Read La Bible en Sango courant – Mbeti ti Nzapa Awatokua 23 Bible Online

Awatokua 23 - La Bible en Sango courant – Mbeti ti Nzapa bible

Awatokua 23

¹Paul abaa ndo na le ti azo ti *Kota Bongbi ti Fango Ngbanga ni mbirimbiri si lo tene: “A-ita, na ngoi so mbi mu peko ti Nzapa ngbii asi laso, na be ti mbi, mbi baa mbeni sioni ye ayeke na li ti mbi oko pepe.”

²Me kota wayango-sandaga Ananias amu yanga na azo so ayeke sara kua na tere ti lo ti pika yanga ti Paul.

³Tongaso Paul atene na lo: “Mo, so mo yeke tongana dere ti da so a sara mbamba daa so, fade Nzapa ayeke pika mo! Mo duti ti fâ ngbanga ti mbi na lege ti ndia, me mo zia ndia ni awe si mo mu yanga titene a pika mbi!”

⁴Azo so aduti na ya ti ngbanga ni atene na Paul: “Mo yeke zonga kota wayango-sandaga ti Nzapa!”

⁵Paul akiri tënë, atene: “A-ita, mbi hinga fade pepe, mbi tene, lo yeke kota wayango-sandaga. Biani, Mbeti ti Nzapa atene: ‘Mo tene sioni tënë na tere ti makonzi ti mara ti mo pepe.’ ”

⁶So Paul ahinga atene, ambeni zo ni ayeke *asadusien si ambeni ayeke *afarizien, lo dekongo na azo ti Kota Bongbi ti Fango Ngbanga ni, lo tene: “A-ita, mbi yeke farizien, mbi yeke molenge ti afarizien. Ndali ti so mbi yeke zia be ti mbi ti ku zingongo ti akuâ si a ga na mbi na gbe ti ngbanga so.”

⁷So lo de ti hunzi tënë ti lo ni pepe, papa alondo na popo ti afarizien na asadusien si popo ti ala akangbi.

⁸Asadusien atënë ti ala atene zingongo ti akuâ ayeke daa pepe, *ange wala yingo ayeke nga daa pepe. Ti afarizien ala tene aye so kue ayeke daa.

⁹Dekongo ni ahon ndoni si ambeni wafango-ndia so ayeke na ya ti bongbi ti afarizien alondo si ala tene na kuru go, atene: “E wara mbeni tënë ti sioni na li ti koli so pepe. Mbeni yingo wala mbeni ange laa atene tënë na lo? E hinga so pepe.”

¹⁰So papa ni aga ngangu, mbeto asara kota komanda ti aturugu ni ngbanga ti ala suru ya ti Paul. Tongaso lo mu yanga na aturugu ti mu Paul na popo ti azo ni ti sigigi na lo ti gue na lo na ya ti gbagba ti aturugu.

¹¹Na bi ni, *Kota Gbia aluti na tere ti Paul si lo tene na lo: “Gbu ngangu! Mo fa awe peko ti ye so mo hinga na ndö ti mbi na Jérusalem. Alingbi mo sara nga tongaso na Rome.”

¹²So ndo ahan awe, ambeni zuife abongbi tere si ala leke tënë: ala deba yanga ti ala, atene, ala yeke te kobe wala ala yeke nyon nga ngu pepe ngbii ala fâ Paul si.

¹³Li ti azo so kue abongbi si aleke tënë so ahon baleosio.

¹⁴Ala gue, abaa akota wayango-sandaga na *akangba si ala tene: “E deba yanga ti e na le ti azo kue titene e te kobe wala e nyon nga ngu pepe ngbii e fâ Paul si.

¹⁵Tongaso, ayeke nzoni ala na azo ti *Kota Bongbi ti Fango Ngbanga, ala tokua na kota komanda ti aturugu ti Rome titene a mu Paul, a ga na lo. Ala tene, ala ye ti hinga ambeni tënë na ndö ti lo nzoni. Ti e, e yeke leke tere ti fâ lo kozoni si lo si.”

¹⁶Me molenge-koli ti ita ti Paul ti wali ama tënë ti ye so ala yeke leke so si lo gue na ya ti gbagba ti aturugu, lo tene tënë ni na Paul.

