Read La Bible en Sango courant – Mbeti ti Nzapa Rome 5 Bible Online

Rome 5 - La Bible en Sango courant – Mbeti ti Nzapa bible

Rome 5

¹So e ga mbirimbiri na lege ti mabe awe, e yeke na siriri na Nzapa na lege ti Jésus Christ, *Kota Gbia ti e.

²E ma na be si na lege ti Jésus Christ, Nzapa asara nzoni be na e; e ngba na lege ti nzoni be ti lo ni fadeso. Nilaa be ti e ayeke na ngia ndali ti gonda ti Nzapa so e zia be ti e ti ku ni.

³Na ndö ni kue, e yeke na ngia na ya ti aye ti pasi so ayeke si na e, ngbanga ti so pasi laa ayeke sara si zo akanga be ti lo,

⁴kangango be asara si e do sese na ya ti ye ti ngangu nga ti ku ye so Nzapa aye ti mu na e.

⁵Ye so e zia be ti e ti ku ni, e yeke ku ni gbaa pepe, ngbanga ti so Nzapa azia ndoye ti lo na be ti e na lege ti Yingo-Vuru so lo mu na e.

⁶Biani, na ndembe so lani e yeke na ngangu pepe, Christ akui ndali ti azo ti siokpari, gi na ngoi so Nzapa aye.

⁷Titene mbeni zo ayeda ti kui ndali ti zo ti mbirimbiri, so ayeke ngangu mingi, wala titene mbeni zo ayeda ti kui ndali ti zo ti sarango nzoni, so mbi hinga pepe.

⁸Me Nzapa afa ndoye ti lo na e na lege so: na ngoi so e ngba lani azo ti siokpari, Christ akui ndali ti e.

⁹Fadeso e ga mbirimbiri na le ti Nzapa na lege ti mene ti Christ. Na ndö ti so kue, na lege ti Christ, fade a yeke soo nga e na kuâ na ya ti ngonzo ti Nzapa.

¹⁰Na ngoi so lani e yeke awato ti Nzapa, lo sara si songo akiri na popo ti e na lo na lege ti kuâ ti Molenge ti lo. Na ndö ti so kue, so songo akiri na popo ti e na lo awe, lo lingbi nga ti soo e na kuâ na lege ti fini ti Molenge ti lo.

¹¹Na ndö ni kue, be ti e ayeke na ngia na dawa ti Nzapa na lege ti *Kota Gbia ti e Jésus Christ, lo so lo sara si fadeso songo aga na popo ti e na Nzapa.

¹²Siokpari aga na ndö ti dunia so na lege ti zo oko, Adam, si na lege ti siokpari, kuâ aga. Tongaso kuâ amu azo kue, ngbanga ti so azo kue asara siokpari awe.

¹³Kozo titene Nzapa afa *Ndia na Moïse, siokpari ayeke na ndö ti dunia so awe, me ndali ti so Ndia ayeke daa pepe, a diko siokpari na li ti zo pepe.

¹⁴Andaa, ti londo na Adam ngbii asi na Moïse, kuâ ayeke na ngangu na ndö ti azo kue, ataa siokpari so ala sara ayeke legeoko na siokpari ti Adam pepe. Adam ayeke limo ti zo so ayeke ga ande.

¹⁵Me ye so Nzapa amu na zo senge senge ayeke nde na ye ti kirikiri so Adam asara. Biani, azo mingi akui ndali ti siokpari ti zo oko, me ye so ayeke kota ahon ndoni ayeke so Nzapa asara nzoni be ahon ndoni na azo mingi; lo mu ye na ala senge senge na lege ti zo oko, Jésus Christ.

¹⁶Ye so Nzapa amu na zo senge senge ayeke nga nde na ye so asi na peko ti siokpari ti zo oko. Biani, na peko ti siokpari ti zo oko, Nzapa afâ ngbanga na li ti azo kue; me na peko ti aye ti kirikiri mingi so azo asara, Nzapa asara nzoni be si lo mu lege na azo ni ti ga mbirimbiri na le ti lo.

¹⁷Biani, na lege ti zo oko, na lege ti siokpari ti zo oko, kuâ ayeke na ngangu na ndö ti azo kue; me na lege ti zo oko so ayeke Jésus Christ, azo awara aye ahon ndoni, ngbanga ti nzoni be so Nzapa asara si ala ga mbirimbiri. Na lege ti Christ, fade ala yeke duti na fini si ala yeke le-gbia legeoko na lo.

¹⁸Tongaso, na lege ti siokpari ti zo oko, ngbanga ati na li ti azo kue. Legeoko nga, sarango ye ti mbirimbiri ti zo oko asara si azo kue aga mbirimbiri si ala yeke na fini.

¹⁹Azo mingi aga azo ti siokpari na lege ti kengo yanga ti zo oko; legeoko nga, azo mingi aga mbirimbiri na lege ti zo oko.

²⁰Ndia aga ti sara si sioni awu mingi; me ndo so siokpari awu daa mingi, nzoni be ti Nzapa awu ahon ndoni.

²¹Siokpari ayeke lani na ngangu na ndö ti kuâ; legeoko nga, nzoni be ti Nzapa ayeke na ngangu ti mu fini so angba lakue lakue na lege ti Jésus Christ, *Kota Gbia ti e.