Read La Bible en Sango courant – Mbeti ti Nzapa Jean 9 Bible Online

Jean 9 - La Bible en Sango courant – Mbeti ti Nzapa bible

Jean 9

¹So Jésus ayeke hon na lege, lo baa mbeni zo so a du lo waziba.

²Adisiple ti lo ahunda lo, atene: “Wafango-ye, zo wa laa asara siokpari si a du koli so waziba so? Lo, wala babâ na mama ti lo?”

³Jésus akiri tënë na ala: “Ye so asara si lo ga waziba so ayeke siokpari ti lo wala siokpari ti babâ na mama ti lo pepe. Ye so asi na lo titene azo abaa ye so Nzapa ayeke sara na ya ti fini ti lo.

⁴Na ndembe so lâ angba ti su, ayeke nzoni e sara kua ti lo so lo tokua mbi. Ndo aga nduru ti vuko awe, fade zo alingbi ti sara kua mbeni pepe.

⁵Na ndembe so mbi yeke na dunia so, mbi yeke lumiere ti dunia ni.”

⁶Na peko ti tënë so, Jésus atuku ngu ti yanga ti lo na sese, lo sara potopoto na ni, lo zia potopoto ni na le ti waziba ni

⁷si lo tene na lo: “Gue mo sukula le ti mo na du ti ngu ti Siloe.” Nda ti iri ti Siloe atene “Zo ti tokua”. Tongaso koli ni ague, lo sukula le ti lo si na kiringo ti lo, lo baa ndo nzoni.

⁸Azo ti tere ti da ti lo na ambeni zo so ayeke baa lo lakue na iringo ye, atene: “Koli so ayeke duti lakue ti iri ye so laa pepe?”

⁹Ambeni atene: “Een, lo laa.” Me ambeni atene: “Ên-en, lo laa pepe. Zo ni akpa lo kpango.” Koli ni wani atene na ala: “Mbi laa!”

¹⁰Ala hunda lo, atene: “Asara tongana nyen si mo yeke baa ndo fadeso?”

¹¹Koli ni akiri tënë na ala: “Koli so iri ti lo Jésus so, lo laa lo sara potopoto ti sese, lo zia na le ti mbi si lo tene: ‘Gue na du ti ngu ti Siloe, mo sukula le ti mo.’ Mbi gue si gi na peko ti so mbi sukula le ti mbi awe, mbi baa ndo!”

¹²Ala hunda lo, atene: “Koli ni ayeke na ndo wa?” Lo kiri tënë na ala, lo tene: “Mbi hinga pepe.”

¹³Ala mu waziba so, ala gue na lo na *afarizien.

¹⁴Andaa Jésus asara potopoto si lo zi na le ti koli so na *lango ti wungo tere.

¹⁵Tongaso afarizien nga ahunda koli ni na ye so asara si lo yeke baa ndo so. Koli ni atene na ala: “Lo zia potopoto na le ti mbi, mbi sukula le ti mbi ni si fadeso mbi yeke baa ndo.”

¹⁶Ambeni farizien ni atene: “Zo so asara ye so alondo na Nzapa pepe, ngbanga ti so lo bata ndia ti lango ti wungo tere pepe.” Ambeni atene ti ala: “Zo ti siokpari alingbi ti sara mara ti aye ti kpene tongaso pepe!” Kangbi ati na popo ti ala.

¹⁷Afarizien akiri ahunda koli ni, atene: “Mo tene, lo laa lo zi le ti mo si mo baa ndo. Me ti be ti mo, lo yeke zo wa?” Koli ni akiri tënë, atene: “Lo yeke mbeni wayanga-Nzapa.”

¹⁸Azuife ake ti yeda na tënë so atene, koli so ayeke lani waziba si fadeso lo yeke baa ndo. Ndani laa ala iri babâ na mama ti lo

¹⁹ti hunda ala kozoni si. Ala hunda babâ na mama ni, atene: “So molenge ti ala laa? Ala tene a du lo waziba? Me asara tongana nyen si fadeso lo yeke baa ndo?”