¹⁷Tongaso Paul airi mbeni kapita ti aturugu oko si lo tene na lo: “Gue na molenge-koli so na kota komanda ti aturugu, lo yeke na mbeni tënë ti tene na lo.”

¹⁸Kapita ti aturugu amu molenge-koli ni, ague na lo na kota komanda si lo tene: “Paul, zo ti kanga airi mbi si lo hunda mbi ti ga na molenge-koli so na mo, ngbanga ti so lo yeke na mbeni tënë ti tene na mo.”

¹⁹Kota komanda ni agbu maboko ti molenge ni, lo gue na lo yongoro kete si lo hunda lo, lo tene: “Tënë ti nyen laa mo ye ti tene na mbi?”

²⁰Lo kiri tënë, lo tene: “Amakonzi ti azuife ama tere ti hunda mo ti mu Paul ti gue na lo na gbe ti azo ti *Kota Bongbi ti Fango Ngbanga kekereke. Ala ye ti handa mo atene, bongbi ti azo ni aye ti hinga ambeni tënë na ndö ti lo nzoni.

²¹Me mo yeda na tënë ti ala pepe, ngbanga ti so ambeni koli, li ti ala ahon baleosio, ayeke honde ande tere ti ala ti ku lo. Ala deba yanga ti ala atene, ala yeke te kobe wala ala yeke nyon nga ngu pepe, ngbii ala fâ Paul si. Ala leke tere ti ala awe si ala yeke ku gi tënë ti yanga ti mo.”

²²Kota komanda ti aturugu ni atene: “Tënë so mo tene na mbi so, mo tene tënë ni na mbeni zo pepe.” Na pekoni, lo zia molenge-koli ni ague.

²³Na pekoni, kota komanda ti aturugu ni airi akapita ti aturugu ti lo use si lo tene na ala: “Ala leke aturugu ngbangbo use ti gue na Sezare, ala na aturugu ti kpengo na mbarata balembarambara na aturugu ngbangbo use so ayeke tiri na likongo. Ala leke tere ti ala ti londo na ngbonga gumbaya ti bi so.

²⁴Ala leke nga ambeni mbarata titene ayo Paul ague na lo na nzoni tere na govoronere Félix.

²⁵Kota komanda ti aturugu asara mbeti; na ya ni lo tene:

²⁶“Mbi Claude Lisias, mbi tokua mbeti so na govoronere Félix. Mbi bara mo, gbia.

²⁷Azuife agbu koli so si ala ye ti fâ lo. Mbi ma a tene, lo yeke zo ti Rome; mbi gue na aturugu ti mbi, e zi lo na maboko ti ala.

²⁸So mbi ye ti hinga tënë so ala yeke bi na li ti lo, mbi gue na lo na gbe ti azo ti *Kota Bongbi ti Fango Ngbanga ti ala.

²⁹Mbi baa so lo sara nga mbeni ye so alingbi na kuâ wala na kanga pepe. Tënë so ala yeke bi na li ti lo ayeke gi na ndö ti tënë ti ndia ti ala wani.

³⁰Me so mbi ma a tene, ambeni zuife ayeke leke tënë ti fâ lo, mbi tokua lo na mo. Mbi hunda na azo ti bingo tënë na li ti lo ti gue na tënë ti lo na gbe ti mo.”

³¹Aturugu ni asara ye alingbi na yanga so a mu na ala: ala mu Paul na bi ague na lo ngbii asi na Antipatris.

³²Na ndade ni, ala zia aturugu ti kpengo na mbarata ti gue na lo si tanga ti aturugu ni akiri ti ala.

³³So ala si na Sezare awe, aturugu ti kpengo na mbarata amu mbeti ni na govoronere si ala fa nga Paul na lo.

³⁴Govoronere adiko mbeti ni si lo hunda Paul atene, lo yeke zo ti sese wa? So lo hinga atene, Paul ayeke zo ti Silisii,

³⁵lo tene: “Fade mbi yeke ma tënë ti yanga ti mo tongana azo so abi tënë na li ti mo aga si.” Na pekoni, lo mu yanga titene a bata Paul na yangbo ti Herode.