Read La Bible en Sango courant – Mbeti ti Nzapa Jean 6 Bible Online

Jean 6 - La Bible en Sango courant – Mbeti ti Nzapa bible

Jean 6

¹Na pekoni, Jésus amu lege, lo gue na mbage ti kota ngu ti Galile, so mbeni iri ni Tiberiade.

²Gba ti azo amu peko ti lo, ngbanga ti so ala baa aye ti kpene so lo sara ti kai kobela na tere ti azo.

³Tongaso Jésus ague na li ti mbeni hoto; kâ, lo na adisiple ti lo aduti.

⁴Andaa *Pake, so ayeke matanga ti azuife, aga nduru awe.

⁵So Jésus amu le ti lo na nduzu, lo baa gba ti azo ayeke ga na peko ti lo. Tongaso lo hunda Philippe, lo tene: “Fade e yeke wara kobe na ndo wa ti vo si alingbi na azo so kue?”

⁶— Jésus ahunda tënë so ti tara gi be ti Philippe. Andaa lo hinga ye so lo leke na be ti lo ti sara. —

⁷Philippe akiri tënë na lo: “Ataa e yeke na ale ti nginza ngbangbo use, so ayeke lingbi ande ti vo na kobe si zo oko oko awara kete ate?”

⁸Mbeni disiple ti lo oko so iri ti lo André, ita ti Simon Pierre, atene:

⁹“Mbeni kete molenge-koli ayeke ge, lo yeke na asusu use na mapa oku so a sara na farini ti *orze. Me so ayeke lingbi na azo gbani gbani so tongana nyen?”

¹⁰Jésus atene: “Ala tene na azo ni kue ti duti.” Pere ayeke na ndo ni so mingi. Azo ni aduti; li ti akoli kue aga nduru na saki oku.

¹¹Tongaso Jésus amu amapa ni, lo mu singila na Nzapa si lo kangbi ni na azo so aduti. Lo kangbi nga asusu ni na ala, zo oko oko ate alingbi na nzara ti lo.

¹²So ya ti azo ni asi awe, Jésus atene na adisiple ti lo: “Ala ro anduru kobe so angba so, ala sara si mbeni oko agirisa pepe.”

¹³Adisiple aro ni si asi sakpa baleoko na use: so ayeke tanga ti amapa oku so azo ni ate si angba so; a sara mapa ni na farini ti orze.

¹⁴So ala baa ye ti kpene so Jésus asara, azo ni atene: “Koli so ayeke taa Wayanga-Nzapa, lo so azo atene tënë ti gango ti lo na dunia so!”

¹⁵Jésus ahinga atene, azo ni aye ti ga ti mu lo na ngangu ti sara si lo ga gbia. Nilaa lo gboto tere ti lo, lo gue, lo duti na ndö ti hoto gi lo oko.

¹⁶Na lakui, adisiple ti Jésus ague na yanga ti kota ngu.

¹⁷Ala ko na ya ti mbeni ngo si ala yeke fâ ngu ti gue na Kapernaum so ayeke na mbage ti ngu ni. Ndo avuko awe, me Jésus ade ti kiri na tere ti ala pepe.

¹⁸Mbeni ngangu pupu aya si ayeke yingi ngu ni ngangu.

¹⁹So ala gue na ngo ni ngbii asi kilometere oku wala omene, ala baa Jésus ayeke tambula na le ti ngu si lo yeke ga nduru na ngo ti ala. Mbeto agbu ala.

²⁰Me Jésus atene na ala: “Ala sara mbeto pepe, so mbi laa!”

²¹Ala ye ti mu lo na ya ti ngo ni, me ngo ni asi na ndo so ala ye ti gue daa awe si agbu sese.

²²Lango oko na pekoni, gba ti azo so angba na mbage ti ngu ni abaa so, gi ngo oko laa ayeke kâ. Ala hinga so Jésus ako na ya ti ngo legeoko na adisiple ti lo pepe; gi adisiple oko laa ahon.

²³Me ambeni ngo nde alondo na gbata ti Tiberiade asi na ndo so *Kota Gbia amu mapa, lo mu singila na Nzapa si azo ate so.

²⁴So gba ti azo ni abaa so Jésus na adisiple ti lo ayeke kâ pepe, ala ko na ya ti ango ni si ala gue ti gi lo na Kapernaum.

