Read La Bible en Sango courant – Mbeti ti Nzapa 2 Korente 13 Bible Online

2 Korente 13 - La Bible en Sango courant – Mbeti ti Nzapa bible

2 Korente 13

¹Fani ota titene mbi gue na ndo ti ala kâ laa. Andaa Mbeti ti Nzapa atene: “Na lege ti tënë ti yanga ti azo use wala ota so ahinga tënë ni laa alingbi ti leke tënë ni nzoni.”

²Mbi yeke tene tënë so na azo so asara siokpari kozo so, ala na atanga ni kue; fadeso mbi yeke na popo ti ala pepe, me mbi kiri ti tene gi tënë so mbi tene lani na ala na ndembe so mbi gue na ndo ti ala ti fani use ni: tongana mbi kiri ande ti gue, fade mbi yeke zia zo oko senge pepe,

³ngbanga ti so ala ye ti baa mbeni ye so afa atene, Christ laa ayeke tene tënë na lege ti mbi. Tongana Christ ayeke baa lege ti ala, lo yeke woko pepe, me lo yeke fa ngangu ti lo na popo ti ala.

⁴Biani, a fâ lo na ndö ti keke ti kroa ndali ti so lo yeke na ngangu pepe, me fadeso, lo yeke na fini na lege ti ngangu ti Nzapa. Ndali ti so e ga oko na lo, e nga, e yeke na ngangu pepe, me fade e yeke fa na ala so, e yeke na fini na lege ti ngangu ti Nzapa.

⁵Ala wani abaa be ti ala nzoni, ala gi ti hinga biani wala ala yeke duti na lege ti mabe. Ala hinga pepe atene, Jésus Christ ayeke na be ti ala? Tongana ye ni ayeke tongaso, ye so afa atene, ala yeke na mabe ayeke daa pepe.

⁶Ti e, e lingbi ti fa ni; mbi hinga, mbi tene, ala yeke yeda ande.

⁷E yeke sambela Nzapa titene ala sara ye ti sioni oko pepe. E ye ti fa na ala pepe e tene, sarango ye ti e ayeke na legeni; me e ye ti baa ala na sarango ye ti nzoni. Tongana azo ayeke baa ala na sarango ye ti nzoni si azo ni atene, e yeke sara kua nzoni pepe, so ayeke senge.

⁸Biani, e lingbi ti kanga lege na taa-tënë pepe, me kua ti e ayeke ti sara si azo ahinga taa-tënë.

⁹Lakue, be ti e ayeke na ngia tongana e yeke na ngangu pepe si ala yeke ti ala na ngangu. Ye so e yeke sambela ndali ni ayeke titene ala ga nzoni kue.

¹⁰Ndani laa, so mbi de yongoro na ala, mbi yeke su mbeti so ti tokua na ala. Tongaso, tongana mbi si na popo ti ala, mbi yeke so na ndö ti ala pepe. *Kota Gbia amu na mbi ngangu ti sara si *Eglize ti ala akpengba, me ti buba Eglize ni pepe.

¹¹Ti hunzi na ni, a-ita, ala duti na ngia! Ala gi lege ti ga nzoni kue, ala mu wango ti kpengba na amba ti ala, ala ma tere na popo ti ala, ala duti na siriri si Nzapa so aye zo si ayeke mu siriri na zo, fade lo yeke duti na ala.

¹²Ala bara tere na popo ti ala na sungo ngbangba so ayeke nzoni na le ti Nzapa. Azo ti Nzapa kue abara ala.

¹³Ayeke nzoni Kota Gbia Jésus Christ asara nzoni be na ala! Ndoye ti Nzapa aduti na ala si Yingo-Vuru asara titene ala kue aduti na beoko.