Read La Bible en Sango courant – Mbeti ti Nzapa Jean 7 Bible Online

Jean 7 - La Bible en Sango courant – Mbeti ti Nzapa bible

Jean 7

¹Na pekoni, Jésus atambula na ya ti sese ti Galile; lo ye ti tambula na ya ti sese ti Judée pepe, ngbanga ti so azuife ayeke gi lege ti fâ lo.

²Matanga ti azuife so ayeke matanga ti Akpangba aga nduru awe.

³A-ita ti Jésus atene na lo: “Londo na ndo so, mo gue na Judée si adisiple ti mo nga abaa ye so mo yeke sara.

⁴Tongana zo aye titene azo ahinga lo, lo yeke sara ye na hondengo ni pepe. So mo yeke sara amara ti ye tongaso, sara si azo kue ahinga mo.”

⁵Ataa a-ita ti lo, ala ma na be na lo pepe.

⁶Jésus atene na ala: “Ngbonga ti mbi ade ti lingbi pepe, me ti ala, ngbonga kue ayeke gi nzoni ngbonga.

⁷Azo ti dunia alingbi ti ke ala pepe; me azo ni ake mbi, ngbanga ti so mbi tene tënë na ndö ti ala, mbi tene: aye so ala ayeke sara ayeke sioni.

⁸Ala wani, ala gue na matanga ni! Mbi yeke gue ti mbi na matanga ni pepe, ngbanga ti so ngbonga ti mbi ade ti lingbi pepe.”

⁹Na peko ti tënë so Jésus atene, lo ngba na Galile.

¹⁰So a-ita ti lo ahon na matanga ni awe, Jésus nga ague na matanga ni; me lo gue na hondengo ni si azo abaa lo pepe.

¹¹Amakonzi ti azuife ayeke gi lo na ya ti matanga ni, ala hunda ndo, atene: “Lo yeke na ndo wa?”

¹²Gba ti azo so abongbi kâ ayeke tene tënë ti lo mingi. Ambeni zo ni atene: “Lo yeke nzoni zo”, ambeni atene ti ala: “Mvene, lo yeke handa gba ti azo gi senge senge.”

¹³Me zo ti tenengo tënë ti lo polele ayeke daa pepe, ngbanga ti so mbeto ti amakonzi ti azuife ayeke sara ala.

¹⁴So ala de ti sara matanga ni, Jésus alondo, lo gue na ya ti kota da ti Nzapa si lo yeke fa ye na azo.

¹⁵Li ti amakonzi ti azuife kue akpe si ala tene: “Koli so ahinga aye so tongana nyen, so lo manda mbeti pepe so?”

¹⁶Jésus akiri tënë na ala: “Ye so mbi yeke fa na ala alondo na mbi wani pepe, me alondo na lo so atokua mbi.

¹⁷Zo so aye ti sara ye so be ti Nzapa aye, fade lo yeke hinga atene, ye so mbi yeke fa alondo na Nzapa wala mbi yeke tene gi tënë so alondo na mbi wani.

¹⁸Zo so ayeke tene gi tënë ti be ti lo, lo yeke gi titene azo agonda lo. Me zo so ayeke gi titene azo agonda zo so atokua lo, lo yeke tene gi taa-tënë; tënë ti mvene ayeke na yanga ti lo pepe.

¹⁹Moïse amu ando *Ndia na ala pepe? Me zo oko na popo ti ala abata ndia ni pepe. Ala yeke gi lege ti fâ mbi ngbanga ti nyen?”

²⁰Azo ni kue akiri tënë na lo, atene: “Sioni yingo ayeke na ya ti mo! Zo wa laa ayeke gi lege ti fâ mo?”

²¹Jésus akiri tënë na ala: “Mbi sara gi ye oko si li ti ala kue akpe!

²²Moïse amu ando yanga na ala ti fâ amolenge ti ala ti koli na *ganza. Moïse laa ato nda ti fango ganza pepe, me akotara ti lo laa ato nda ni; nilaa ala yeke fâ azo na ganza, ataa na *lango ti wungo tere kue.

²³Ala yeke fâ amolenge-koli na ganza na lango ti wungo tere ti bata *Ndia ti Moïse. Ngbanga ti nyen laa ala yeke sara ngonzo na tere ti mbi ndali ti so mbi kai kobela ti mbeni zo na lango ti wungo tere?

²⁴Ala fâ ngbanga gi ndali ti le ti zo pepe, me ala fâ ngbanga so ayeke na legeni.”

²⁵Ambeni zo ti Jérusalem ahunda ndo, atene: “Koli so azo ayeke gi lege ti fâ lo so laa pepe?

²⁶Baa, lo yeke tene tënë na le ti azo kue, me mbeni zo ti zi yanga na lo ayeke daa pepe! Amakonzi ti e ayeda biani awe atene, lo yeke *Mesii?

