Read La Bible en Sango courant – Mbeti ti Nzapa Awatokua 4 Bible Online

Awatokua 4 - La Bible en Sango courant – Mbeti ti Nzapa bible

Awatokua 4

¹Na ndembe so Pierre na Jean angba ti tene tënë na azo ni, awayango-sandaga na makonzi ti aturugu ti kota da ti Nzapa na *asadusien asi.

²Be ti ala aso mingi, ngbanga ti so Pierre na Jean ayeke fa ye na azo atene, Jésus azingo na kuâ awe. Tongaso, fade azo ayeke zingo nga na kuâ.

³Azo ni agbu ala, azia ala na da ti kanga ti ku na ndaperere, ngbanga ti so lâ akui awe.

⁴Me na popo ti azo so ama tënë ni, ambeni mingi ama na be si wungo ti azo ni aga nduru na saki oku.

⁵So ndo ahan awe, amakonzi ti azuife, *akangba na awafango-ndia abongbi tere na Jérusalem.

⁶Kota wayango-sandaga Hane ayeke daa, lo na Kaife, Jean, Alexandre na ambeni zo ti sewa ti kota wayango-sandaga ni.

⁷Ala zia *awatokua ni aluti na dawa ti ala si ala hunda ala, atene: “Na iri ti zo wa, wala na ngangu ti zo wa laa ala sara ye so?”

⁸Tongaso Yingo-Vuru asi Pierre si lo tene na ala: “Ala amakonzi ti azuife na akangba,

⁹a yeke hunda e laso ndali ti nzoni ye so e sara na koli so gere ti lo abuba, a yeke hunda nga e na lege so tere ti lo aga nzoni.

¹⁰Ala na azo ti Israel kue, alingbi ala hinga atene, Jésus Christ, zo ti Nazaret, lo so ala fâ lo na ndö ti keke ti kroa si Nzapa azingo lo na kuâ, ngangu ti iri ti lo laa asara si koli so aluti na popo ti ala na nzoni tere so.

¹¹Jésus so laa Mbeti ti Nzapa atene tënë ti lo, atene: ‘Têne so azo ti sarango da ake ni, ni laa akiri aga ngangu têne ti gere ti da ni.’

¹²Zo alingbi ti soo kuâ na lege ti mbeni iri nde pepe, ngbanga ti so na ndö ti dunia kue, mbeni iri nde so Nzapa amu ni na azo titene e soo kuâ na lege ni ayeke daa pepe.”

¹³So azo ti fango ngbanga ni abaa Pierre na Jean ayeke tene tënë na mbeto pepe si ala hinga nga atene, ala yeke gi asenge zo so amanda mbeti pepe, li ti ala kue akpe. Ala hinga atene, akoli so ayeke ando na tere ti Jésus.

¹⁴So ala baa nga koli so gere ti lo aga nzoni, lo yeke luti na tere ti Pierre na Jean, ala wara mbeni tënë ti tene pepe.

¹⁵Tongaso azo ni amu yanga titene a sigigi na ala na ya ti *Kota Bongbi ti Fango Ngbanga ni. Na pekoni, azo ni ato nda ti leke tënë na popo ti ala,

¹⁶ala tene: “Fade e yeke sara nyen na azo so? Azo ti Jérusalem kue ahinga atene, na lege ti ala laa ye ti kpene so asi, e lingbi ti bere ni pepe.

¹⁷Me titene tënë so ahon yongoro na popo ti azo pepe, alingbi e suku na akoli so si ala kiri atene tënë ti iri ti Jésus na mbeni zo oko pepe.”

¹⁸Tongaso ala iri Pierre na Jean si ala ke na ala na kuru go, atene: “Ala kiri adi iri ti Jésus wala ala kiri afa ye na iri ti lo oko pepe.”

