Read La Bible en Sango courant – Mbeti ti Nzapa Awatokua 19 Bible Online

Awatokua 19 - La Bible en Sango courant – Mbeti ti Nzapa bible

Awatokua 19

¹Na ndembe so Apolos ade na Korente, Paul ahon na ndo so ahoto ayeke daa si lo si na Efeze. Kâ, lo wara ambeni disiple,

²lo hunda ala, lo tene: “So ala ma na be so, ala wara Yingo-Vuru awe?” Ala kiri tënë na lo: “E ma tënë ti Yingo-Vuru laoko pepe!”

³Paul ahunda ala, atene: “Bateme wa laa ala wara?” Ala kiri tënë na lo: “Bateme ti Jean.”

⁴Paul atene na ala: “Jean abatize azo so aye ti zia ngbene lege ti sarango ye ti ala. Lo hunda na azo ti ma na be na lo so ayeke ga na peko ti lo, so ti tene Jésus!”

⁵Na peko ti tënë so ala ma, azo ni awara bateme na iri ti *Kota Gbia Jésus.

⁶Paul azia maboko na ndö ti ala si Yingo-Vuru aga na ndö ti ala; ala to nda ti tene tënë na ayanga nde nde si ala tene peko ti tënë ti yanga ti Nzapa.

⁷Wungo ti azo ni kue ayeke baleoko na use.

⁸Paul ayeke gue lakue na ya ti da ti sambelango Nzapa si lo yeke fa tënë ti Nzapa na mbeto pepe. Na ya ti nze ota, lo yeke gi lege ngangu ti sara titene azo ayeda na tënë ti kodro-gbia ti Nzapa.

⁹Me ambeni akpengba be ti ala si ala ke ti yeda na tënë ni. Na le ti azo kue, ala tene asioni tënë na ndö ti lege ti Kota Gbia. Paul akangbi na ala, lo mu adisiple si ala sigigi; na ya ti lango oko oko, lo yeke tene tënë na ala na ya ti da-mbeti ti Tiranos.

¹⁰Ye so asara ngu use. Tongaso azo ti Azii kue, azuife na azo ti amara nde awara lege ti ma tënë ti Kota Gbia.

¹¹Na lege ti Paul, Nzapa asara ambeni ye ti kpene so zo abaa laoko pepe.

¹²Nilaa azo ayeke mu abongo wala siriki so andu tere ti Paul, ala ga na ni na azo ti kobela si kobela ti azo ni akai, asioni yingo asigigi na ya ti ala.

¹³Ambeni zuife so ayeke fono na ya ti akodro nde nde ti tumba asioni yingo amu nga iri ti Jésus ti tumba na asioni yingo na tere ti azo. Ala yeke tene na asioni yingo, ni atene: “Na iri ti Jésus so Paul ayeke fa tënë ti lo, mbi mu yanga na ala, ala sigigi!”

¹⁴Mbeni kota wayango-sandaga ti azuife so iri ti lo Seva ayeke na amolenge-koli mbarambara; ala laa ayeke sara ye ni so.

¹⁵Me mbeni lâ, sioni yingo ni atene na ala: “Mbi hinga Jésus, mbi hinga tënë ti Paul; me ala yeke ti ala azo wa?”

¹⁶Koli so ayeke na sioni yingo ni ati na ndö ti ala si lo hon ndö ti ala na ngangu. Lo sara sioni mingi na ala si ala londo na loro na da ti lo, bongo azi na tere ti ala, tere ti ala kue gi ka.

¹⁷Azo ti gbata ti Efeze, azuife na azo ti amara nde ama tënë ti ye so; mbeto agbu ala kue si ala sepela iri ti *Kota Gbia Jésus.

¹⁸Azo mingi so ama na be aga si ala fa na le ti azo kue aye ti sioni so ala sara.

¹⁹Azo mingi so ayeke sara ye ti mazi abongbi abuku ti ala aga na ni si ala gbi ni na le ti azo kue. A diko ngere ti abuku ni kue si alingbi na ale ti nginza saki baleoku.

²⁰Nilaa na lege ti ngangu ti Kota Gbia, tënë ti Nzapa asi na ndo kue si ngangu ni ayeke gue guengo na nduzu.

²¹Na peko ti aye so asi, Paul aleke be ti lo ti hon na asese ti Masedoane na ti Akayi ti gue na Jérusalem. Lo tene: “Tongana mbi si kâ, alingbi mbi gue nga na Rome.”

