Read La Bible en Sango courant – Mbeti ti Nzapa Rome 9 Bible Online

Rome 9 - La Bible en Sango courant – Mbeti ti Nzapa bible

Rome 9

¹Na lege ti gango so mbi ga oko na Christ, mbi yeke tene taa-tënë, mbi yeke tene mvene pepe. Yingo-Vuru ayeke fa lege na be ti mbi si be ti mbi ayeke fa so ye ni ayeke taa-tënë:

²mbi yeke na vundu mingi si be ti mbi ayeke so lakue.

³Ti be ti mbi, mbi ye fade titene Nzapa adeba mbi si mbi wani, mbi kangbi na Christ ndali ti a-ita ti mbi so ayeke azo ti mara ti mbi.

⁴A-ita ti mbi ni ayeke azo ti Israel: Nzapa asara si ala ga amolenge ti lo, lo fa gonda ti lo na ala, lo leke *mbuki ndali ti ala, lo fa *Ndia ti lo na ala, lo fa lege ti vorongo lo na ala, lo mu azendo na ala,

⁵ala yeke *ahale ti akotara, Christ asigigi na ya ti ala na lege ti dutingo ti lo ti zo, lo yeke Nzapa so ayeke na ndö ti aye kue. Ayeke nzoni azo agonda lo kpu na kpu! Amen.

⁶So aye ti tene pepe atene, peko ti tënë ti yanga ti Nzapa ayeke ngba senge. Biani, azo so ayeke ahale ti Israel, ala kue laa ayeke taa azo ti Israel pepe.

⁷Azo so ayeke ahale ti Abraham, ala kue laa ayeke amolenge ti lo pepe, me Nzapa atene na Abraham: “Na lege ti Isaac laa mo yeke wara ahale so mbi mu zendo ti ala na mo.”

⁸So ti tene: amolenge so Abraham adu ala tongana ti so azo kue ayeke du laa ayeke amolenge ti Nzapa pepe. Me gi ala so a du ala alingbi na zendo ti Nzapa laa ayeke taa ahale ti lo.

⁹Nzapa amu zendo lani, lo tene: “Gi na oko ngoi so, mbi yeke kiri ti ga, fade Sara ayeke du molenge-koli.”

¹⁰Na ndö ni kue, e dabe ti e nga na Rébecca; lo du amolenge-koli use na Isaac, kotara ti e.

¹¹Andaa ye so Nzapa aleke na be ti lo ayeke ti soro zo: lo yeke soro zo ndali ti sarango ye ti lo pepe, me tongana ti so be ti lo aye; lo laa lo yeke iri zo. Titene Nzapa abata tënë ti yanga ti lo, lo tene na Rébecca: “Fade kozo molenge ti mo ayeke sara kua na gbe ti ngambe ni.” Nzapa atene tënë ni kozo titene Rébecca adu amolenge ni, andaa ala de ti sara nzoni wala sioni pepe.

¹³Nilaa Mbeti ti Nzapa atene: “Mbi ye Jacob, me mbi ke Ezau.”

¹⁴Tongaso, fade e yeke tene nyen? Nzapa ayeke mbirimbiri pepe? Oko pepe!

¹⁵Biani, Nzapa atene na Moïse: “Fade mbi yeke baa mawa ti zo so mbi ye ti baa mawa ti lo, mbi yeke sara nzoni be na zo so mbi ye ti sara nzoni be na lo.”

¹⁶Nzapa ayeke sara nzoni be na zo ndali ti ye so zo ni wani aye pepe wala ndali ti ngangu so zo ni ayeke sara pepe, me Nzapa ayeke sara nzoni be na zo ndali ti so lo baa mawa ti lo.

¹⁷Na ya ti Mbeti ti Nzapa, Nzapa atene na Faraon: “Taa ye so mbi mu mo ti ga gbia ndali ni ayeke titene mbi fa ngangu ti mbi na lege ti mo si azo agonda iri ti mbi na ndö ti sese kue.”