¹⁹Me Pierre na Jean akiri tënë na ala: “Ti ma yanga ti ala wala ti ma yanga ti Nzapa, so wa laa ayeke nzoni? Ala wani, ala gbu li ti ala na tënë so!

²⁰Ti e, ye so e baa si e ma awe so, e lingbi ti kanga yanga ti e na ndö ni pepe.”

²¹Tongaso azo ti fango ngbanga ni akiri asuku na ala ngangu si na pekoni, ala zi ala. Ala baa so lege ti fâ ngbanga na li ti ala ayeke daa pepe, ngbanga ti so azo kue ayeke gonda Nzapa ndali ti ye so asi.

²²Koli so tere ti lo aga nzoni na lege ti ye ti kpene so, ngu ti lo ahon baleosio.

²³Na peko ti so a zi ala awe, Pierre na Jean akiri na popo ti amba ti ala si ala fa peko ti tënë so akota wayango-sandaga na *akangba atene na ala.

²⁴So amba ti ala ama tënë so, ala bongbi yanga oko si ala sambela Nzapa, atene: “Gbia, mo laa mo sara yayu na sese, kota ngu-ingo na aye so kue ayeke na ya ni!

²⁵Na lege ti Yingo-Vuru, mo zia tënë ti mo na yanga ti kotara ti e David, zo ti kua ti mo si lo tene: ‘Ngbanga ti nyen si amara nde ayeke sara wusuwusu so? Ngbanga ti nyen si azo ti amara ayeke leke tënë na popo ti ala senge senge so?

²⁶Agbia ti sese alondo ti tiri bira, amakonzi ti akodro ama tere ti ke *Kota Gbia na *Mesii ti lo.’

²⁷“Biani, Herode na Ponse Pilate, ala na azo ti amara nde na azo ti Israel abongbi tere na ya ti gbata so, ala leke tënë na tere ti Jésus, zo ti kua ti mo so ayeke nde si ayeke nzoni kue so, lo so mo mu lo ti ga Mesii.

²⁸Tongaso ala sara ye so kue mo leke kozoni na be ti mo na lege ti ngangu ti mo.

²⁹Fadeso, Kota Gbia, mo ma atënë so ala tene ti zia mbeto na be ti e. Mo mu na e ngangu ti fa tënë ti mo na mbeto pepe.

³⁰Fa ngangu ti mo, tongaso si na iri ti Jésus, zo ti kua ti mo so ayeke nde si ayeke nzoni kue, kobela ti azo akai si aye ti kpene na aye ti dongo be aduti daa.”

³¹So ala hunzi sambela ni awe, ndo so ala bongbi daa so ayingi. Ala si na Yingo-Vuru si ala yeke fa tënë ti Nzapa na mbeto pepe.

³²Azo so ama na be gbani gbani so, tënë ti be ti ala ayeke gi oko, ye so ala ye ayeke nga gi oko. Zo oko atene pepe, atene: “Ye ti mbi ayeke gi ti mbi!” Me ye so kue ala yeke na ni, ala yeke bongbi ni si aga ye ti ala kue.

³³*Awatokua afa na ngangu mingi tënë ti zingongo ti *Kota Gbia Jésus na kuâ, Nzapa asara nzoni be mingi na ala kue.

³⁴Zo ti mawa oko ayeke na popo ti ala pepe. Biani, azo so ayeke na yaka wala na da, ala ka yaka ni wala da ni si ala ga na nginza ni,

³⁵ala zia ni na gbe ti awatokua. Na pekoni, awatokua akangbi nginza ni na popo ti azo ni, zo oko oko awara ye alingbi na ye so atia lo.

³⁶Mbeni koli ayeke daa so iri ti lo Joseph, awatokua airi lo Barnabas — nda ni atene “wamungo-wango” — , lo yeke mbeni zo ti mara ti Lévi si a du lo na Shipre.

³⁷Lo ka mbeni yaka ti lo, lo ga na nginza ni si lo zia na gbe ti awatokua.