²²Tongaso lo tokua na Masedoane Timothée na Eraste, ala so ayeke mu maboko na lo, me lo ngba ti lo kete na sese ti Azii.

²³Na ndembe ni so, kota wusuwusu alondo na Efeze ndali ti lege ti *Kota Gbia.

²⁴Mbeni zo ti lekengo aye na lôro so iri ti lo Demetrius ayeke leke akete da ti nzapa-wali Artemis na wen ti nginza. Tongaso lo yeke futa azo ti kua ni na gba ti nginza.

²⁵Lo bongbi azo ti kua ni na ambeni zo so ayeke sara mara ti kua ti ala ni so si lo tene na ala: “A-ita ti mbi, ala hinga so e yeke baa nzoni gi na lege ti kua so.

²⁶Fadeso, ye so asi, ala baa ni si ala ma nga tënë ni: koli so iri ti lo Paul ayeke tene, anzapa so azo ayeke leke ayeke anzapa oko pepe si lo sara kue titene azo mingi ayeda ti mu peko ti lo. Azo ti Efeze ge na ala ti sese ti Azii nga amu peko ti lo.

²⁷Ye so lo yeke tene alingbi ti buba gi iri ti kua ti e pepe, me alingbi ti sara si da ti Artemis, kota nzapa-wali aga nga buba ye na le ti azo si gonda ti lo ahunzi; Artemis so azo ti Azii na ti dunia kue ayeke voro lo so.”

²⁸So azo ni ama tënë so, ngonzo ti ala alondo tongana wâ si ala to nda ti dekongo, atene: “Artemis ti Efeze ayeke kota mingi!”

²⁹Wusuwusu amu ya ti gbata ni kue. Azo kue amu loro ti gue na kota ndo so azo ti gbata ni ayeke bongbi ka tere daa. Ala gbu Gaius na Aristarke, azo ti Masedoane use so amu peko ti Paul na ya ti tambula ti lo, ala gboto ala si ague na ala na kota ndo ni so.

³⁰Paul aye ti gue na ya ti bongbi ti azo ni, me adisiple ake na lo.

³¹Ambeni kota zo ti sese ti Azii so aye tënë ti Paul, ala nga atokua yanga na lo si ala voro lo ti gue kâ pepe.

³²Na ndembe ni so, li ti gba ti azo ni aga kirikiri: ambeni ayeke dekongo si ayeke tene ge nde, ambeni ayeke tene ti ala kâ nde. Mingi ti azo ni ahinga nda ti tënë so ala bongbi ndali ni pepe.

³³Azuife amu Alexandre azia lo na le ti azo, ambeni zo ni afa nda ti tënë ni na lo. Tongaso Alexandre asara maboko ti lo na azo ni titene ala duti kpoo si lo fa na ala nda ti tënë ni.

³⁴Me so azo ni ahinga atene, lo yeke zuife, ala kue adekongo nduru na ya ti ngbonga use, atene: “Artemis ti Efeze ayeke kota mingi!”

³⁵Wakuasu ti gbata ni awara lege ti sara si gba ti azo ni akai, lo tene: “A-ita ti mbi, azo ti Efeze, azo kue ahinga atene, gbata ti Efeze laa ayeke gbata ti Artemis, kota nzapa-wali nga na yanda ti lo so alondo na yayu ati na sese!

³⁶Zo oko alingbi ti bere tënë so pepe. Alingbi ala duti kpoo, ala sara ye ti kirikiri pepe.

³⁷Ala ga na akoli so ge senge senge, akoli ni asara ye ti sioni na nzapa-wali ti e pepe, ala zonga nga lo pepe.

³⁸Tongana Demetrius na azo so lo na ala ayeke sara kua ayeke na tënë na mbeni zo, azo ti fango ngbanga ayeke daa, alango ti fango ngbanga ayeke daa: ala gue, afa tënë ni kâ!

³⁹Tongana ala yeke na mbeni tënë nde, fade a yeke leke ni na ya ti bongbi ti azo so ndia amu lege ni na ala.

⁴⁰Biani, ndali ti ye so asi laso so, fade a yeke bi tënë na li ti e atene, e laa e sara wusuwusu. Nda ti bongbingo tere ti e ni ayeke daa oko pepe, e lingbi nga ti wara mbeni tënë ti kiri na ni pepe.”

⁴¹Na peko ti tënë so, wakuasu ni atene na azo ti bongbi ni ti gue.