¹⁸Tongaso, Nzapa ayeke baa mawa ti zo so lo ye ti baa mawa ti lo, zo so lo ye ti sara si be ti lo akpengba, lo yeke sara ni.

¹⁹Fade mo yeke hunda mbi, mo tene: “So ye ni ayeke tongaso so, ngbanga ti nyen laa Nzapa angba ti bi tënë na li ti azo? Zo wa laa alingbi ti ke ye so be ti Nzapa aye?”

²⁰Mo zo, mo yeke ti mo zo wa ti kiri tënë na Nzapa? Ta ti sese so zo asara na maboko ti lo alingbi ti hunda zo so asara lo, atene: “Ngbanga ti nyen si mo leke mbi tongaso?”

²¹Wasarango-ta alingbi ti sara ta tongana ti so be ti lo aye. Gi na oko potopoto ti sese ni, lo yeke sara ata use: mbeni ayeke ta ti matanga, mbeni ayeke ti sarango na ye lakue lakue.

²²Nzapa aye ti fa ngonzo ti lo na azo si lo ye ti sara si ala hinga ngangu ti lo. Andaa azo so lo sara ngonzo na tere ti ala si ala yeke nduru titene lo fâ ngbanga ti kuâ na li ti ala, lo kanga be ti lo mingi na ala,

²³tongaso si lo fa kota gonda ti lo na azo so lo baa mawa ti ala; azo ni ayeke azo so lo leke ala kozoni ndali ti gonda ni.

²⁴Azo ni ayeke e so lo iri e; ambeni, lo iri ala na popo ti azuife, gi ala oko pepe, me lo iri nga ambeni na popo ti azo ti amara nde.

²⁵Tënë so Nzapa atene na ya ti Mbeti ti Osée laa, lo tene: “Azo so ayeke ando azo ti mbi pepe, fade mbi yeke iri ala azo ti mbi; mara so mbi ye ni ando pepe, fade mbi yeke iri ni mara so mbi ye mingi.

²⁶Na ndo so a tene ando na ala, atene: ‘ala yeke azo ti mbi pepe’, gi na ndo ni so laa a yeke iri ala amolenge ti Nzapa so ayeke na fini.”

²⁷Ésaïe ato mbela na tënë na ndö ti azo ti Israel, lo tene: “Ataa wungo ti azo ti Israel ayeke tongana wungo ti mbutu ti yanga ti kota ngu-ingo, fade gi ambeni kete laa ayeke soo kuâ.

²⁸Biani, ngbanga so *Kota Gbia atene tënë ti fango ni na ndö ti azo ti sese so, fade lo yeke ninga ti sara ni pepe, lo yeke sara ni kue.”

²⁹Ésaïe atene nga ando, atene: “Tongana Kota Gbia Nzapa, lo so lo yeke na ndö ti dunia kue, lo mu fade *ahale na e pepe, ka ti e ahunzi awe tongana ti azo ti Sodome na ti Gomore.”

³⁰Tongaso, fade e yeke tene nyen? Fadeso azo ti amara nde aga mbirimbiri na le ti Nzapa awe ndali ti so ala ma na be. Andaa titene ala ga mbirimbiri, ala gi ando lege ni pepe.

³¹Me azo ti Israel so ayeke gi ando ti ga mbirimbiri na le ti Nzapa na lege ti *Ndia, ala girisa lege ti ye so Ndia afa tënë ni so awe.

³²Ala girisa ni ndali ti nyen? Ndali ti so ala ye ti ga mbirimbiri na le ti Nzapa na lege ti anzoni ye so ala yeke sara, me ala gi ti ga mbirimbiri na lege ti mabe pepe. Ala pika gere ti ala na tere ti têne so asara si zo aye ti ti,

³³tongana ti so Mbeti ti Nzapa atene: “Baa, mbi zia na ya ti gbata ti *Sion mbeni têne so asara si zo aye ti ti; kota têne so ayeke kinda zo. Me zo so ama na be na lo, fade kamene ayeke sara lo pepe.”