Read La Bible en Sango courant – Mbeti ti Nzapa Awatokua 11 Bible Online

Awatokua 11 - La Bible en Sango courant – Mbeti ti Nzapa bible

Awatokua 11

¹*Awatokua na a-ita, azo ti Jésus so ayeke na Judée ama a tene, azo ti amara nde nga ayeda na tënë ti Nzapa.

²So Pierre akiri na Jérusalem, azuife so ama na be amu lo na tënë,

³atene: “Mo li na da ti azo so afâ *ganza pepe si mo na ala ate kobe!”

⁴Tongaso Pierre afa na ala tënë ti aye so asi na yanga ni, na yanga ni; lo tene:

⁵“Mbi yeke sambela na gbata ti Zope si mbeni ye asi na mbi na ya ti mbeni ye tongana bango-li. Mbi baa mbeni ye so akpa kota mapia-bongo so a gbu ayanga ni osio, alondo na nduzu si a zu na sese; ye ni aga aluti na tere ti mbi.

⁶Mbi baa ye ni kpoo si na ya ni, mbi baa anyama ti gere osio, anyama ti ngonda, ala so ayeke hara harango na andeke ti nduzu.

⁷Na pekoni, mbi ma mbeni go so atene na mbi, atene: ‘Pierre, londo, mo fâ, mo te!’

⁸Me mbi tene: ‘Oko pepe, *Kota Gbia! Mbeni *sioni ye wala ye so *Ndia ake tënë ni ali na yanga ti mbi laoko pepe!’

⁹Go ni na yayu akiri atene: ‘Ye so Nzapa atene ayeke *nzoni, mo baa ni tongana *sioni ye pepe.’

¹⁰Ye ni asi tongaso fani ota si na pekoni, a kiri na ye ni kue na yayu.

¹¹Gi na ndembe ni so, ambeni koli ota alondo na Sezare, a tokua ala na mbi; ala si na da so mbi yeke duti daa.

¹²Yingo atene na mbi: ‘Mbi gi be ti mbi pepe, me mbi na ala e gue.’ A-ita ti Zope omene so ala yeke baa ala ge so, mbi na ala laa e gue si e li na da ti Corneille.

¹³Lo fa na e lege so lo baa *ange aluti na da ti lo si atene na lo: ‘Tokua mbeni zo na Zope ti iri Simon, so mbeni iri ti lo ayeke Pierre.

¹⁴Fade lo yeke tene mbeni tënë na mo si na lege ti tënë ni so, mo na azo ti sewa ti mo kue ayeke soo kuâ.’

¹⁵Na ndembe so mbi to nda ti tene tënë, Yingo-Vuru azu na ndö ti ala gi tongana ti so azu na ndö ti e kozoni so.

¹⁶Tongaso mbi dabe ti mbi na tënë so Kota Gbia atene: ‘Jean abatize azo na ngu, me fade Nzapa ayeke batize ala na Yingo-Vuru.’

¹⁷Tongana Nzapa amu na azo ni gi mara ti nzoni ye ti Yingo so lo mu na e na ndembe so e ma na be na Kota Gbia Jésus Christ so, mbi yeke ti mbi zo wa ti kanga lege na Nzapa?”

¹⁸So ala ma tënë so, be ti ala ade si ala gonda Nzapa, atene: “Nzapa amu nga lege na azo ti amara nde ti zia ngbene lege ti sarango ye ti ala si ala wara fini!”

¹⁹Na peko ti kuâ ti Étienne, a yeke sara ngangu na azo ti Jésus si ala kangbi kirikiri. Ambeni ague na Fenisii, ambeni na Shipre, ambeni na Antioshe; me ala yeke fa tënë gi na azuife.

²⁰Ti ambeni so ayeke azo ti Shipre na ti Sirene, ala gue na Antioshe si ala fa nga na agreke Nzoni Tënë ti *Kota Gbia Jésus.

²¹Ngangu ti Kota Gbia ayeke na ala, nilaa azo mingi ama na be si ala kiri na mbage ti Kota Gbia.

²²Azo ti *Eglize ti Jérusalem ama tënë ti ye so asi, nilaa ala tokua Barnabas na Antioshe.

²³So lo si, lo baa lege so Nzapa asara nzoni be na azo ni. Be ti lo asi na ngia si lo mu wango na ala titene ala kue angba ti mu peko ti Kota Gbia lakue.

²⁴Barnabas ayeke nzoni zo, lo si singo na Yingo-Vuru na mabe. Ndali ti lo, gba ti azo aga azo ti Kota Gbia.

²⁵Na pekoni, Barnabas ague na gbata ti Tarse ti gi Saul.

²⁶So lo wara lo, lo ga na lo na Antioshe. Na ya ti ngu oko kue, ala use asara kua oko na ya ti Eglize ni si ala fa ye na gba ti azo. Kâ na Antioshe laa azo ato nda ti iri adisiple “azo ti Christ”.

²⁷Gi na ngoi ni so, ambeni wayanga-Nzapa alondo na Jérusalem aga na Antioshe.

²⁸Mbeni oko so iri ti lo Agabus alondo, lo tene na azo ye so Yingo-Vuru afa na lo, lo tene: “Fade mbeni kota nzara ayeke ga na ndö ti sese kue.” — Nzara ni aga biani na ndembe so Claude ayeke kota gbia ti Rome. —

²⁹Tongaso adisiple aleke na be ti ala titene zo oko oko amu ye alingbi na ngangu ti lo ti mu maboko na a-ita, azo ti Christ, so ayeke na Judée.

³⁰Ala bongbi aye ni si ala tokua ni na *akangba ti Judée, na maboko ti Barnabas na Saul.