Read La Bible en Sango courant – Mbeti ti Nzapa 2 Korente 1 Bible Online

2 Korente 1 - La Bible en Sango courant – Mbeti ti Nzapa bible

2 Korente 1

¹Mbi Paul, mbi yeke *watokua ti Jésus Christ na lege so be ti Nzapa aye. Mbi na ita Timothée laa e tokua mbeti so. E tokua mbeti ni na *Eglize ti Nzapa so ayeke na gbata ti Korente nga na azo ti Nzapa so ayeke na sese ti Akayi kue.

²Ayeke nzoni Nzapa Babâ ti e na *Kota Gbia Jésus Christ asara nzoni be na ala si amu na ala siriri.

³E gonda Nzapa, Babâ ti *Kota Gbia ti e Jésus Christ, Babâ so ayeke baa mawa ti azo mingi si lo yeke de be ti zo na ya ti aye kue!

⁴Lo yeke de be ti e na ya ti apasi so kue e yeke baa. Tongaso si e wani, e ga azo so alingbi ti de be ti azo so kue ayeke na ya ti pasi, e lingbi ti de be ti azo gi tongana ti so Nzapa ade be ti e so.

⁵Biani, legeoko tongana ti so e na Christ e baa pasi ahon ndoni, Christ ayeke de be ti e nga ahon ndoni.

⁶Tongana e yeke baa pasi, so ayeke sara si be ti ala ade si ala soo kuâ. Tongana be ti e ade, so ayeke sara si be ti ala ade si ala kanga be ti ala na ya ti amara ti pasi so e nga, e yeke baa so.

⁷E zia be ti e kue na ndö ti ala, ngbanga ti so e hinga, e tene, pasi so e yeke baa so, ala nga ayeke baa ni, nilaa fade be ti ala ayeke de tongana ti so be ti e ade.

⁸A-ita, e ye titene ala hinga tënë na ndö ti apasi so e baa na sese ti Azii: e baa lani pasi ngangu mingi, pasi ni aye ti hon ngangu ti e; ti be ti e, e tene, ti e ahunzi awe.

⁹E baa ti e, e tene, a fâ ngbanga ti kuâ na li ti e awe. Me ye ni asara si e kiri e zia be ti e na ndö ti ngangu ti e wani pepe, me e zia be ti e na ndö ti Nzapa so ayeke zingo azo na kuâ.

¹⁰Lo laa lo zi e na ya ti kuâ, fade lo yeke kiri ti zi e na ya ni. Biani, e zia be ti e ti ku lo, fade lo yeke kiri ti zi e.

¹¹Ala nga, ala yeke mu maboko na e na lege ti sambela ti ala. Tongaso, fade Nzapa ayeke ma sambela so azo mingi ayeke sambela ndali ti e si lo yeke sara ande nzoni be na e. Ndani laa azo mingi ayeke mu singila na lo ndali ti e.

¹²Ye so e yeke gonda tere ti e daa ayeke so: be ti e afa na e atene, dutingo ti e na dunia so, e duti na vuru be nga na be so sioni oko ayeke daa pepe. E duti tongaso mbirimbiri na mbage ti ala na lege ti ndara ti azo pepe, me na lege ti nzoni be ti Nzapa.

¹³Na ya ti ambeti so kue e tokua na ala, e su gi tënë so ala lingbi ti diko si ala ma ya ni. Mbi hinga, mbi tene, gbaa ala yeke ma ya ti tënë ni kue.

¹⁴Andaa ti fadeso, ala de ti ma ya ti atënë ti e ni kue pepe. Ye so ala lingbi ti ma ya ni ayeke so: na lango ti kiringo ti *Kota Gbia ti e Jésus, fade ala yeke gonda tere ti ala ndali ti e si e nga, e yeke gonda tere ti e ndali ti ala.

¹⁵Mbi hinga biani mbi tene, ye ni ayeke tongaso, nilaa mbi ye lani ti si kozoni na popo ti ala titene ala wara nzoni ye fani use.

¹⁶Na pekoni, mbi ye lani ti londo na ala kâ ti gue na Masedoane. Ti hunzi na ni, mbi ye ti londo na Masedoane ti kiri na ala kâ si ala mu na mbi maboko ndali ti tambula ti mbi ti gue na Judée.

¹⁷So mbi leke na be ti mbi tënë ti tambula so, mbi mu tënë ni tongana tënë ti ngia? Wala aye so mbi leke na be ti mbi ti sara so, mbi leke ni na lege ti anzara ti be ti mbi si gi mbi oko so, mbeni be ti mbi atene: “een” si mbeni be ti mbi atene: “ên-en”?

¹⁸Na le ti Nzapa, tënë so mbi tene na ala, mbi tene ge “een” si mbi tene kâ “ên-en” pepe.

¹⁹Jésus Christ, Molenge ti Nzapa, so mbi, Silas na Timothée, e fa tënë ti lo na popo ti ala, lo ga ti tene “een” si na mbage lo tene “ên-en” pepe; me tënë ti lo ayeke gi “een”.

²⁰Na lege ti lo laa Nzapa atene “een” ti mu na e aye so kue lo mu ando zendo ni. Na lege ti lo nga laa e yeke tene “amen” ti gonda Nzapa.

²¹Nzapa laa ayeke sara titene mbi na ala kue, e kpengba na lege ti gango so e ga oko na Christ. Lo laa lo zia e nde ndali ti lo;

²²lo nga laa lo zia nzoroko ti lo na ndö ti e, lo zia Yingo ti lo na be ti e ti fa atene, anzoni ye so lo bata ndali ti e, fade lo yeke mu ni kue na e.

²³Mbi tene taa-tënë, Nzapa ayeke ma mbi. Tongana mbi tene mvene, ayeke nzoni Nzapa afâ mbi! Mbi zia lege ti kiringo na Korente, ngbanga ti so mbi ye ti sara pasi na ala pepe.

²⁴E ye ti duti makonzi na ndö ti mabe ti ala pepe, ngbanga ti so ala kpengba na lege ti mabe awe, me e ye ti sara kua maboko na maboko titene ala duti na ngia.