Read La Bible en Sango courant – Mbeti ti Nzapa 1 Korente 13 Bible Online

1 Korente 13 - La Bible en Sango courant – Mbeti ti Nzapa bible

1 Korente 13

¹Tongana mbi tene ayanga ti kodro ti azo na ayanga ti *a-ange si mbi ye amba ti mbi pepe, andaa mbi yeke tongana gbagba ngo so ayeke toto wala mbeni wen so ayeke toto mingi.

²Tongana mbi yeke na matabisi ti tenengo peko ti tënë ti yanga ti Nzapa, tongana mbi hinga nda ti aye so kue angba na hondengo ni, tongana mbi hinga ye kue, tongana mbi yeke na mabe ti sara si ahoto alondo ahon si mbi ye amba ti mbi pepe, mbi yeke ye oko pepe.

³Tongana mbi kangbi aye ti mbi kue na azo ti mawa, tongana mbi mu tere ti mbi titene azo agbi ni na wâ si mbi ye amba ti mbi pepe, mbi yeke wara ye oko na pekoni pepe.

⁴Ndoye ayeke kanga be ti lo, lo yeke sara nzoni, lo yeke sara kota be pepe, lo yeke pika kate ti lo pepe, lo yeke sara baba pepe;

⁵lo yeke sara ye ti kamene pepe, lo yeke gi gi nzoni ti lo wani pepe, lo yeke sara ngonzo hio hio pepe, lo yeke bata zo na be pepe;

⁶lo wara ngia na lege ti ye ti sioni pepe, me lo wara ngia na lege ti taa-tënë.

⁷Ndoye ayeke kanga be ti lo na ndö ti asioni kue, lo yeke bata mabe ti lo na ya ti aye kue, lo yeke zia be ti lo kue ti ku na ya ti aye kue, lo yeke kanga be ti lo na ya ti aye kue.

⁸Ndoye ayeke hunzi laoko pepe. Fade tenengo peko ti tënë ti yanga ti Nzapa ayeke hunzi, matabisi ti tenengo tënë na ayanga nde ayeke hunzi, hingango ye ayeke hunzi.

⁹Biani, mbage ti hingango ye ti e atia, mbage ti atënë ti peko ti yanga ti Nzapa so e yeke tene atia;

¹⁰me tongana ye so ayeke nzoni kue ayeke si ande, ye so mbage ni atia ayeke hunzi.

¹¹Na ndembe so mbi de molenge, mbi yeke tene tënë tongana molenge, gbungo-li ti mbi ayeke tongana ti molenge, tënë ti be ti mbi ayeke tongana ti molenge. Na ndembe so mbi ga koli awe, mbi zia lege ti sarango ye ti molenge.

¹²Ti fadeso, ye so e yeke baa ayeke tongana ye so zo ayeke baa na ya ti tatara; e yeke baa ye ni nzoni kue pepe. Me gbanda, e yeke baa Nzapa le na le. Ti fadeso, mbage ti hingango ye ti mbi atia; me gbanda, mbi yeke hinga ye kue tongana ti so Nzapa ahinga na mbi so.

¹³Fadeso, aye ota so ayeke ngba: mabe, ziango be ti ku ye na ndoye; me ndoye ayeke kota ahon atanga ni kue.