Read La Bible en Sango courant – Mbeti ti Nzapa Awatokua 27 Bible Online

Awatokua 27 - La Bible en Sango courant – Mbeti ti Nzapa bible

Awatokua 27

¹So a mu yanga titene e mu mangboko ti gue na Italii, a mu Paul na ambeni zo ti kanga, a zia ala na maboko ti mbeni kapita ti aturugu so iri ti lo Yulius, kapita ti bongbi ti aturugu so a iri ni “Bongbi ti aturugu ti kota gbia.”

²E ko na ya ti mbeni mangboko ti gbata ti Adramite so ayeke gue na mbage ti Azii. E na Aristarke laa e gue; lo yeke zo ti gbata ti Tesalonike, na sese ti Masedoane.

³Lango oko na pekoni, e si na Sidon. Yulius so ayeke sara nzoni be na Paul, azia lo ti gue ti baa azo so lo na ala aye tere titene ala mu na lo ambeni ye so atia lo.

⁴E londo na ndo so, e mu le ti ngu na mbage ti zoa ti Shipre so pupu ayeke ya daa pepe; e hon kâ ti kpe pupu so ayeke ga na ngangu na mbage ti e.

⁵E fâ kota ngu-ingo, e hon na tere ti asese ti Silisii na Panfilii si e si na gbata ti Mira, na sese ti Lisii.

⁶Na ndo so, kapita ti aturugu ni awara mbeni mangboko ti Aleksandrii so ayeke gue na Italii si lo zia e na ya ni.

⁷E gue gi yeke-yeke na ya ti alango mingi si e si na gbata ti Kinide. Tambula ni aduti ngangu, angba kete, e si kâ pepe. Na ndo so, pupu akanga lege na e biani ti hon na lege so e mu so, nilaa e hon na mbeni yanga ti sese ti zoa ti Krete so iri ni Salmone, e ngoro na mbage ti zoa ni, na mbage ti Mbongo, ndo so pupu ayeke ya daa pepe.

⁸E hon na tere ti zoa ni si e si na mbeni ndo so iri ni Nzoni-Ndo-ti-Lutingo-ti-Mangboko, nduru na gbata ti Lase. Tambula ni aduti ngangu, angba kete, e si kâ pepe.

⁹So alango mingi ahon awe, tambulango na le ti ngu aga sioni, ngbanga ti so ngoi ti de asi awe. Andaa lango ti kengo kobe na ngoi ni so ahon awe, nilaa Paul amu wango na ala, lo tene:

¹⁰“A-ita, mbi baa so tambula ni ayeke duti ande ngangu: mangboko ni na akungba ti ya ni kue ayeke buba mingi, e nga, e yeke na ya ti kuâ.”

¹¹Me kapita ti aturugu aye gi ti ma tënë ti kapita ti mangboko ni na ti wa ti mangboko ni ahon wango ti Paul.

¹²Na ndö ni kue, ndo ti lutingo ti amangboko ni ayeke nzoni pepe titene ala luti daa na ngoi ti de. Ndani laa mingi ti azo ti ya ti mangboko ni aye ti londo na ndo so ti mu le ti ngu ti gue na Fenize tongana lege ayeke daa. Fenize ayeke mbeni ndo ti lutingo ti amangboko so ayeke na zoa ti Krete, so abaa le na Mbongo-Do na Banga-Do. Ala ye ti duti kâ ngbii ngoi ti de ahon si.

¹³Mbeni kete pupu alondo na mbage ti Mbongo si ayeke ya; azo ti mangboko ni abaa ti ala atene, ala yeke gue ande ti si na ndo so ala leke be ti ala ti si daa. Nilaa ala zi nengo wen so a yeke bi ka na ya ti ngu titene mangboko ni aluti, ala mu yanga ti ngu ti Krete ti gue.

¹⁴Me gi kete na pekoni, mbeni kota pupu so a iri ni Pupu-ti-Banga-To alondo na mbage ti zoa ni si ayeke ya ngangu.

¹⁵Pupu ni amu mangboko ni ti hon na ni. So e gi lege gbaa ti hon na mangboko ni na mbage so pupu ni alondo daa si ayeke ga so, e zia ni titene pupu amu ni ahon na ni kirikiri.

¹⁶E hon na mbage ti Mbongo ti mbeni kete zoa so a iri ni Koda. E sara ngangu mingi si e wara lege ti mu kete ngo so a kanga na tere ti mangboko ni; angba kete ka e ha gbaa.

¹⁷Azo ti kpengo na mangboko ni amu kete ngo ni azia na ya ti mangboko ni. Na pekoni, ala mu mbeni kota kamba si ala kanga na tere ti mangboko ni kue. Ala sara mbeto titene mangboko ni ague, aluti na ndö ti mbutu ti yanga ti ngu ti kodro ti Libii. Nilaa ala mu kota nengo keke so a kanga na tere ti mangboko ni, ala bi na ya ti ngu titene mangboko ni ague mbage na mbage pepe; me pupu angba ti mu mangboko ni si ayeke hon na ni.

¹⁸Lango oko na pekoni, kota pupu ni angba ti yingi e ngangu. Ndani laa azo ti kua ni ato nda ti bi akungba ti ya ti mangboko ni na ya ti ngu.

¹⁹Na lango ota ni, ala mu aye ti kua ti ya ti mangboko ni na maboko ti ala wani si ala tuku ni na ya ti ngu.

