbi yeke tene tënë so si ala lingbi ti soo kuâ.

³⁵Jean ayeke lani tongana lamba so aza si ndo avuru. Ala azo, ala yeda ti sara ngia kete na gbe ti wâ ni.

³⁶Me ambeni ye ayeke daa so atene tënë na ndö ti mbi ahon ti Jean. Aye ni ayeke aye so Babâ wani amu na mbi ti sarango ni; mbi yeke sara aye ni si aye ni ayeke fa so Babâ laa atokua mbi.

³⁷Babâ so atokua mbi ayeke tene nga tënë na ndö ti mbi. Ala de ti ma go ti lo laoko pepe, ala de ti baa nga le ti lo laoko pepe.

³⁸Tënë ti lo angba na be ti ala pepe, ngbanga ti so ala ma na be na zo so lo tokua lo so pepe.

³⁹Ala yeke gi nda ti Mbeti ti Nzapa, ngbanga ti so ala baa ti ala atene na lege ni, ala yeke wara fini so angba lakue lakue. Andaa gi Mbeti so laa ayeke tene tënë na ndö ti mbi!

⁴⁰Me ala azo, ala ye ti ga na mbi pepe ti wara taa fini.

⁴¹“Mbi yeke gi titene azo agonda mbi pepe.

⁴²Me mbi hinga ala: na be ti ala, ala ye Nzapa pepe.

⁴³Mbi ga na iri ti Babâ ti mbi, me ala ke ti yamba mbi. Tongana mbeni zo nde aga fade na iri ti lo wani, ka ala yeke yamba lo!

⁴⁴Ala ye titene amba ti ala laa agonda ala si ala nga agonda amba ti ala; me gonda so alondo na Nzapa oko, ala ye ti gi ni pepe. Fade ala lingbi ti ma na be tongana nyen?

⁴⁵Ala baa ti ala atene, mbi laa mbi yeke bi tënë na li ti ala na gbe ti Babâ? Oko pepe. Moïse, lo so ala zia be ti ala na ndö ti lo, lo laa lo yeke bi tënë na li ti ala.

⁴⁶Tongana ala yeda fade na tënë ti Moïse biani, ka ala yeda nga na tënë ti mbi, ngbanga ti so Moïse asu mbeti na ndö ti mbi.

⁴⁷So ala yeda na tënë so lo su na mbeti pepe so, fade ala yeda na tënë ti mbi tongana nyen?”