Read La Bible en Sango courant – Mbeti ti Nzapa Awatokua 6 Bible Online

Awatokua 6 - La Bible en Sango courant – Mbeti ti Nzapa bible

Awatokua 6

¹Na ya ti alango ni so, wungo ti adisiple ayeke gue na nduzu. Azuife so ayeke tene yanga ti greke ayeke pa ala so ayeke tene yanga ti hebro, ngbanga ti so azuife so ayeke tene yanga ti hebro ayeke girisa awali-mua ti azuife so atene yanga ti greke na ndembe ti kangbingo ye ti lango oko oko.

²Tongaso *awatokua baleoko na use ahunda na adisiple kue ti bongbi tere ti ala; ala tene na ala: “Ayeke na legeni pepe titene e zia lege ti fango tënë ti Nzapa ti sara kua ti kangbingo kobe.

³A-ita, ayeke nzoni ala soro azo mbarambara na popo ti ala, azo so Yingo-Vuru asi ala, so azo ayeke tene nzoni tënë ti ala, azo ti ndara, fade e yeke zia kua so na maboko ti ala.

⁴Ti e, fade e yeke mu tere ti e kue ti sambela, ti sara kua ti fango tënë ti Nzapa.”

⁵Tënë so anzere na be ti azo ni kue si ala soro Étienne so asi singo na mabe nga na Yingo-Vuru, lo na Philippe, Prokor, Nikanor, Timon, Parmenas na Nicolas, zo ti Antioshe si lo yeke bata *Ndia ti Moïse.

⁶Azo ni afa ala na awatokua. Awatokua asambela Nzapa si azia maboko na ndö ti ala.

⁷Tënë ti Nzapa angba ti tambula na ndo kue. Na Jérusalem, wungo ti adisiple ayeke gue na nduzu, gba ti awayango-sandaga ama na be.

⁸Nzapa asara nzoni be mingi na Étienne si lo mu na lo ngangu mingi, nilaa Étienne ayeke sara akota ye ti kpene na aye ti dongo be na popo ti azo ni.

⁹Ambeni zo alondo ti *bingbi tënë na Étienne. Ala yeke azo ti da ti sambelango Nzapa so a iri ni “Da ti Sambelango Nzapa ti azo so asigigi na gbe ti ngbaa”, ala na azo ti Sirene, ti Aleksandrii, ti Silisii na ti Azii.

¹⁰Me Étienne atene tënë na lege ti ndara so Yingo-Vuru amu na lo, nilaa ala lingbi ti hon lo na tënë pepe.

¹¹Tongaso ala pete goro na ambeni zo titene azo ni atene: “E ma tënë so lo tene ti zonga Moïse na Nzapa!”

¹²Ala pusu azo ni, *akangba na awafango-ndia titene be ti ala aso. Na pekoni, ala gue, agbu Étienne na ngangu si ala gue na lo na gbe ti azo ti *Kota Bongbi ti Fango Ngbanga ti azuife.

¹³Ala gue, aga na ambeni zo na le ti ngbanga titene azo ni atene mvene na iri ti lo, atene: “Koli so ayeke tene gi sioni tënë lakue na tere ti kota da ti Nzapa nga na tere ti *Ndia ti Moïse.

¹⁴E ma, lo tene: ‘Fade Jésus, zo ti Nazaret ayeke kungbi kota da ti Nzapa si lo yeke sanze lege ti aye so Moïse afa na akotara ti e.’ ”

¹⁵Le ti azo ti Kota Bongbi ti Fango Ngbanga kue atuku gi na ndö ti Étienne. Ala baa so le ti lo aga tongana ti mbeni *ange.