Read La Bible en Sango courant – Mbeti ti Nzapa Rome 4 Bible Online

Rome 4 - La Bible en Sango courant – Mbeti ti Nzapa bible

Rome 4

¹Tongaso, fade e yeke tene nyen ndali ti kotara ti e Abraham na lege ti dutingo ti lo ti zo? Nyen laa lo wara, nyen?

²Tongana lo ga ando mbirimbiri na le ti Nzapa ndali ti anzoni ye so lo sara, ka lo lingbi fade ti gonda tere ti lo daa; me na le ti Nzapa, lo lingbi ti sara ni pepe.

³Biani, Mbeti ti Nzapa atene: “Abraham azia be ti lo na Nzapa, nilaa Nzapa abaa lo tongana zo ti mbirimbiri na lege ti mabe ti lo.”

⁴Zo so asara kua ayeke wara futa; futa so lo wara, a mu ni na lo senge senge pepe, ayeke ndali ti kua so lo sara.

⁵Me zo so asara kua pepe si lo ma na be na Nzapa so ayeke sara titene azo ti sioni aga azo ti mbirimbiri, fade mabe ti lo ayeke sara si Nzapa abaa lo tongana zo ti mbirimbiri.

⁶Nilaa David atene tënë ti nzoni duti ti zo so Nzapa abaa lo tongana zo ti mbirimbiri, ataa so zo ni asara kua pepe. David atene:

⁷“Ti ala nzoni, ala so Nzapa azi sioni na li ti ala awe, ala so lo zi siokpari ti ala awe!

⁸Ti lo nzoni, zo so *Kota Gbia adiko siokpari ti lo na li ti lo pepe.”

⁹Nzoni duti ni so ayeke gi ndali ti azo so afâ *ganza wala ayeke nga ndali ti azo so afâ ganza pepe? Biani, e tene: “Ndali ti mabe ti Abraham, Nzapa abaa lo tongana zo ti mbirimbiri.”

¹⁰Me ye ni asi lawa? Lo ga mbirimbiri kozoni si lo fâ ganza, wala na pekoni? Na pekoni pepe, me kozoni.

¹¹Na ngoi so Abraham ade ti fâ ganza pepe, lo wara mbeni nzoroko so afa atene, Nzapa abaa lo tongana zo ti mbirimbiri na lege ti mabe. Nilaa Abraham aga babâ ti azo so kue ama na be, ataa so lo de ti fâ ganza pepe si Nzapa abaa ala nga tongana azo ti mbirimbiri.

¹²Lo yeke nga babâ ti azo so kue afâ ganza awe, so ti tene ala so azia be ti ala gi na ndö ti fango ganza pepe, me ala yeke sara ye na lege ti mabe tongana babâ ti e Abraham: lo ma na be na Nzapa kozoni si lo fâ ganza.

¹³Nzapa amu zendo na Abraham na *ahale ti lo so fade dunia so ayeke ga ye ti ala. Nzapa amu zendo ni na Abraham, ngbanga ti so lo sara ye na lege ti *Ndia pepe, me ngbanga ti so Nzapa abaa lo tongana zo ti mbirimbiri na lege ti mabe ti lo.

¹⁴Tongana ayeke fade gi azo so ayeke sara ye alingbi na Ndia laa ayeke wara ande aye so Nzapa amu zendo ni, ka mabe aga senge ye si zendo ti Nzapa aga buba ye.

¹⁵Biani, Ndia ayeke sara si Nzapa asara ngonzo; me ndo so Ndia ayeke daa pepe, tënë ti kengo Ndia ayeke nga daa pepe.

¹⁶Ndani laa azo alingbi ti wara aye so Nzapa amu zendo ni gi na lege ti mabe; lo mu aye ni na ahale ti Abraham gi senge senge. Tongaso zendo ni ayeke ndali ti ahale ti Abraham kue. Ambeni zo so azia be ti ala na ndö ti *Ndia, zendo ni ayeke gi ndali ti ala oko pepe, me ayeke nga ndali ti azo so ama na be tongana Abraham, babâ ti e kue.

¹⁷Biani, Mbeti ti Nzapa atene: “Mbi sara si mo ga kotara ti gba ti amara.” Na le ti Nzapa, lo yeke taa kotara ti e ndali ti mabe ti lo. Nzapa so ayeke mu fini na akuâ, na lege ti tënë ti yanga ti lo, ye so ayeke daa pepe, lo sara si ye ni abaa gigi.

¹⁸Abraham azia be ti lo kue ti ku, ataa so mbeni ye titene lo zia be ti lo ti ku ni ayeke daa pepe. Lo ma na be si lo ga “Kotara ti gba ti amara.” Ye ni asi alingbi na tënë so Mbeti ti Nzapa atene: “Fade ahale ti mo ayeke ga mingi mingi tongaso.”

¹⁹Ngu ti Abraham aga nduru na ngu ngbangbo oko, me mabe ti lo awoko pepe. Lo baa so, lo ga nduru na kuâ awe si Sara alingbi ti du nga molenge pepe.

²⁰Me lo zia be ti lo na ndö ti zendo ti Nzapa, lo dekite pepe; lo kpengba na lege ti mabe si lo gonda Nzapa.

²¹Lo hinga biani na be ti lo so Nzapa ayeke na ngangu ti sara ye alingbi na zendo ti lo.

²²Ndani laa “Nzapa abaa lo tongana zo ti mbirimbiri.”

²³Me so Mbeti ti Nzapa atene: “Nzapa abaa Abraham tongana zo ti mbirimbiri” so, tënë ni ayeke gi ndali ti Abraham oko pepe,

²⁴ayeke nga ndali ti e so Nzapa abaa e tongana azo ti mbirimbiri na lege ti mabe ti e. Biani, e ma na be na lo so azingo Jésus, *Kota Gbia ti e na kuâ.

²⁵Lo so a mu lo ndali ti siokpari ti e, Nzapa azingo lo na kuâ ti sara si e ga azo ti mbirimbiri.