Read La Bible en Sango courant – Mbeti ti Nzapa 2 Korente 9 Bible Online

2 Korente 9 - La Bible en Sango courant – Mbeti ti Nzapa bible

2 Korente 9

¹Tongana ayeke tënë ti mungo maboko na azo ti Nzapa so ayeke na Judée, so ayeke mbeni ye titene mbi tokua mbeti na ala ngbanga ni pepe.

²Mbi hinga nzara ti be ti ala si mbi gonda tere ti mbi ndali ti ala na le ti azo ti Masedoane, mbi tene: “Azo ti Akayi aleke ye ti ala kue na ngu so ahon so awe.” Nilaa nzara ti sarango nzoni ye ti ala azia nga nzara na be ti azo ti ambeni *Eglize mingi.

³Mbi yeke tokua a-ita so na ala titene ala, azo ti Korente, ala leke aye kue biani tongana ti so mbi tene tënë ni so si gondango tere ti mbi angba gi senge gondango tere pepe.

⁴Tongana ala de ti leke aye ni pepe si mbi na azo ti Masedoane e si kâ, fade kamene ayeke sara e, ngbanga ti so e tene na azo, e tene, ala leke ye kue awe. Ti ala kamene ni, mbi yeke zi yanga ti mbi daa pepe!

⁵Ndani laa, mbi baa nzoni na le ti mbi ti hunda na a-ita so ti hon kozoni na ndo ti ala kâ si ala leke aye so ala ye ti mu ni. Tongaso, na ndembe so mbi yeke si ande, aye so lani ala mu zendo ti mungo ni so, andaa ala leke ni kue awe. Ye so laa ayeke fa atene, ala yeke mu ye na nzoni be, me na sioni be pepe.

⁶Alingbi ala hinga ye so: zo so alu ale ti kobe gi kete kete, fade lo yeke fâ ni nga gi kete kete; zo so alu ale ti kobe mingi mingi, fade lo yeke fâ ni nga mingi mingi.

⁷Alingbi zo oko oko amu ye tongana ti so lo leke na be ti lo, na vundu pepe, wala mbeni zo agbu lo na ngangu pepe titene lo mu ni. Biani, Nzapa aye zo so ayeke mu ye na ngia.

⁸Nzapa ayeke na ngangu ti mu na ala mara ti anzoni ye kue ahon ndoni. Tongaso, ala yeke na ye lakue so alingbi na ala si ala yeke nga na mbeni na ndö ni ti sara na anzoni kua kue.

⁹Tongana ti so Mbeti ti Nzapa atene: “Lo kangbi ye na nzoni be na azo ti mawa, mbirimbiri ti lo angba kpu na kpu.”

¹⁰Nzapa so ayeke mu ale ti kobe na zo ti lungo ni si lo yeke mu kobe na zo titene lo te, lo yeke mu nga ale ti kobe na ala si lo yeke sara titene ale ti kobe ni akiri aga mingi. Lo yeke sara titene azo awara ye mingi na lege ti nzoni be ti ala.

¹¹Fade lo yeke sara titene lakue, ala wara anzoni ye mingi si ala sara nga nzoni be lakue. Tongaso si azo mingi awara lege ti mu singila na Nzapa ndali ti aye so ala, azo ti Korente ayeke mu ni si e yeke mu na azo so.

¹²Ye so ala bongbi so ayeke gi ndali ti mungo maboko na azo ti Nzapa so ye atia ala so pepe, me ayeke nga ti sara si azo mingi amu singila na Nzapa ndali ni.

¹³Fade azo ni ayeke baa ye so ala sara so si ala yeke gonda Nzapa ndali ti so, ala azo ti Korente, ala ma Nzoni Tënë ti Christ si ala yeke sara ye alingbi na ni. Azo ni ayeke gonda nga Nzapa ndali ti so ala bongbi aye ti ala oko na nzoni be ti mu na azo ti Nzapa so ayeke na Jérusalem nga na azo ti Nzapa kue.

¹⁴Ndali ti nzoni be so Nzapa asara na ala mingi so, azo ni ayeke ye tënë ti ala, azo ti Korente mingi si azo ni ayeke sambela ndali ti ala.

¹⁵E mu singila na Nzapa ndali ti nzoni ye so lo mu na e, mbeni ye ti lingbi na ni ayeke daa pepe!