²⁵Azo ni awara Jésus na mbage ti ngu ni si ala hunda lo, atene: “Wafango-ye, mo si ge lawa?”

²⁶Jésus akiri tënë na ala: “Biani, mbi tene na ala taa-tënë: ala yeke gi mbi ngbanga ti aye ti kpene so ala baa so pepe, me ngbanga ti so ala te mapa ngbii ya ti ala asi.

²⁷Ayeke nzoni ala sara kua ndali ti kobe so ayeke buba pepe, me ndali ti kobe so ayeke ngba si ayeke mu na zo fini so angba lakue lakue. *Molenge ti Zo laa ayeke mu ande na ala kobe ni so, ngbanga ti so Babâ, lo so lo yeke Nzapa wani laa amu na lo ngangu ni.”

²⁸Ala hunda lo, atene: “Nyen laa e lingbi ti sara tongana e ye ti sara kua ti Nzapa?”

²⁹Jésus akiri tënë na ala: “Kua so Nzapa ahunda na ala ti sarango ni ayeke ti ma na be na zo so lo tokua lo.”

³⁰Ala kiri tënë na lo, atene: “Nyen laa mo yeke sara titene e baa si e ma na be na mo? Ye so mo yeke sara ande ayeke nyen?

³¹Ando na benyama, akotara ti e ate *mane. Mbeti ti Nzapa atene: ‘Lo mu na ala mapa so alondo na yayu si ala te.’ ”

³²Me Jésus akiri tënë na ala, atene: “Biani, mbi tene na ala taa-tënë: mapa so alondo na yayu, Moïse laa amu na ala pepe; me Babâ ti mbi laa amu na ala taa mapa ti yayu,

³³ndali ti so mapa ti Nzapa ayeke zo so alondo na yayu, lo zu si lo yeke mu fini na azo ti dunia.”

³⁴Ala tene na lo: “*Kota Gbia, mu na e mapa ni so lakue!”

³⁵Jésus atene na ala: “Mbi laa mbi yeke mapa so ayeke mu fini na zo. Zo so aga na mbi, fade nzara ti kobe ayeke sara lo laoko pepe; zo so ama na be na mbi, fade nzara ti ngu ayeke sara lo laoko pepe.

³⁶Mbi tene na ala awe: ala baa mbi, me ala ma na be pepe.

³⁷Azo so kue Babâ amu ala na mbi, fade ala yeke ga na mbi; zo so aga na mbi, fade mbi yeke zia lo na gigi oko pepe.

³⁸Mbi londo na yayu, mbi ga na ndo so ti sara ye ti be ti mbi pepe, me ti sara ye so be ti lo so atokua mbi aye.

³⁹Ye so be ti lo so atokua mbi aye, ayeke so: na popo ti azo so lo mu ala na mbi, mbi girisa mbeni zo oko pepe, me lo ye si mbi zingo ala kue na kuâ na lango ti ndani.

⁴⁰Ye so be ti Babâ ti mbi aye ayeke so: zo so kue abaa Molenge ni si ama na be na lo, lo yeke na fini so angba lakue lakue; fade mbi, mbi yeke zingo lo na kuâ na lango ti ndani.”

⁴¹Azuife ato nda ti kasa Jésus, ngbanga ti so lo tene: “Mbi yeke mapa so alondo na yayu si aga.”

⁴²Ala hunda tere ti ala, atene: “So Jésus, molenge ti Joseph, so e hinga babâ ti lo na mama ti lo so laa pepe? Tongana nyen laa fadeso lo tene: ‘Mbi londo na yayu si mbi ga so?’”

⁴³Jésus akiri tënë na ala, atene: “Ala zia ti kasa ndo!

⁴⁴Tongana Babâ so atokua mbi airi mbeni zo pepe, zo ni alingbi ti ga na mbi pepe. Tongana zo ni aga na mbi, fade mbi yeke zingo lo na kuâ na lango ti ndani.

⁴⁵Awayanga-Nzapa asu na mbeti, atene: ‘Fade Nzapa ayeke fa ye na azo kue.’ Zo so ama tënë ti Babâ si lo yeda ti manda ye so Babâ afa na lo, zo tongaso laa ayeke ga na mbi;

⁴⁶so ti tene pepe mbeni zo abaa Babâ awe. Gi zo so alondo na Nzapa aga, lo laa lo baa Babâ.”

⁴⁷Biani, mbi tene na ala taa-tënë: “Zo so ama na be, lo yeke na fini so angba lakue lakue.

