Read La Bible en Sango courant – Mbeti ti Nzapa Jean 8 Bible Online

Jean 8 - La Bible en Sango courant – Mbeti ti Nzapa bible

Jean 8

¹Jésus amu lege, ague na hoto ti a-olive.

²Na kota ndaperere, lo kiri na ya ti kota da ti Nzapa, azo kue akiri abongbi na tere ti lo. Lo duti si lo yeke fa ye na ala.

³Awafango-ndia na *afarizien amu mbeni wali so ala wara lo na gingo mbeni koli so ayeke koli ti lo pepe. Ala ga azia lo na le ti azo kue.

⁴Ala tene Jésus: “Wafango-ye, e wara wali so ayeke lango na koli so ayeke koli ti lo pepe.

⁵Moïse amu ando yanga na e na ya ti *Ndia titene e bo amara ti wali tongaso na têne. Me ti mo, mo tene nyen?”

⁶Ala hunda tënë so ti sara si Jésus ati na ya ti gbanda ti ala si ala lingbi ti wara mbeni tënë ti bi na li ti lo. Me Jésus aba tere ti lo na sese si lo yeke su mbeti na sese na li ti maboko ti lo.

⁷So ala ngba ti hunda Jésus, lo mu li ti lo na nduzu si lo tene na ala: “Na popo ti ala, zo so asara siokpari oko pepe, ayeke nzoni lo mu têne, lo bo na wali ni kozoni!”

⁸Na pekoni, Jésus akiri aba tere ti lo na sese si lo yeke su mbeti na sese.

⁹So azo ni ama tënë so, ala londo oko na oko ti gue; azo so ahon kozoni ayeke ambakoro. Jésus angba gi lo oko, wali ni angba ti luti na dawa ti lo.

¹⁰Tongaso Jésus amu li ti lo na nduzu si lo hunda wali ni, lo tene: “Azo ni ayeke na ndo wa? Mbeni zo oko afâ ngbanga na li ti mo pepe?”

¹¹Wali ni akiri tënë na lo: “*Kota Gbia, zo oko pepe!” Jésus atene na lo: “Mbi nga, mbi yeke fâ ngbanga na li ti mo pepe. Mo gue, me mo kiri mo sara siokpari pepe.”]

¹²Jésus akiri atene na gba ti azo ni, atene: “Mbi yeke lumiere ti dunia so. Zo so amu peko ti mbi, fade lo yeke tambula na ya ti vukongo ndo pepe, me lo yeke wara lumiere so ayeke mu fini na zo.”

¹³*Afarizien atene na lo: “So mo wani, mo yeke tene tënë na ndö ti mo so, fade tënë ti mo ni ayeke taa-tënë pepe!”

¹⁴Jésus akiri tënë na ala: “Ataa mbi tene tënë na ndö ti mbi wani, tënë ti mbi ayeke taa-tënë, ngbanga ti so mbi hinga ndo so mbi londo daa nga na ndo so mbi yeke gue daa. Ti ala afarizien, ala hinga ndo so mbi londo daa pepe wala ndo so mbi yeke gue daa pepe.

¹⁵Ala yeke fâ ngbanga gi tongana ti azo; me ti mbi, mbi yeke fâ ngbanga na li ti zo oko pepe.

¹⁶Tongana mbi fâ ngbanga, fango ngbanga ti mbi ayeke na legeni, ndali ti so mbi oko laa mbi yeke fâ ngbanga ni pepe, Babâ ti mbi so atokua mbi ayeke na mbi.

¹⁷*Ndia ti ala wani atene: ‘Tongana azo use afa peko ti mbeni tënë si yanga ti ala ague oko, tënë ti ala ayeke taa-tënë.’

¹⁸Mbi yeke tene tënë na ndö ti mbi wani, Babâ ti mbi so atokua mbi ayeke tene nga tënë na ndö ti mbi.”

¹⁹Ala hunda lo, atene: “Babâ ti mo ni ayeke na ndo wa?” Jésus akiri tënë, atene: “Ala hinga mbi wala Babâ ti mbi pepe. Tongana ala hinga fade mbi, ka ala hinga nga Babâ ti mbi.”

