Read La Bible en Sango courant – Mbeti ti Nzapa Galasii 1 Bible Online

Galasii 1 - La Bible en Sango courant – Mbeti ti Nzapa bible

Galasii 1

¹Mbi Paul laa mbi tokua mbeti so; azo laa airi mbi ti ga *watokua pepe. So Nzapa airi mbi ti ga watokua, mbi ma tënë ni na yanga ti mbeni zo pepe, me na yanga ti Jésus Christ wani, lo na Nzapa Babâ so azingo lo na popo ti akuâ.

²A-ita azo ti Christ so kue ayeke ge abongbi na mbi ti tokua mbeti so na *a-Eglize ti sese ti Galasii.

³Ayeke nzoni Nzapa Babâ na *Kota Gbia Jésus Christ asara nzoni be na ala si amu na ala siriri.

⁴Jésus aka tere ti lo ndali ti siokpari ti e, ti zi e na ya ti ngoi ti sioni so e yeke daa laso; lo sara tongana ti so be ti Nzapa Babâ ti e aye.

⁵Gonda ayeke ti lo kpu na kpu! Amen.

⁶Mbi gi li ti mbi gbaa na ye so ala sara so: gi hio tongaso, ala zia lege ti lo so airi ala na lege ti nzoni be ti Christ so awe ti mu peko ti mbeni nzoni tënë nde!

⁷Ti tene taa-tënë, mbeni nzoni tënë nde ayeke daa pepe! Mbi tene tënë so, ngbanga ti so ambeni zo ayeke sara titene li ti ala aga kirikiri, ala ye ti buba ya ti Nzoni Tënë ti Christ.

⁸Tongana mbeni zo afa na ala mbeni nzoni tënë nde na ti so e fa na ala kozoni, ataa ayeke e wani wala mbeni *ange so alondo na yayu, ayeke nzoni Nzapa adeba lo!

⁹E tene tënë so na ala kozoni awe, mbi yeke kiri na ndö ni: tongana mbeni zo afa na ala mbeni nzoni tënë nde na ti so ala ma kozoni, ayeke nzoni Nzapa adeba lo!

¹⁰Mbi yeke gi lege fadeso titene azo agonda mbi? Oko pepe, mbi ye titene Nzapa laa agonda mbi. Mbi yeke gi ti ga nzoni na le ti azo? Tongana mbi yeke gi fade titene azo agonda mbi, andaa mbi yeke zo ti kua ti Christ pepe.

¹¹A-ita, mbi tene na ala, mbi tene: Nzoni Tënë so mbi yeke fa alondo na zo pepe.

¹²Mbeni zo laa afa Nzoni Tënë ni na mbi pepe, mbeni zo nga laa afa nda ti Nzoni Tënë ni na mbi pepe, me Jésus Christ wani laa asara si mbi hinga ni.

¹³Biani, a-ita, ala ma tënë ti sarango ye ti mbi na ndembe so mbi yeke voro ando Nzapa tongana ti azuife. Ala hinga so mbi sara ando ngangu mingi na *Eglize ti Nzapa si mbi ye nga ti buba Eglize ni biani.

¹⁴Na lege ti vorongo Nzapa ti azuife, amba ti mbi azuife so ngu ti mbi na ala ayeke oko, mbi hon ala kue. Mbi yeke na nzara mingi ti sara ye alingbi na aye ti akotara ti e.

¹⁵So mbi de na ya ti mama ti mbi, Nzapa azia mbi nde, lo iri mbi na lege ti nzoni be ti lo. Na ndembe so Nzapa aye

¹⁶ti fa Molenge ti lo na mbi titene mbi hinga lo si mbi fa Nzoni Tënë ti lo na azo ti amara nde, mbi hunda wango na mbeni zo pepe.

¹⁷Mbi gue nga na Jérusalem pepe ti baa azo so ayeke *awatokua kozo ti mbi. Me mbi gue hio na sese ti Arabii, na pekoni, mbi kiri na gbata ti Damas.

¹⁸Ngu ota na pekoni, mbi gue na Jérusalem ti baa Pierre titene e na lo, e hinga tere. Mbi ngba na ndo ti lo lango baleoko na oku.

¹⁹Mbi baa mbeni watokua nde pepe, me zo so mbi baa lo ayeke gi Jacques, ita ti *Kota Gbia.

²⁰Tënë so mbi su na mbeti na ala so ayeke taa-tënë: na le ti Nzapa, mbi yeke tene mvene pepe.

²¹Na pekoni, mbi gue na sese ti Sirii na ti Silisii.

²²Na ndembe ni so, azo ti a-Eglize ti Christ so ayeke na Judée ade ti baa le ti mbi laoko pepe.

²³Ala ma gi tënë so azo atene: “Koli so ayeke sara ando ngangu na e so, fadeso lo yeke fa na azo tënë ti mabe so lo ye ando ti buba lege ni so.”

²⁴Nilaa, azo ti Christ ayeke gonda Nzapa ndali ti mbi.