²⁰Babâ na mama ti lo atene: “E hinga so lo yeke molenge ti e si a du lo waziba.

²¹Me e hinga ye so asara si lo yeke baa ndo fadeso pepe; e hinga nga zo so azi le ti lo pepe. Ala hunda lo, lo ga koli awe, fade lo wani, lo yeke kiri tënë daa na ala.”

²²Babâ na mama ti lo atene tënë so, ngbanga ti so mbeto ti azuife asara ala. Andaa azuife ni atene, zo so kue ayeda atene, Jésus ayeke *Mesii, ala yeke tumba lo na ya ti da ti sambelango Nzapa ti ala.

²³Ndani laa, babâ na mama ti koli so atene: “Ala hunda lo, lo ga koli awe!”

²⁴Afarizien akiri airi waziba ni si ala tene na lo: “Mo gonda gi Nzapa! E hinga so koli so azi le ti mo ayeke zo ti siokpari.”

²⁵Koli ni akiri tënë, atene: “Ataa lo yeke zo ti siokpari-oo, ataa lo yeke zo ti siokpari pepe-oo, mbi hinga gi ye oko: mbi yeke lani waziba, me fadeso mbi yeke baa ndo.”

²⁶Ala kiri ahunda lo, atene: “Me nyen laa lo sara na mo? Lo zi le ti mo ni tongana nyen?”

²⁷Lo kiri tënë na ala, lo tene: “Mbi tene na ala kozoni awe, me ala ye ti ma pepe. Ngbanga ti nyen laa ala ye ti ma ti fani use so? Ala nga, ala ye ti ga adisiple ti lo?”

²⁸Ala zonga lo si ala tene na lo: “Mo laa mo yeke disiple ti koli so, me e yeke ti e adisiple ti Moïse!

²⁹E hinga so Nzapa atene tënë na Moïse, me ti koli so, e hinga ndo so lo londo daa si lo ga pepe.”

³⁰Koli ni akiri tënë, atene: “Ae, ala ma mbeni ye ti kpene! Ala hinga ndo so lo londo daa si lo ga pepe? Ka so lo zi le ti mbi so.

³¹E hinga so, Nzapa ayeke ma azo ti siokpari pepe, me lo yeke ma gi azo so ama yanga ti lo si ala yeke sara ye so be ti lo aye.

³²Na ndö ti dunia so, lawa laa e ma tënë ti mbeni zo so a du lo waziba si mbeni zo azi le ti lo?

³³Tongana koli so alondo fade na Nzapa pepe, ka lo lingbi ti sara ye oko pepe.”

³⁴Ala kiri tënë, atene: “Mo, a du mo si mo kono gi na ya ti siokpari, mo ye ti fa ye na e?” Na pekoni, ala tumba lo na ya ti da ti sambela ni.

³⁵Jésus ama a tene, ala tumba koli so awe; lo gue, lo wara lo si lo hunda lo, lo tene: “Mo ma na be na *Molenge ti Zo?”

³⁶Koli ni atene: “*Kota Gbia, Molenge ti Zo ni ayeke zo wa si mbi lingbi ti ma na be na lo?”

³⁷Jésus atene na lo: “Mo baa lo awe, lo laa lo yeke tene tënë na mo fadeso.”

³⁸Koli ni atene: “Kota Gbia, mbi ma na be.” Lo kuku na gbe ti Jésus.

³⁹Jésus atene: “Mbi ga na dunia so ti fâ ngbanga: tongaso si awaziba abaa ndo si azo so ayeke baa ndo, akiri aga awaziba.”

⁴⁰Ambeni *farizien so ayeke kâ ama tënë so Jésus atene so si ala hunda lo, atene: “E nga, e yeke awaziba?”

⁴¹Jésus akiri tënë na ala: “Tongana ala yeke fade awaziba, ka siokpari ayeke na li ti ala pepe. Me so ala yeke tene: ‘Le ti ala ayeke baa ndo’, andaa siokpari angba na li ti ala.”