²⁰Jésus atene atënë so na ndembe so lo yeke fa ye na ya ti kota da ti Nzapa, na ndo so a zia sanduku ti nginza daa. Zo oko agbu lo pepe, ngbanga ti so ngbonga ti lo ade ti lingbi pepe.

²¹Jésus akiri atene na ala: “Mbi yeke gue; fade ala yeke gi mbi, me ala yeke kui na ya ti siokpari ti ala. Ala lingbi ti gue pepe na ndo so mbi yeke gue daa.”

²²Azuife atene na popo ti ala: “Lo ye ti fâ tere ti lo laa si lo tene: ‘Ala lingbi ti gue pepe na ndo so mbi yeke gue daa’ so?”

²³Jésus akiri tënë na ala, atene: “Ala yeke azo ti sese so, me mbi, mbi yeke zo ti yayu. Ala yeke azo ti dunia so, me mbi, mbi yeke zo ti dunia so pepe.

²⁴Ndani laa mbi tene na ala, mbi tene, ala yeke kui ande na ya ti siokpari ti ala. Biani, tongana ala ma na be pepe so ‘Mbi Yeke’, fade ala yeke kui na ya ti siokpari ti ala.”

²⁵Ala hunda lo, atene: “Mo yeke zo wa?” Jésus akiri tënë na ala, atene: “Gi tënë ni laa mbi tene na ala, ngbene ye na tongo nda ni awe so.

²⁶Mbi yeke na tënë mingi ti tene na tere ti ala, mbi yeke nga na ngbanga ti fâ na li ti ala. Me lo so atokua mbi, lo yeke tene taa-tënë; gi tënë so mbi ma na yanga ti lo laa mbi yeke tene na azo ti dunia.”

²⁷Jésus ayeke tene tënë ti Babâ, me ala hinga ti ala pepe.

²⁸Jésus atene na ala: “Tongana ala kanga ande *Molenge ti Zo na nduzu, fade ala yeke hinga so ‘Mbi Yeke’; fade ala yeke hinga so mbi yeke sara ye gi na li ti mbi pepe, me mbi yeke tene gi tënë so Babâ afa na mbi.

²⁹Lo so atokua mbi, lo yeke na mbi. Lo zia mbi gi mbi oko pepe, ngbanga ti so mbi yeke sara lakue ye so anzere na be ti lo.”

³⁰Azo mingi ama na be na lo ngbanga ti tënë so lo tene.

³¹Jésus atene na azuife so ama na be na lo, atene: “Tongana ala bata tënë ti mbi, andaa ala yeke adisiple ti mbi biani.

³²Fade ala yeke hinga taa-tënë si taa-tënë ayeke zi ala na gbe ti ngbaa.”

³³Ala kiri tënë na lo, atene: “Kotara ti e ayeke Abraham, laoko e sara ngbaa na gbe ti mbeni zo pepe. Tongana nyen laa mo tene e yeke sigigi na gbe ti ngbaa so?”

³⁴Jésus atene na ala: “Biani, mbi tene na ala taa-tënë: zo so asara siokpari aga ngbaa ti siokpari awe.

³⁵Ngbaa ayeke duti na ya ti da lakue lakue pepe. Taa molenge ti ya ti da laa ayeke duti lakue lakue na ya ti da ni.

³⁶Tongana Molenge ni azi ala na gbe ti ngbaa, fade ala yeke sigigi na gbe ti ngbaa biani.

³⁷Mbi hinga so Abraham ayeke kotara ti ala. Me ala yeke gi lege ti fâ mbi, ngbanga ti so tënë ti mbi awara ndo na be ti ala pepe.

³⁸Mbi yeke tene ti mbi gi tënë ti ye so mbi baa na Babâ ti mbi; ala yeke sara ti ala gi ye so ala ma na yanga ti babâ ti ala.”

³⁹Ala tene na lo: “Babâ ti e ayeke Abraham.” Jésus akiri tënë na ala, atene: “Tongana ala yeke fade amolenge ti Abraham, ka ala sara aye so lo sara.

⁴⁰Ataa so mbi yeke tene na ala taa-tënë so mbi ma na yanga ti Nzapa, ala yeke gi lege fadeso ti fâ mbi. Abraham asara mara ti ye tongaso laoko pepe!

