Read La Bible en Sango courant – Mbeti ti Nzapa 2 Korente 7 Bible Online

2 Korente 7 - La Bible en Sango courant – Mbeti ti Nzapa bible

2 Korente 7

¹A-ita ti mbi so mbi ye ala mingi, azendo so kue ayeke ndali ti e. Tongaso, e *sukula sioni so kue ayeke na tere ti e nga na be ti e. Na lege ti kpengo mbeto ti Nzapa, e gi lege ti mu tere ti e kue na lo.

²Ala leke ndo na be ti ala ndali ti e! E sara sioni na zo oko pepe, e buba lege ti dutingo ti zo oko pepe, e mu ye ti zo oko na mbana pepe.

³Mbi yeke tene tënë so ti fâ ngbanga na li ti ala pepe. Biani, mbi tene na ala kozoni, mbi tene: ataa e ngba na fini wala e kui, e ye ala mingi.

⁴Mbi zia be ti mbi kue na ndö ti ala, mbi yeke gonda tere ti mbi mingi ndali ti ala. Be ti mbi ade mingi; na ya ti pasi so kue e yeke baa, be ti mbi asi singo na ngia.

⁵Biani, na ngoi so e si na Masedoane, e wara lege ti wu tere ti e pepe, me e baa amara ti pasi kue: azo atiri na e, mbeto ayeke na ya ti e.

⁶Me Nzapa so ayeke de be ti azo so be ti ala awoko kue, lo sara si gango ti Tite ade be ti e.

⁷Be ti e ade gi ndali ti gango ti lo oko pepe, me be ti e ade nga ndali ti so ala mu ngangu na be ti lo. Lo tene na e, lo tene, ala yeke na nzara mingi ti baa mbi, ala yeke toto mbi mingi, ala yeke na nzara ti gbu koko ti mbi. So mbi ma tënë ni, be ti mbi akiri asi na ngia ahon ndoni.

⁸Biani, mbeti so mbi tokua lani na ala azia vundu na be ti ala, me be ti mbi aso daa pepe. Mbi baa so mbeti ni azia vundu na be ti ala na ya ti kete ngoi si be ti mbi aso lani daa,

⁹me fadeso be ti mbi anzere. Be ti mbi anzere ndali ti vundu ti ala pepe, me ngbanga ti so vundu ti ala ni asara si ala zia ngbene lege ti sarango ye ti ala. Vundu ti ala ni, Nzapa laa ayeda na ni. Tongaso, e sara ye ti sioni oko na ala pepe.

¹⁰Vundu so Nzapa ayeda na ni ayeke sara titene zo azia ngbene lege ti sarango ye ti lo si lo lingbi ti soo kuâ. Mara ti vundu so, be ti zo alingbi ti so daa pepe. Me vundu so asara si zo azia ngbene lege ti sarango ye ti lo pepe, ni laa ayeke gue na zo na kuâ.

¹¹Ala baa aye so vundu so Nzapa ayeda na ni asara na popo ti ala laa: ala baa lege ti akua hio! Ala fa peko ti tënë so ayeke na li ti ala! Ngonzo agbu ala na bango ye ti sioni! Mbeto ayeke na be ti ala! Ala yeke na nzara mingi ti baa mbi! Ala yeke na nzara ti sara kua! Ala fâ ngbanga na li ti azo so asara sioni! Na lege ti aye so kue, ala fa atene, tënë ayeke na li ti ala pepe.

¹²Ndali ti zo so asara sioni na mba ti lo wala lo so mba ti lo asara sioni na lo laa mbi su mbeti so na ala pepe; me mbi su ni ti fa na le ti Nzapa so, ala yeke azo so ayeke baa lege ti e hio.

¹³So laa asara si be ti e ade. Be ti e akiri aduti na ngia mingi ngbanga ti so Tite awara ngia. Lo wara ngia mingi ndali ti so, ala kue asara si be ti lo aduti na siriri.

¹⁴Lani, mbi gonda tere ti mbi ndali ti ala na le ti lo, me kamene ni asara mbi pepe. Tongana ti so lakue e yeke tene na ala taa-tënë, gondango tere ti e ndali ti ala na le ti Tite aga nga taa-tënë awe.

¹⁵Tongana lo kiri lo dabe ti lo na lege so ala ma yanga ti lo si ala yamba lo na mbeto na be ti ala nga na dongo tere, be ti lo akiri aye ala mingi.

¹⁶Be ti mbi ayeke na ngia, ngbanga ti so mbi lingbi ti zia be ti mbi na ndö ti ala na ya ti ye kue.