Read La Bible en Sango courant – Mbeti ti Nzapa 2 Korente 2 Bible Online

2 Korente 2 - La Bible en Sango courant – Mbeti ti Nzapa bible

2 Korente 2

¹Ndani laa, mbi leke na be ti mbi ti kiri ti si na popo ti ala pepe, ngbanga ti so mbi ye fade ti zia vundu na be ti ala pepe.

²Tongana mbi yeke zia vundu na be ti ala, zo wa laa ayeke kiri ti zia ngia na be ti mbi, zo wa? Andaa gi ala laa alingbi fade ti zia ngia na be ti mbi, ala so mbi zia vundu na be ti ala so!

³Nda ti mbeni mbeti so mbi tokua na ala so ayeke so: na singo ti mbi na popo ti ala, mbi ye titene azo so alingbi fade ti zia ngia na be ti mbi, ala ga azo ti zia vundu na be ti mbi pepe. Ti ala, mbi hinga na be ti mbi, mbi tene, ngia so ayeke na be ti mbi so ayeke nga na be ti ala kue.

⁴Biani, na ndembe so mbi su mbeti ti tokua na ala, be ti mbi ayeke na vundu, mbi yeke na siriri pepe, mbi yeke na ngu ti le na le ti mbi. Mbi su mbeti ni ti zia vundu na be ti ala pepe, me titene ala hinga atene, mbi ye ala ahon ndoni.

⁵Tongana mbeni zo azia vundu na be ti mba ti lo, mbi laa lo zia vundu na be ti mbi pepe, me na be ti ala kue. Ti tene tënë ahon ndoni pepe, lo zia vundu gi na be ti ambeni zo na popo ti ala.

⁶Mara ti zo tongaso, azo mingi na popo ti ala ade ngbanga na li ti lo, so alingbi awe.

⁷Ndani laa, ti fadeso alingbi ala zi tënë na li ti lo, ala de be ti lo, tongaso si vundu akiri ahon ndö ti lo pepe.

⁸Tongaso mbi hunda na ala ti fa na lo atene, ala ye lo.

⁹Biani, nda ni so mbi tokua lani mbeti na ala ayeke so: mbi ye ti tara be ti ala ti hinga wala ala yeke sara ye so kue mbi hunda na ala.

¹⁰Tongana ala zi tënë na li ti mbeni zo, mbi nga, mbi yeke zi tënë na li ti lo. Tongana mbi zi tënë na li ti zo — tongana ti so mbi wara lege ti sarango ni — mbi zi ni ndali ti ala, na le ti Christ.

¹¹Mbi sara tongaso titene Satan ahon ndö ti e pepe; e hinga mbirimbiri aye so Satan aye ti sara.

¹²Mbi si na gbata ti Troas ti fa Nzoni Tënë ti Christ, me ataa so *Kota Gbia azi lege kota na mbi titene mbi sara kua,

¹³be ti mbi angba gi na nduzu, ngbanga ti so mbi baa ita ti mbi Tite pepe. Ndani laa mbi bara azo ni si mbi hon, mbi gue na sese ti Masedoane.

¹⁴E mu singila na Nzapa, ngbanga ti so na lege ti gango so e ga oko na Christ, lo yeke zia e lakue na ya ti molongo ti azo so atambula na peko ti Christ so aso benda awe. Tongaso, Nzapa ayeke sara titene azo ahinga Christ na ndo kue ndali ti e; ye ni ayeke tongana fion ti yombo so amu ndo kue.

¹⁵Biani, ti Nzapa, e yeke tongana nzoni yombo ti Christ ndali ti azo so ayeke soo kuâ nga ndali ti azo so agirisa.

¹⁶Ti azo so ayeke girisa, fion ti yombo ni ayeke fion ti kuâ so ayeke sara titene zo akui. Ti azo so ayeke soo kuâ, fion ni ayeke fion ti fini so ayeke mu fini na zo. Me zo wa laa alingbi ti sara mara ti kua so?

¹⁷Azo mingi ayeke mu tënë ti Nzapa ti de buze na ni; e yeke tongana ala pepe. Ti e, Nzapa laa atokua e, nilaa na lege ti gango so e ga oko na Christ, e yeke tene taa-tënë na le ti Nzapa.