Read La Bible en Sango courant – Mbeti ti Nzapa Awatokua 10 Bible Online

Awatokua 10 - La Bible en Sango courant – Mbeti ti Nzapa bible

Awatokua 10

¹Na gbata ti Sezare, mbeni koli ayeke daa, iri ti lo ayeke Corneille. Lo yeke kapita ti mbeni bongbi ti aturugu ti Rome so iri ni “Bongbi ti aturugu ti Italii.”

²Lo gbu tënë ti Nzapa mingi si lo yeke kpe mbeto ti Nzapa, lo na asewa ti lo kue. Lo yeke mu aye mingi na azo ti mawa so ayeke na popo ti azuife si lo yeke sambela Nzapa lakue.

³Mbeni lâ, na ngbonga ota ti peko ti bekombite, mbeni *ange ti Nzapa asi na lo na ya ti mbeni ye tongana bango-li si lo baa ni mbirimbiri. Ange ni airi lo, atene: “Corneille!”

⁴Le ti Corneille angba gi na ndö ti ange ni; mbeto asara lo si lo tene: “Nyen, *Kota Gbia?” Ange ni akiri tënë na lo: “Asambela ti mo na aye ti nzoni so mo sara na azo ti mawa so, Nzapa aye tënë ni, be ti lo agirisa na ni pepe.

⁵Fadeso, mo tokua ambeni zo na Zope ti iri mbeni koli so iri ti lo Simon, mbeni iri ti lo ayeke Pierre.

⁶Pierre ayeke gene na da ti mbeni Simon, zo ti sarango kua ti aporo ti nyama. Da ti lo ayeke na yanga ti kota ngu-ingo.”

⁷Na pekoni, ange so atene tënë ni so ahon ti lo. Corneille airi azo ti kua ti lo use na mbeni turugu oko so agbu tënë ti Nzapa mingi si lo yeke na gbe ti lo aninga.

⁸Lo fa na ala peko ti ye so kue asi si lo tokua ala na Zope.

⁹Lango oko na pekoni, ala yeke na lege ti gue si ala ga nduru ti si na Zope. Nduru na bekombite, Pierre ague na li ti da ti sambela.

¹⁰Nzara asara lo si lo ye ti te kobe. So a ngba ti to kobe na lo, mbeni ye asi na lo na ya ti mbeni ye tongana bango-li.

¹¹Lo baa yayu azi, mbeni ye aga tongana mbeni kota mapia-bongo so a gbu ayanga ni osio si a yeke zu ni na sese.

¹²Na ya ti bongo ni mara ti anyama kue ayeke daa: anyama ti gere osio na ala so ayeke hara harango, na mara ti andeke kue.

¹³Mbeni go atene na lo: “Pierre, londo, mo fâ, mo te!”

¹⁴Me Pierre atene: “Oko pepe, Kota Gbia! Mbeni *sioni ye wala ye so *Ndia ake tënë ni, mbi de ti te ni laoko pepe.”

¹⁵Go ni akiri atene na lo: “Ye so Nzapa asara si aga *nzoni awe, mo baa ni tongana *sioni ye pepe.”

¹⁶Ye ni asi tongaso fani ota si gi hio na pekoni, a kiri na ye ni na yayu.

¹⁷Pierre ayeke gi li ti lo na ndö ti ye so asi na lo na ya ti mbeni ye tongana bango-li so. Gi na ndembe ni so, azo so Corneille atokua ala so ahunda da ti Simon si ala yeke luti na yanga ti da ni.

¹⁸Ala iri ndo si ala hunda, atene: “Simon so mbeni iri ti lo ayeke Pierre so ayeke lango ge?”

¹⁹Pierre angba ti gbu li ti lo na nda ti ye so lo baa so, Yingo atene na lo: “Baa, akoli ota ayeke ge, ala yeke gi mo.

²⁰Londo hio, mo zu, mo gi be ti mo pepe! Mo na ala ague, ngbanga ti so mbi laa mbi tokua ala.”

²¹Tongaso Pierre azu si lo tene na ala: “Mbi laa ala yeke gi mbi so. Mbeni tënë ayeke daa?”

²²Azo ni akiri tënë, atene: “Kapita Corneille laa atokua e. Lo yeke zo ti mbirimbiri, lo yeke kpe mbeto ti Nzapa si azuife kue ayeke tene nzoni tënë ti lo. Mbeni ange ti Nzapa ahunda na lo ti iri mo ti ga na da ti lo titene lo ma tënë so mo yeke tene na lo.”

²³Pierre ahunda na azo ni ti li na ya ti da si lo mu na ala ndo ti lango daa. So ndo ahan awe, Pierre alondo si lo na ala ague. Ambeni ita, azo ti Jésus so ayeke na Zope amu peko ti lo.

²⁴Lango oko na pekoni, lo si na Sezare. Corneille ayeke ku ala kâ; andaa lo tisa ambeni zo ti sewa ti lo na amba ti lo so lo ye ala mingi.

²⁵So Pierre aga ti li na ya ti da ni, Corneille aga atengbi na lo. Lo ti na sese na gbe ti Pierre ti voro lo.