²⁷Tongana Mesii ni aga ande, zo oko ayeke hinga ndo so lo londo daa pepe; me ti koli so, e hinga ndo so lo londo daa.”

²⁸Jésus ayeke fa ye na ya ti kota da ti Nzapa si lo tene tënë na kota go, lo tene: “Ala hinga mbi biani? Ala hinga ndo so mbi londo daa biani? Mbi ga na iri ti mbi wani pepe. Lo so atokua mbi, lo lingbi titene zo azia be ti lo na ndö ti lo; me ala hinga lo pepe.

²⁹Ti mbi, mbi hinga lo, ngbanga ti so mbi londo na lo si mbi ga; lo laa lo tokua mbi.”

³⁰Tongaso, ala gi lege ti gbu Jésus, me zo oko agbu lo pepe, ngbanga ti so ngbonga ti lo ade ti lingbi pepe.

³¹Na popo ti gba ti azo so, ambeni mingi ama na be na lo; ala tene: “Tongana Mesii aga, fade lo yeke sara aye ti kpene ahon ti koli so?”

³²*Afarizien ama atënë so gba ti azo ayeke tene na gbe ti go ti ala na tere ti Jésus. Tongaso akota wayango-sandaga na afarizien atokua aturugu ti gue ti gbu lo.

³³Jésus atene: “Mbi yeke duti kete na popo ti ala si na pekoni, mbi yeke kiri na tere ti lo so atokua mbi.

³⁴Fade ala yeke gi mbi, me ala yeke wara mbi pepe, ngbanga ti so ala lingbi ti si na ndo so mbi yeke duti daa so pepe.”

³⁵Azuife ahunda tere ti ala, atene: “Lo yeke gue ande na ndo wa si e wara lo pepe so? Lo ye ti gue na ndo ti azuife so akangbi tere ti ala na ya ti akodro ti agreke so? Lo yeke gue kâ ti fa ye na agreke ni?

³⁶Lo tene: ‘Fade ala yeke gi mbi, me ala yeke wara mbi pepe, ngbanga ti so ala lingbi ti si na ndo so mbi yeke duti daa so pepe.’ So aye ti tene nyen?”

³⁷Tanga ti lango ti matanga ni ayeke mbeni kota lango mingi. Jésus aluti na nduzu si lo tene tënë na kota go, lo tene: “Tongana nzara ti ngu asara mbeni zo, ayeke nzoni lo ga na mbi, lo nyon ngu.

³⁸Zo so ama na be na mbi, ‘fade ngu so ayeke mu fini na zo ayeke londo na be ti lo ti sua’, tongana ti so Mbeti ti Nzapa afa tënë ni.”

³⁹Jésus ayeke tene tënë ti Yingo-Vuru so fade azo so ama na be na lo ayeke wara. Na ndembe ni so Yingo-Vuru ade ti ga pepe, ngbanga ti so Jésus ade ti wara gonda ti lo pepe.

⁴⁰Na popo ti gba ti azo so ama atënë ti Jésus, ambeni atene: “So taa Wayanga-Nzapa ni laa!”

⁴¹Ambeni atene ti ala: “Lo laa lo yeke *Mesii ni!” Ambeni atene: “Mesii ni alingbi ti londo na Galile si aga?

⁴²Mbeti ti Nzapa atene: ‘Fade Mesii ni ayeke *hale ti David. Lo yeke londo ande na Betlehem, kodro ti David si lo yeke ga.’”

⁴³Popo ti azo ni akangbi ndali ti Jésus.

⁴⁴Ambeni na popo ti ala aye ti gbu Jésus, me zo oko andu lo pepe.

⁴⁵Aturugu ni akiri na tere ti akota wayango-sandaga na *afarizien. Ala hunda aturugu ni, atene: “Ala ga na lo pepe ngbanga ti nyen?”

⁴⁶Aturugu ni akiri tënë na ala, atene: “Mbeni zo ti tene tënë tongana koli so ayeke daa oko pepe!”

⁴⁷Afarizien ahunda ala, atene: “Ala nga, lo handa ala awe?

⁴⁸Mbeni makonzi ti e wala mbeni farizien oko so ama na be na lo ayeke daa?

⁴⁹Gi gba ti azo so ahinga *Ndia ti Moïse pepe so, ala laa ama na be na lo; Nzapa adeba ala awe!”

⁵⁰Na popo ti afarizien, mbeni oko ayeke Nikodeme so ague lani abaa Jésus. Lo tene na ala:

⁵¹“*Ndia ti e amu lege na e ti fâ ngbanga na li ti zo so ade e ma tënë ti lo pepe si ade e hinga ye so zo ni asara pepe?”

⁵²Ala kiri tënë na lo: “Mo nga, mo yeke zo ti Galile? Mo gi nda ti Mbeti ti Nzapa, fade mo yeke hinga so, mbeni wayanga-Nzapa alondo laoko na Galile aga pepe.” [

⁵³Na pekoni, zo oko oko akiri na da ti lo.