Read La Bible en Sango courant – Mbeti ti Nzapa Awatokua 12 Bible Online

Awatokua 12 - La Bible en Sango courant – Mbeti ti Nzapa bible

Awatokua 12

¹Na ngoi ni so, gbia Herode ato nda ti sara pasi na ambeni zo ti *Eglize.

²Lo mu yanga si a fâ Jacques, ita ti Jean, na yongoro zeme.

³So lo baa ye so lo sara anzere na be ti azuife, lo tokua titene a gbu Pierre. Ye so asi na ndembe ti matanga ti Mapa so a sara na mama ni pepe.

⁴So a gbu Pierre awe si a bi lo na da ti kanga awe, aturugu baleoko na omene akangbi ya ti ala osio osio ti bata lo. Herode aleke na be ti lo ti ga na lo na le ti azo kue ti fâ ngbanga ti lo na peko ti *matanga ti Pake.

⁵Tongaso a bata Pierre na da ti kanga, me azo ti Eglize angba ti sambela Nzapa ngangu ndali ti lo.

⁶Kozo titene ndo ahan si Herode afâ ngbanga ti Pierre na le ti azo kue, na bi ni, Pierre ayeke lango na popo ti aturugu use. A kanga lo na zingiri use si a zia aturugu ti bata yanga ti da ni.

⁷Mo ye ti baa, *ange ti *Kota Gbia asi, mbeni ye tongana wâ aza na ya ti kubu so Pierre ayeke daa. Ange ni andu Pierre na kate ti lo, Pierre azingo si ange ni atene na lo: “Londo hio!” Tongaso azingiri ni azi na maboko ti Pierre, ati.

⁸Ange ni atene na lo: “Kanga kamba ti ndö ti bongo ti mo, kanga akamba ti poro ti mo.” Pierre asara ye ni. Ange ni akiri atene: “Yu kota bongo ti mo, mo mu peko ti mbi.”

⁹Pierre asigigi si amu peko ti lo. Lo baa ti lo, lo tene ye so ange ni ayeke sara so ayeke taa-tënë pepe, me so bango-li laa.

¹⁰Ala hon kozo ndo so aturugu aluti daa, ala hon use ndo ni si na pekoni, ala si na yanga ti da ti sigigi na ya ti gbata ni; a sara yanga ti da ni na wen. Na hongo ti ala, yanga ti da ni azi gi lo oko si ala sigigi. So ala yeke hon na lege, mo ye ti baa, ange ni azia Pierre, ahon ti lo.

¹¹Na pekoni, li ti Pierre akiri daa si lo tene: “Fadeso, mbi hinga so ye ni ayeke taa-tënë: Kota Gbia atokua ange ti lo si lo zi mbi na maboko ti Herode nga na ya ti asioni ye so kue azuife ayeke ku ti sara.”

¹²So lo hinga nda ti ye ni awe, lo gue na da ti Marie, mama ti Jean so mbeni iri ti lo ayeke Marc. Azo mingi abongbi kâ si ala yeke sambela.

¹³Pierre apika yanga ti gbagba ni, mbeni maseka-wali so ayeke sara kua kâ aga ti zi yanga ti gbagba ni, iri ti lo Rode.

¹⁴So lo hinga go ti Pierre, ngia asi be ti lo si lo zi yanga ti gbagba ni pepe; me lo mu loro ti gue ti tene na azo ni atene, Pierre ayeke luti na gigi.

¹⁵Ala tene na lo: “Mbeni ye asara li ti mo!” Me lo ngba gi ti tene na ala so ye ni ayeke taa-tënë. Tongaso ala kiri tënë, atene: “So ange ti lo laa.”

¹⁶Me Pierre angba ti pika yanga ti gbagba ni. Ala zi ni; so ala baa lo, li ti ala kue akpe.

¹⁷Lo sara maboko ti lo na ala titene ala kai; lo fa na ala lege so Kota Gbia asara si lo sigigi na da ti kanga. Lo tene: “Ala gue, afa tënë ni na Jacques nga na a-ita.” Na pekoni, lo zia ala si lo hon na mbeni ndo.

¹⁸So ndo ahan awe, aturugu atomboka kirikiri, ala yeke hunda tere ti ala, atene: “Nyen laa asi na Pierre, nyen?”

¹⁹Herode amu yanga titene ala gi lo, me ala wara lo pepe. Tongaso Herode ahunda aturugu ni na nda ti tënë ni si lo mu yanga titene a fâ ala. Na pekoni, Herode alondo na Judée si lo gue, lo duti kete na gbata ti Sezare.

²⁰Be ti Herode aso mingi na azo ti Tir na ti Sidon. Azo ni ama tere ti gue ti baa Herode. Ala gue kozoni abaa Blastus, makonzi-kubu ti gbia titene lo gbu koko ti ala. Na pekoni, ala gue na Herode titene ala ma tere si siriri akiri na popo ti ala. Andaa kobe ayeke londo na kodro ti gbia Herode si ayeke gue na kodro ti ala.

²¹So lango ni alingbi awe, Herode ayu bongo ti lo ti gbia, lo duti na ndö ti mbata ti lo ti gbia si lo yeke tene tënë na ala na le ti azo kue.

²²Azo ni adekongo, atene: “Zo laa ayeke tene tënë so pepe, mbeni nzapa laa!”

²³Mo ye ti baa, *ange ti *Kota Gbia abi kobela na tere ti Herode, ngbanga ti so lo gonda Nzapa pepe: angusu ate lo si lo kui.

²⁴Me tënë ti Nzapa angba ti mu ndo kue si angba ti gue na nduzu lakue.

²⁵So Barnabas na Saul ahunzi kua ti ala na Jérusalem awe, ala mu Jean, so mbeni iri ti lo ayeke Marc na tere ti ala si ala kiri na Antioshe.