²⁶Me Pierre amu lo na nduzu si atene na lo: “Londo, ngbanga ti so mbi nga, mbi yeke gi zo senge.”

²⁷Lo na Corneille ayeke tene lisoro si ala li na ya ti da. Pierre abaa azo mingi so abongbi kâ.

²⁸Lo tene na ala: “Ala hinga kue: *Ndia amu lege pepe na zuife ti gue na ndo ti zo ti mbeni mara nde nga ti li na da ti lo. Me ti mbi, Nzapa afa na mbi atene, ayeke nzoni mbi baa mbeni zo tongana zo so ayeke *sioni pepe wala zo so alingbi pepe ti sara beoko na lo.

²⁹Ndani laa, na ndembe so ala tokua ti iri mbi, mbi gi be ti mbi pepe si mbi ga. Fadeso mbi hunda ala, mbeni tënë ayeke daa si ala iri mbi ti ga ndali ni so?”

³⁰Corneille akiri tënë: “Asara lango ota laso, na ngbonga ota ti peko ti bekombite, mbi yeke sambela na ya ti da ti mbi. Mo ye ti baa, mbeni koli so bongo ti tere ti lo aza zango aga aluti na dawa ti mbi;

³¹lo tene na mbi: ‘Corneille! Nzapa ama sambela ti mo awe. Anzoni ye so mo sara na azo ti mawa, be ti lo agirisa na ni pepe.

³²Tokua mbeni zo na Zope ti iri Simon, so mbeni iri ti lo ayeke Pierre. Lo yeke gene na da ti Simon so ayeke sara kua ti aporo ti nyama. Da ti lo ayeke na yanga ti kota ngu-ingo.’

³³Nilaa mbi tokua azo hio ti iri mo si mo sara nzoni be, mo ga so. Fadeso, e kue, e yeke ge na dawa ti Nzapa, e yeke ku ti ma tënë so Kota Gbia amu yanga na mo ti tene na e.”

³⁴Tongaso Pierre amu tënë si lo tene: “Taa-tënë, mbi hinga fadeso mbi tene, Nzapa ayeke gonda zo ndali ti le ti zo ni pepe.

³⁵Zo so kue akpe mbeto ti Nzapa si asara ye ti mbirimbiri, Nzapa aye lo, ataa lo yeke zo ti mara wa.

³⁶Nzapa atokua tënë ti lo na azo ti Israel: tënë ni ayeke Nzoni Tënë so amu siriri na zo na lege ti Jésus Christ, lo so lo yeke *Kota Gbia ti azo kue.

³⁷Ala hinga tënë ti aye so asi na sese ti Judée kue; aye ni ato nda ni na sese ti Galile, na peko ti bateme so Jean afa tënë ni.

³⁸Ala hinga tënë ti Jésus, zo ti Nazaret, ala hinga lege so Nzapa asoro lo si lo sara si Yingo-Vuru na ngangu aga na ndö ti lo. Nzapa ayeke na lo, nilaa lo tambula na ndo kue, lo sara aye ti nzoni si lo kai akobela na tere ti azo so kue ayeke na gbe ti Zabolo.

³⁹E nga, e baa aye so kue lo sara na kodro ti azuife, e baa nga aye so lo sara na Jérusalem. A kanga lo na ndö ti keke ti kroa si lo kui.

⁴⁰Me na lango ota ni, Nzapa azingo lo na kuâ; lo mu lege na lo ti si

⁴¹na azo kue pepe, me gi na e. Nzapa asoro e kozoni titene e baa lo si e fa peko ti ye so e baa. Na peko ti so lo zingo na kuâ, e na lo, e te, e nyon.

⁴²Jésus amu na e yanga ti fa tënë na azo, ti fa nga peko ti ye so e hinga: Nzapa asoro Jésus ti fâ ngbanga ti azo so ayeke na fini na ti ala so akui awe.

⁴³Awayanga-Nzapa kue atene tënë ti lo, atene: ‘Zo so ama na be na lo, na iri ti lo, fade Nzapa ayeke zi asiokpari ti zo ni.’ ”

⁴⁴So Pierre angba ti tene tënë, Yingo-Vuru azu na ndö ti azo so kue ayeke ma tënë ni.

⁴⁵Azuife so ama na be si ala na Pierre aga so, li ti ala kue akpe, ngbanga ti so ala baa so Nzapa amu nga Yingo-Vuru ti lo na azo ti amara nde!

⁴⁶Biani, ala yeke ma azo ni ayeke tene tënë na ayanga nde nde si ala yeke sepela kota ti Nzapa. Pierre amu tënë si lo tene:

⁴⁷“Fadeso, azo so awara Yingo-Vuru gi tongana ti so e wara na ni. Alingbi ti gbanzi ala titene ala wara bateme ti ngu?”

⁴⁸Tongaso lo mu yanga na ala ti wara bateme na iri ti Jésus Christ. Na pekoni, ala hunda na lo titene lo ngba, lo na ala alango kete si.