Read La Bible en Sango courant – Mbeti ti Nzapa Awatokua 3 Bible Online

Awatokua 3 - La Bible en Sango courant – Mbeti ti Nzapa bible

Awatokua 3

¹Mbeni lâ, Pierre na Jean ayeke gue na kota da ti Nzapa ti sambela na ngbonga ota ti peko ti bekombite.

²Mbeni koli so a du lo na bubango gere ayeke na yanga ti kota da ti Nzapa so iri ni “Pendere-yanga-da”. Lakue azo ayeke ga na lo azia lo na yanga ti da ni titene lo iri ye na maboko ti azo so ayeke li na ya ti kota da ti Nzapa.

³So lo baa Pierre na Jean na lingo ni, lo hunda ala titene ala mu na lo mbeni ye.

⁴Ala baa le ti lo ngbii si Pierre atene na lo: “Baa e si!”

⁵Tongaso lo baa ala kpoo; lo baa ti lo, lo tene, ala yeke mu mbeni ye na lo.

⁶Me Pierre atene na lo: “Mbi yeke na nginza wala lôro pepe, me ye so mbi yeke na ni, mbi yeke mu na mo: na iri ti Jésus Christ, zo ti Nazaret, londo, mo tambula!”

⁷Na pekoni, Pierre agbu lo na maboko ti koli si lo mu lo na nduzu. Gi hio tongaso, agere ti koli so akpengba nzoni.

⁸Lo huru na nduzu, lo luti na ndö ti gere ti lo si lo to nda ti tambula. Lo na ala ali na ya ti kota da ti Nzapa, lo yeke tambula, lo yeke huru si lo yeke sepela Nzapa.

⁹Azo kue abaa lo, lo yeke tambula si lo yeke sepela Nzapa.

¹⁰So azo ahinga atene, koli so ayeke kozoni na tere ti Pendere-yanga-da ti iri ye na maboko ti azo so laa, be ti ala ado, li ti ala kue akpe ngbanga ti ye so asi na lo.

¹¹Koli ni angba gi na tere ti Pierre na Jean na gbe ti veranda so a iri ni Veranda ti Salomon. Be ti azo kue ado si ala kpe ague na tere ti ala.

¹²So Pierre abaa azo ni, lo tene na ala: “Azo ti Israel, ngbanga ti nyen laa be ti ala ayeke do ndali ti ye so asi so? Ala yeke baa e kpoo tongaso ngbanga ti nyen? Ala baa ti ala atene, na ngangu ti e wani wala ngbanga ti so e gbu tënë ti Nzapa mingi laa e sara titene koli so atambula?

¹³Nzapa ti Abraham, ti Isaac na ti Jacob, Nzapa ti akotara ti e, amu gonda na Jésus, zo ti kua ti lo. Me ala azo ti Israel, ala zia lo na maboko ti akota zo, ala ke lo na dawa ti Pilate, ataa so Pilate aye ti zi lo.

¹⁴Lo so lo yeke nde, lo yeke nzoni kue si lo yeke mbirimbiri, ala ke lo si ala hunda titene Pilate azi na ala zo ti fango zo ti zia ngia na be ti ala.

¹⁵Ala fâ Makonzi so ayeke mu fini na zo, me Nzapa azingo lo na kuâ; e wani, e baa ni na le ti e.

¹⁶Koli so ala yeke baa lo si ala hinga lo so, ngangu akiri na ya ti tere ti lo ndali ti so lo ma na be na iri ti Jésus. Na lege so lo ma na be na Jésus, tere ti lo akiri aga nzoni; ye ni laa ala kue ayeke baa so.

¹⁷“Fadeso a-ita, mbi hinga, mbi tene, ye so ala na amakonzi ti ala asara na Jésus, ala hinga ni pepe.

¹⁸Na lege so laa Nzapa asara ye alingbi na tënë so lo zia ando na yanga ti awayanga ti lo si ala tene. Lo tene: fade *Mesii ayeke baa pasi.

¹⁹Tongaso, ala zia ngbene lege ti sarango ye ti ala, ala kiri na lege ti Nzapa, tongaso si lo zi siokpari ti ala.

²⁰Tongaso fade *Kota Gbia ayeke mu na ala mbeni ngoi titene yingo ti ala awara ngangu. Lo yeke tokua Jésus na ala, lo so lo yeke Christ so a soro lo kozoni ndali ti ala.

²¹Christ ayeke ngba na yayu ngbii asi na ngoi so fade Nzapa akiri aleke aye kue na legeni. Ngoi ni so, Nzapa atene tënë ni ando na yanga ti awayanga ti lo so lo zia ala nde ndali ti lo.

²²Moïse atene ando atene: ‘Fade Nzapa, Kota Gbia ti ala ayeke tokua mbeni wayanga ti lo na ala tongana ti so lo tokua mbi; wayanga-Nzapa ni ayeke mbeni zo ti kodro ti ala wani. Alingbi ala sara ye so kue lo yeke tene na ala.

²³Zo so kue ake yanga ti wayanga-Nzapa so, fade a yeke zi lo na popo ti azo ti Nzapa si a yeke fâ lo.’

²⁴Ti londo na Samuel na awayanga-Nzapa so aga na peko ti lo, ala kue afa tënë ti aye so ayeke si na ya ti alango so e yeke daa fadeso.

²⁵Atënë so Nzapa azia ando na yanga ti awayanga ti lo si ala tene so ayeke ndali ti ala, azo ti Israel. Ala li na ya ti *mbuki so Nzapa asara na akotara ti ala so awe. Lo tene na Abraham: ‘Na lege ti mbeni *hale ti mo, mbi yeke sara tufa na ndö ti asewa ti dunia kue.’

²⁶Ndali ti ala, azo ti Israel, Nzapa asoro zo ti kua ti lo si lo tokua lo kozoni ti sara tufa na ndö ti ala tongana ala oko oko azia ngbene lege ti sarango ye ti ala.”