⁴¹Me ti ala, ala yeke sara ye tongana babâ ti ala.” Ala kiri tënë na lo, atene: “Nzapa oko laa ayeke Babâ ti e. E yeke amolenge so a du e na gigi pepe.”

⁴²Jésus atene na ala: “Tongana Nzapa ayeke fade Babâ ti ala, ka ala ye mbi, ngbanga ti so mbi londo na lo laa mbi ga. Mbi ga gi ti li ti mbi pepe, me lo laa lo tokua mbi.

⁴³Ala ma ya ti tënë ti mbi pepe, ngbanga ti nyen? Ngbanga ti so ala lingbi ti ma tënë ti mbi pepe.

⁴⁴Babâ ti ala ayeke Zabolo, ala ye ti sara gi ye so be ti lo aye; kua ti lo ngbene ye na tongo nda ni laa. Lo gi lege laoko ti tene taa-tënë pepe, ngbanga ti so taa-tënë ayeke na ya ti fini ti lo pepe. Mvene ayeke ye ti tere ti lo, ngbanga ti so lo yeke zo ti mvene si lo yeke babâ ti mvene.

⁴⁵Ti mbi, mbi yeke tene taa-tënë, ndani laa ala ma na be na mbi pepe.

⁴⁶Zo wa na popo ti ala alingbi ti fa siokpari so mbi sara? Tongana tënë ti mbi ayeke taa-tënë, ngbanga ti nyen si ala ma na be na mbi pepe?

⁴⁷Zo so ayeke ti Nzapa ayeke ma atënë ti Nzapa. Ti ala, ala ma tënë ti mbi pepe, ngbanga ti so ala yeke azo ti Nzapa pepe.”

⁴⁸Azuife akiri tënë na Jésus, atene: “Tënë so e tene so ayeke taa-tënë: ‘Mo yeke zo ti Samarii si sioni yingo ayeke na ya ti mo!’ ”

⁴⁹Jésus akiri tënë na ala: “Mbi yeke na sioni yingo oko pepe; mbi yeke ne Babâ ti mbi, me ti ala, ala yeke ne mbi pepe.

⁵⁰Mbi yeke gi titene azo agonda mbi pepe, me mbeni zo ayeke daa so ayeke sara titene mbi wara gonda, lo laa lo yeke wafango-ngbanga.

⁵¹Biani, mbi tene na ala taa-tënë: zo so asara ye alingbi na atënë ti mbi, fade lo yeke kui laoko pepe.”

⁵²Azuife akiri tënë na lo, atene: “Fadeso e hinga biani so, mo yeke na sioni yingo na ya ti mo! Abraham akui, awayanga-Nzapa nga akui, me ti mo, mo tene: ‘Zo so asara ye alingbi na atënë ti mo, fade lo yeke kui laoko pepe.’

⁵³Mo ye ti tene mo yeke kota, mo hon Abraham, babâ ti e so akui so? Awayanga-Nzapa nga akui. Mo baa tere ti mo, mo tene, mo yeke zo wa?”

⁵⁴Jésus akiri tënë na ala, atene: “Tongana mbi gonda tere ti mbi wani, gondango tere ti mbi ni ayeke mbeni ye pepe. Zo ti gondango mbi ayeke Babâ ti mbi, lo so ala tene: ‘Lo yeke Nzapa ti e’ so;

⁵⁵me ala hinga lo oko pepe. Mbi laa mbi hinga lo. Tongana mbi tene fade, mbi tene: ‘Mbi hinga lo pepe’, ka mbi yeke zo ti mvene tongana ala. Me mbi hinga lo si mbi yeke sara ye alingbi na tënë ti lo.

⁵⁶Abraham, babâ ti ala, awara ngia ando mingi, ngbanga ti so lo ku ti baa lango ti gango ti mbi. Lo baa ni si be ti lo asi na ngia.”

⁵⁷Na ndö ti tënë so, azuife atene na lo: “Mo so mo de ti wara ngu baleoku pepe so, mo tene mo baa Abraham?”

⁵⁸Jésus akiri tënë na ala, atene: “Biani, mbi tene na ala taa-tënë: kozo si a du Abraham, ‘Mbi Yeke.’ ”

⁵⁹Ala mu têne ti bo na Jésus, me lo honde tere ti lo si lo sigigi na ya ti kota da ti Nzapa ni, lo hon.