⁴⁸Mbi yeke mapa so ayeke mu fini na zo.

⁴⁹Ando na benyama, akotara ti ala ate mane, me ala kui.

⁵⁰Me mapa so alondo na yayu si aga, zo so ate ni, fade lo yeke kui pepe.

⁵¹Mbi yeke mapa so ayeke mu fini na zo, mapa so alondo na yayu si aga. Zo so ate mapa so, fade lo yeke ngba na fini lakue lakue. Mapa so mbi yeke mu ande ayeke tere ti mbi so ayeke sara titene azo ti dunia awara fini.”

⁵²Na ndö ti tënë so, azuife apapa na popo ti ala ngangu si ala tene: “Koli so alingbi ti mu tere ti lo na e ti te tongana nyen?”

⁵³Jésus atene na ala: “Biani, mbi tene na ala taa-tënë: tongana ala te tere ti *Molenge ti Zo pepe si ala nyon nga mene ti lo pepe, fade ala yeke duti na taa fini pepe.

⁵⁴Zo so ate tere ti mbi si anyon mene ti mbi, lo yeke na fini so angba lakue lakue. Fade mbi yeke zingo lo na kuâ na lango ti ndani,

⁵⁵ngbanga ti so tere ti mbi ayeke taa kobe si mene ti mbi ayeke taa ye ti nyongo ni.

⁵⁶Zo so ate tere ti mbi si anyon mene ti mbi, zo so mbi na lo, e yeke duti oko laa.

⁵⁷Babâ ti mbi so atokua mbi, lo yeke na fini; na lege ti lo laa mbi yeke na fini. Nilaa, zo so ate tere ti mbi, lo yeke ngba na fini na lege ti mbi.

⁵⁸Baa, mapa so alondo na yayu si aga laa: mapa ni ayeke nde na ti so akotara ti ala ate ando. Akotara ti ala akui, me zo so ate kobe so, lo yeke ngba na fini lakue lakue.”

⁵⁹Aye so Jésus afa na ya ti da ti sambelango Nzapa na Kapernaum laa.

⁶⁰Na mango atënë so, mingi ti adisiple ti Jésus atene: “Tënë so ayeke ngangu mingi! Zo wa laa alingbi ti yeda na ni?”

⁶¹Me Jésus ahinga so, adisiple ti lo ayeke kasa lo na gbe ti go ti ala ngbanga ti tënë so. Ndani laa lo hunda ala, lo tene: “Tënë so aso be ti ala?

⁶²Ala yeke tene ande nyen na ndembe so *Molenge ti Zo ayeke kiri na yayu, na ndo so lo yeke daa kozoni so?

⁶³Yingo ti Nzapa laa ayeke mu fini na zo; zo alingbi ti wara fini na ngangu ti lo wani pepe. Atënë so mbi tene na ala ayeke tënë ti Yingo na tënë ti fini.

⁶⁴Me ambeni zo na popo ti ala ama na be pepe.” Biani, Jésus ahinga ngbene ye na tongo nda ni azo so ama na be pepe nga na zo so ayeke ka ande lo.

⁶⁵Lo kiri lo tene: “Ndani laa, mbi tene na ala, tongana Babâ amu lege na mbeni zo pepe, zo ni alingbi ti ga na mbi pepe.”

⁶⁶Gi na peko ti tënë so, mingi ti adisiple ti Jésus agboto tere ti ala si ala kiri ague na peko ti lo pepe.

⁶⁷Tongaso Jésus ahunda adisiple baleoko na use, atene: “Ala nga, ala ye ti gue pepe?”

⁶⁸Simon Pierre akiri tënë na lo: “*Kota Gbia, e yeke gue ti e ande na zo wa? Atënë so ayeke mu na zo fini so angba lakue lakue, ayeke gi na yanga ti mo oko.

⁶⁹E ma na be si e hinga so, mo yeke zo ti nzoni kue so Nzapa azia mo nde si lo tokua mo.”

⁷⁰Jésus akiri tënë na ala, atene: “Mbi laa mbi soro ala so baleoko na use so pepe? Andaa mbeni zo oko na popo ti ala ayeke ti lo mbeni zabolo!”

⁷¹Jésus ayeke tene tënë ti Judas, molenge ti Simon Iskariote. Judas ayeke mbeni oko ti adisiple baleoko na use; lo laa lo yeke ka ande Jésus.