²⁰Na ya ti alango mingi, e baa lâ wala atongoro pepe. Pupu ni angba ti ya ngangu mingi. E tënë ti e, e tene e yeke soo kuâ pepe.

²¹Asara lango mingi, azo ti ya ti mangboko ni ate kobe pepe. Paul aluti na dawa ti ala si lo tene na ala: “A-ita, tongana ala ma fade wango ti mbi si ala ngba na Krete, ka e baa pasi si aye abuba tongaso pepe.

²²Me fadeso, mbi voro ala: ala sara mbeto pepe! Biani, zo oko na popo ti ala ayeke kui pepe, gi mangboko ni laa ayeke buba.

²³Na bi so, mbeni *ange ti Nzapa ti mbi, so mbi yeke sara na lo, asi na mbi

²⁴si lo tene na mbi: ‘Paul, mbeto asara mo pepe! Alingbi mo gue, mo si na gbe ti kota gbia ti Rome titene lo fâ ngbanga ti mo. Ndali ti mo, fade Nzapa ayeke bata azo so kue ayeke na ya ti mangboko ni.’

²⁵Tongaso, a-ita, ala gbu ngangu! Biani, mbi zia be ti mbi na Nzapa: ye ni ayeke si ande gi tongana ti so lo tene na mbi.

²⁶Fade mangboko ni ayeke gue ti bi e na ndö ti mbeni zoa.”

²⁷Na bi ti lango baleoko na osio ni, pupu ni angba ti gue na e kirikiri na le ti kota ngu-ingo ti Mediterane. Nduru na be ti bi, azo ti kpengo na mangboko ni ahinga atene, ala ga nduru na mbeni kuru sese awe.

²⁸Tongaso, ala mu kamba so a kanga nengo wen daa si ala bi na ya ti ngu, ala baa so ngu ni alinda alingbi na metere baleota na mbarambara. Ala hon kete, ala kiri abi nengo wen ni, ala baa so ngu ni alinda alingbi na metere baleuse na miombe.

²⁹Mbeto titene mangboko ni ague, akpo mbeni têne asara ala. Ndani laa ala bi anengo wen osio na ya ti ngu na mbage ti peko ti mangboko ni titene aluti. Ti be ti ala, ala ye titene ndo ahan hio.

³⁰Me azo ti kpengo na mangboko ni ayeke gi lege ti kpe ti zia mangboko ni. Ala bi kete ngo ni na le ti ngu si ala handa azo atene, ala yeke gue ti bi ambeni nengo wen na ya ti ngu na mbage ti li ti mangboko ni.

³¹Me Paul atene na kapita ti aturugu nga na aturugu, atene: “Tongana azo so angba na ya ti mangboko ni pepe, fade ala, aturugu, ala lingbi ti soo kuâ pepe.”

³²Aturugu ni afâ akamba so agbu kete ngo ni si ala zia titene asua ahon.

³³So ndo aga nduru ti han, Paul ahunda na azo kue ti te kobe; lo tene: “Laso asara lango baleoko na osio so ala yeke ku titene le ti ngu ade, ala te mbeni ye oko pepe.

³⁴Tongaso mbi hunda na ala ti te kobe; ala te ni si ala soo kuâ. Fade kua ti li oko ti mbeni zo na popo ti ala ayeke ti pepe.”

³⁵Na peko ti tënë so, Paul amu mapa, lo mu singila na Nzapa na dawa ti ala kue, lo fâ ya ni si lo to nda ti te.

³⁶Be ti ala kue akiri awara ngangu si ala te nga ye.

³⁷Li ti e kue na ya ti mangboko ni ayeke ngbangbo use na balembarambara na omene.

³⁸So ala kue ate kobe si ya ti ala asi awe, ala mu tanga ti ale ti *ble ni atuku na ya ti ngu titene mangboko ni ayapu.

³⁹So ndo ahan awe, azo ti kpengo na mangboko ni abaa sese, ala hinga ni pepe, me ala baa mbeni ndo so mbutu ayeke daa, nilaa ala ye ti gue na mangboko ni kâ, tongana lege ayeke daa.

⁴⁰Ala zi anengo wen ti mangboko ni, ala zia na ya ti ngu; ala zi nga akamba ti *akâî ti mangboko ni. Na pekoni, ala kanga kota bongo na nduzu na dawa ti mangboko ni titene pupu amu mangboko ni ahon na ni na mbage ti mbutu ni.

⁴¹Me ala gue, asi na ndö ti mbeni mbutu so ngu alinda na tere ni mbage na mbage. Li ti mangboko ni ali na ya ti mbutu si lege titene mangboko ni ahon ayeke daa pepe. Na mbage, ngangu ti *amapo akungbi peko ti mangboko ni kue.

⁴²Aturugu aye ti fâ azo ti kanga ni kue si mbeni oko afâ ngu akpe pepe.

⁴³Me kapita ti aturugu ni aye ti soo fini ti Paul, nilaa lo ke na ala ti fâ azo ti kanga ni. Tongaso lo mu yanga titene azo so ahinga ngu, ala ti na ya ti ngu kozoni ti hon na yanga ti ngu ni.

⁴⁴Na pekoni, tanga ti azo ni amu peko ti ala, ambeni na ndö ti *amabaya, ambeni na ndö ti anduru mbage ti mangboko so afâ so. Na lege so laa e kue, e si na sese na nzoni tere.