Read La Bible en Sango courant – Mbeti ti Nzapa Awatokua 1 Bible Online

Awatokua 1 - La Bible en Sango courant – Mbeti ti Nzapa bible

Awatokua 1

¹Ita Théophile! Na ya ti kozo buku ti mbi, mbi tene tënë ti aye so kue Jésus asara nga na aye so lo fa, ngbene ye na tongo nda ni

²ngbii asi na lango so a mu lo na yayu. Kozo titene a mu Jésus na yayu, lo mu yanga na lege ti ngangu ti Yingo-Vuru na azo so lo soro ala ti ga *awatokua.

³Na peko ti kuâ ti lo, lo fa tere ti lo na ala na alege nde nde si lo fa na ala biani so lo yeke na fini. Na ya ti lango baleosio, lo si na ala si lo fa na ala tënë na ndö ti *Kodro-gbia ti Nzapa.

⁴Mbeni lâ, so lo na ala ayeke te kobe, lo mu yanga na ala, lo tene: “Ala ngba na Jérusalem, ala ku ye so Babâ amu zendo ni si mbi nga, mbi tene tënë ni lani na ala so.

⁵Jean abatize azo na ngu, me na ya ti akete lango, fade Nzapa ayeke batize ala na Yingo-Vuru.”

⁶So *awatokua abongbi na tere ti Jésus, ala hunda lo, atene: “*Kota Gbia, fadeso laa mo yeke kiri kodro-gbia ni na azo ti Israel?”

⁷Jésus akiri tënë na ala: “So ayeke tënë ti ala pepe ti hinga ngoi ni na ndembe ni. Biani, Babâ oko laa aleke na be ti lo na lege ti komandema ti lo.

⁸Me fade ala yeke wara ngangu na ndembe so Yingo-Vuru ayeke zu na ndö ti ala. Tongaso, ala yeke ga azo ti tenengo tënë ti ye so ala hinga na ndö ti mbi, na Jérusalem, na Judée kue, na Samarii, ngbii ala si na nda ti sese kue.”

⁹Na peko ti tënë so, lo londo ti gue na yayu, ala ngba ti baa peko ti lo, me mbeni mbinda ahonde lo na le ti ala.

¹⁰So ala ngba ti baa ndo na nduzu na peko ti lo, ambeni koli use so ayu vuru bongo, aga aluti nduru na tere ti ala.

¹¹Akoli ni atene na ala: “Ala azo ti Galile, ala ngba ti luti na ndo so ti baa ndo na nduzu ngbanga ti nyen? Jésus so a mu lo na popo ti ala ague na lo na yayu so, fade lo yeke kiri gi tongana ti so ala baa lo na guengo ni na yayu.”

¹²Tongaso, *awatokua alondo na ndö ti hoto so a iri ni hoto ti a-olive si ala kiri na Jérusalem; hoto ni ayo nduru na kilometere oko na gbata ni.

¹³So ala si na gbata ni awe, ala li na ya ti kubu ti nduzu so ala yeke wara ka tere daa. Azo ni ayeke Pierre, Jean, Jacques, André, Philippe, Thomas, Barthélemy, Matthieu, Jacques, molenge ti Alfe, Simon so ayeke tiri ndali ti lipandaa ti kodro nga na Jude, molenge ti Jacques.

¹⁴Lakue na beoko, ala kue ayeke bongbi ti sambela, ala na ambeni wali, na Marie, mama ti Jésus nga na a-ita ti Jésus.

¹⁵Mbeni lâ, azo ti Jésus abongbi tere ti ala, li ti ala kue ayeke nduru na ngbangbo oko na baleuse. Pierre alondo na popo ti ala si lo tene:

¹⁶“A-ita, ye so Yingo-Vuru atene tënë ni na ya ti Mbeti ti Nzapa so, ayeke nzoni ye ni asi alingbi na ni. Yingo-Vuru atene tënë na ndö ti Judas na lege ti David; Judas so aga zo ti fango lege na azo ti gbungo Jésus so.

¹⁷Judas ayeke lani na popo ti e si a mu na lo mbage ti kua so e yeke sara so titene lo sara.

¹⁸Lo gue lani lo vo mbeni yaka na nginza so lo wara na lege ti ye ti sioni ti lo. Kâ, lo ti na li ti lo, ya ti lo asungba si avi ti lo kue atuku na sese.

¹⁹Azo ti Jérusalem kue ama tënë ni si ala iri yaka ni na yanga ti kodro ti ala atene ‘Hakeldama’, nda ni atene: ‘Yaka ti mene.’

²⁰Andaa a su na ya ti mbeti ti Abia, atene: ‘Ayeke nzoni ya ti da ti lo angba senge, mbeni zo alango daa pepe.’ Mbeni mbeti so a su, atene: ‘Ayeke nzoni mbeni zo amu kua na peko ti lo.’

²¹“Ambeni zo atambula na e na ya ti alango so *Kota Gbia Jésus ade na popo ti e,

²²ti londo na lango ti bateme ti Jean ngbii asi na lango so a mu Jésus na popo ti e, a gue na lo na yayu. Tongaso, ayeke nzoni mbeni oko na popo ti ala abongbi na e ti ga zo ti fango na azo tënë ti zingongo ti Jésus na kuâ.”

²³Ala mu azo use azia na dawa ti ala: Joseph so a iri lo Barsabas, so mbeni iri ti lo ayeke Yustus, lo na Matthias.

²⁴Na pekoni, ala sambela Nzapa, atene: “Kota Gbia, mo hinga be ti azo kue. Tongaso, na popo ti azo use so, fa na e zo wa laa mo soro lo

²⁵ti sara kua ti watokua na peko ti Judas so azia kua ni ti gue na ndo so alingbi na lo.”

²⁶Na pekoni, ala bi ye ti hinga zo wa laa a soro lo. Ye ni afa Matthias si a zia lo na tere ti awatokua baleoko na oko.