Read La Bible en Sango courant – Mbeti ti Nzapa Awatokua 22 Bible Online

Awatokua 22 - La Bible en Sango courant – Mbeti ti Nzapa bible

Awatokua 22

¹“Ababâ, a-ita, ala ma tënë so mbi ye ti tene na ala na ndö ti tënë so ala bi na li ti mbi so.”

²So ala ma lo yeke tene tënë na ala na yanga ti *arameen, ala kue aduti kpoo, ndo ade ngii. Paul atene:

³“Mbi yeke zuife, a du mbi na Tarse, na sese ti Silisii, me mbi kono ge na Jérusalem na gbe ti wafango-ye Gamaliel. Mbi manda ti bata lege ti ndia ti akotara ti e mbirimbiri si nzara ti mbi kue ayeke ti sara kua ti Nzapa tongana ti so ala kue ayeke sara ni laso.

⁴Mbi sara ngangu na azo so amu lege ti *Kota Gbia si ambeni awara kuâ. Mbi gbu akoli na awali si mbi bi ala na da ti kanga.

⁵Kota wayango-sandaga na bongbi ti *akangba kue alingbi ti fa so, tënë so mbi yeke tene ayeke taa-tënë. Ala laa amu na mbi lani ambeti so ala tokua na a-ita, azuife ti Damas. Nilaa mbi gue kâ ti gbu azo ni ti kanga ala na zingiri ti kiri na ala na Jérusalem titene a sara pasi na ala.”

⁶“So mbi yeke na lege si mbi ga nduru na Damas, nduru na bekombite, mo ye ti baa, mbeni lumiere alondo na nduzu, aza na tere ti mbi kue.

⁷Mbi ti na sese si mbeni go atene na mbi: ‘Saul, Saul, mo yeke sara ngangu na mbi ngbanga ti nyen?’

⁸Mbi hunda ndo, mbi tene: ‘Mo yeke zo wa, *Kota Gbia?’ Go ni atene: ‘Mbi Jésus ti Nazaret laa mo yeke sara ngangu na mbi so.’

⁹Azo so ayeke na tere ti mbi abaa lumiere ni, me ala ma go so ayeke tene tënë na mbi so pepe.

¹⁰Mbi hunda ndo, mbi tene: ‘Kota Gbia, fade mbi sara nyen?’ Kota Gbia atene na mbi: ‘Londo, mo gue na Damas. Kâ, fade a yeke fa na mo ye so kue Nzapa amu yanga titene mo sara.’

¹¹Le ti mbi avuko, ngbanga ti so lumiere ni aza mingi. Tongaso amba ti mbi agbu maboko ti mbi si ala gue na mbi na Damas.

¹²“Kâ, mbeni koli ayeke daa, iri ti lo Ananias. Lo ye tënë ti Nzapa mingi si lo yeke bata *Ndia ti Moïse nzoni. Azuife so kue ayeke na Damas atene nzoni tënë ti lo mingi.

¹³Lo ga nduru na tere ti mbi si lo tene na mbi: ‘Ita Saul, kiri mo baa ndo!’ Gi na ndembe ni so, le ti mbi aga nzoni si mbi baa lo.

¹⁴Lo tene na mbi: ‘Nzapa ti akotara ti e asoro mo titene mo hinga ye so lo ye, mo baa Jésus, zo ti mbirimbiri si mo ma nga tënë so lo yeke tene na yanga ti lo wani.

¹⁵Fade mo yeke tene peko ti ye so mo hinga na ndö ti lo na azo kue, ti fa ye so mo baa na ye so mo ma.

¹⁶Nyen laa mo yeke ku fadeso? Londo, mo wara bateme, Nzapa azi siokpari ti mo na lege so mo di iri ti lo.’ ”

¹⁷“Na pekoni, mbi kiri na Jérusalem. Mbeni lâ, so mbi yeke sambela na ya ti kota da ti Nzapa, mbeni ye asi na mbi na ya ti mbeni ye tongana bango-li.

¹⁸Mbi baa *Kota Gbia si lo tene na mbi: ‘Londo, mo sigigi na ya ti gbata ti Jérusalem hio, ngbanga ti so tënë so mo hinga na ndö ti mbi si mo yeke tene na azo, ala yeke yeda ande na ni pepe.’

¹⁹Mbi kiri tënë, mbi tene: ‘Kota Gbia, ala hinga kue atene, mbi yeke gue ando na ya ti ada ti sambelango Nzapa, mbi yeke sara si a gbu azo so ama na be na mo, a bi ala na da ti kanga si a pika ala.

²⁰Na ndembe so a fâ Étienne, zo so atene na azo peko ti ye so lo hinga na ndö ti mo, mbi nga, mbi yeke lani daa. Mbi yeda na fango lo ni si mbi laa mbi bata bongo ti azo so afâ lo.’

²¹Kota Gbia atene na mbi: ‘Mo gue, ngbanga ti so mbi yeke tokua ande mo yongoro na mbage ti azo ti amara nde!’ ”

²²Azo ni ama Paul ngbii asi na ndembe so lo tene tënë so; me na pekoni, ala to nda ti dekongo ngangu, atene: “Zi mara ti zo tongaso na ndö ti dunia so! Lo lingbi ti ngba na fini pepe!”

²³Ala yeke dekongo, ala yeke bi abongo ti ala na nduzu si ala yeke tuku afuku ti sese na nduzu.

²⁴Kota komanda ti aturugu ni amu yanga titene a mu Paul ali na lo na ya ti gbagba ti aturugu ni titene a pika lo si lo fa na ala nda ti tënë so azuife ayeke dekongo na li ti lo ngbanga ni so.

²⁵Me so a kanga lo titene a pika lo, Paul atene na kapita ti aturugu so asara kua na lango ni so, atene: “Mbeni zo ti Rome so ade ti fâ ngbanga na li ti lo pepe, a mu na ala lege ti pika lo?”

²⁶So kapita ti aturugu ni ama tënë so, lo gue, lo baa kota komanda ti aturugu si lo hunda lo, lo tene: “Nyen laa mo yeke sara so? Koli so ayeke zo ti Rome!”

²⁷Tongaso kota komanda ni ague na tere ti Paul si ahunda lo, atene: “Tene na mbi taa-tënë: mo yeke zo ti Rome?” Paul akiri tënë: “Een!”

²⁸Kota komanda ni atene: “Mbi ga ti mbi zo ti Rome, ngbanga ti so mbi futa mbeni kota nginza.” Paul akiri tënë, atene: “Ti mbi, a du mbi dungo na ni.”

²⁹Gi hio tongaso, azo so aye fade ti pika lo titene lo tene tënë so, ala zia lo. So kota komanda ni ahinga atene, Paul ayeke zo ti Rome si lo kanga lo na zingiri, mbeto agbu lo.

³⁰Kota komanda ti aturugu ni aye ti hinga taa nda ti tënë so azuife ayeke bi na li ti Paul so. Tongaso, lango oko na pekoni, lo zi azingiri na tere ti Paul si lo mu yanga titene akota wayango-sandaga na azo ti *Kota Bongbi ti Fango Ngbanga kue abongbi tere. Na pekoni, lo mu Paul si lo zia lo luti na dawa ti ala.