Read La Bible en Sango courant – Mbeti ti Nzapa Rome 7 Bible Online

Rome 7 - La Bible en Sango courant – Mbeti ti Nzapa bible

Rome 7

¹A-ita, ala hinga pepe? Mbi yeke tene tënë so na azo so ahinga *Ndia nzoni mingi: Ndia ayeke na ngangu na ndö ti zo gi na ngoi so zo ni ade na fini.

²Na lege ti tapande ti mungo tere ti koli na wali, ndia akanga wali na koli ti lo na ngoi so koli ni ade na fini; me tongana koli ni akui, wali ni asigigi awe na gbe ti ndia so lani akanga lo na koli ti lo so.

³Tongana wali ni amu mbeni koli nde na ngoi so koli ti lo ade na fini, fade azo ayeke iri lo wali ti gingo koli. Tongana koli ni akui awe, wali ni asigigi na gbe ti ndia ni awe; lo lingbi ti mu mbeni koli nde senge, azo alingbi ti iri lo wali ti gingo koli pepe.

⁴A-ita ti mbi, ye ni ayeke nga tongaso ndali ti ala: na lege ti kuâ so Christ akui, ala nga, ala kui si ala sigigi na gbe ti Ndia awe. Ti fadeso ala ga azo ti Christ, lo so azingo na kuâ awe; ala ga azo ti lo titene e sara anzoni ye ndali ti Nzapa.

⁵Biani, so ando e ngba ti sara ye so be ti e wani aye, asioni nzara ti be ti e awara ngangu na lege ti Ndia si ala yeke sara kua na ya ti tere ti e ti gue na e na kuâ.

⁶Me fadeso, e sigigi na gbe ti Ndia awe, e yeke azo so akui awe ti sigigi na ya ti kanga ti Ndia si e yeke sara na Nzapa na fini kode so Yingo amu na e. E yeke kiri ti sara na Nzapa na ngbene kode pepe so Ndia ti Moïse amu na e.

⁷Tongaso, fade e yeke tene nyen? *Ndia ayeke siokpari? Oko pepe! Me Ndia afa na mbi ti hinga ye so ayeke siokpari. Ndia atene: “Mo sara nzara ti ye ti zo pepe.” Tongana ndia atene fade tënë na ndö ti sarango nzara ti ye ti zo pepe, ka mbi hinga ni pepe.

⁸Me siokpari awara lege ti zia nzara ti asioni ye nde nde na be ti mbi na lege ti ndia so, nilaa tongana ndia ayeke daa pepe, siokpari ayeke ye so akui awe.

⁹Ando, so mbi de ti hinga Ndia pepe, mbi yeke na fini; me so mbi hinga tënë ti ndia awe, siokpari awara lege ti duti na fini

¹⁰si mbi kui ti mbi: tënë ti Ndia so ayeke fade ye ti mungo fini na zo, akiri aga ye so ayeke gue na mbi na kuâ.

¹¹Biani, na lege ti tënë ti Ndia laa siokpari awara lege ti handa mbi si afâ mbi.

¹²Tongaso, Ndia alondo na Nzapa, atënë oko oko ti Ndia alondo na Nzapa, ayeke mbirimbiri si ayeke nga ye ti nzoni.

¹³Ye so ayeke ye ti nzoni, akiri aga ye ti fango mbi? Oko pepe! Me siokpari laa afâ mbi: siokpari amu ye so ayeke nzoni ti fâ mbi na ni, ti fa so lo yeke siokpari biani, nilaa na lege ti tënë ti ndia, siokpari afa so lo yeke taa ye ti sioni biani.

¹⁴E hinga so *Ndia ayeke ye ti Yingo; ti mbi, mbi yeke zo senge, a ka mbi tongana ngbaa na siokpari.

¹⁵Biani, mbi hinga li ti mbi na ye so mbi yeke sara pepe: ye so mbi ye, mbi yeke sara ni pepe, me ye so mbi ke, ni laa mbi yeke sara.

¹⁶Tongana mbi sara ye so mbi ye pepe, andaa mbi yeda na Ndia si mbi yeda nga so Ndia ayeke nzoni ye.

¹⁷Mbi laa mbi yeke sara ye so pepe, me siokpari so aduti na ya ti mbi laa ayeke sara ni.

¹⁸Mbi hinga so mbeni ye ti nzoni ayeke na ya ti mbi pepe, so ti tene na ya ti tere ti mbi ti zo. Ti be ti mbi, mbi ye ti sara nzoni ye, me mbi yeke na ngangu ti sara ni pepe.

¹⁹Biani, ye ti nzoni so mbi ye, mbi yeke sara ni pepe, me ye ti sioni so mbi ye pepe, ni laa mbi yeke sara ni.

²⁰Tongana mbi sara ye so mbi ye pepe, so ti fa atene, siokpari so ayeke duti na ya ti mbi laa ayeke sara ni, me mbi pepe.

²¹Tongaso, mbi baa so mbeni ndia ayeke daa: tongana mbi ye ti sara ye ti nzoni, sioni ye laa ayeke ku mbi kungo titene mbi sara ni.

²²Nilaa na ya ti be ti mbi kâ, Ndia ti Nzapa laa anzere na mbi.

²³Me mbi baa na ya ti tere ti mbi, mbeni ndia nde ayeke daa: ndia ni ayeke tiri na mbeni ndia so gbungo-li ti mbi ayeda na ni. Ndia ni asara si mbi ga ngbaa ti siokpari so ayeke na ya ti tere ti mbi.

²⁴So mawa na mbi! Zo wa laa ayeke zi ande mbi na ya ti tere so ayeke gue na mbi na kuâ so?

²⁵Mbi mu singila na Nzapa na iri ti Jésus Christ, Kota Gbia ti e! Tongaso, lege so mbi yeke duti na ni ayeke so: na lege ti gbungo-li ti mbi, mbi ga ngbaa ti Ndia ti Nzapa si na lege ti dutingo ti mbi ti zo, mbi ga ngbaa ti ndia ti siokpari.