Read La Bible en Sango courant – Mbeti ti Nzapa Galasii 3 Bible Online

Galasii 3 - La Bible en Sango courant – Mbeti ti Nzapa bible

Galasii 3

¹Ala azo ti Galasii, so buba ti nyen? Zo wa laa aturne li ti ala, zo wa? Andaa, a fa na ala polele tënë ti kuâ ti Christ na ndö ti keke ti kroa!

²Mbi ye titene ala kiri tënë na mbi na ndö ti tënë oko so si: ala wara Yingo ti Nzapa ndali ti so ala sara ye alingbi na *Ndia wala na lege ti Nzoni Tënë so ala ma si ala ma na be na ni?

³Buba ti ala ahon ndoni! Ala to nda ti sara ye na ngangu ti Yingo ti Nzapa, fadeso ala ye ti hunzi ye ni na ngangu ti ala ti zo?

⁴Aye so kue asi ando na ala so, asi gi senge? Mbi baa ti mbi, mbi tene, ayeke senge pepe.

⁵Nzapa ayeke mu na ala Yingo ti lo si lo yeke sara aye ti kpene na popo ti ala! Lo yeke sara aye so kue ndali ti so ala sara ye alingbi na Ndia wala ndali ti so ala ma Nzoni Tënë si ala ma na be na ni?

⁶Mbeti ti Nzapa atene tënë na ndö ti Abraham, atene: “Abraham azia be ti lo na Nzapa, ndani laa Nzapa abaa lo tongana zo ti mbirimbiri na lege ti mabe ti lo.”

⁷Tongaso, alingbi ala hinga, atene: azo so aduti na fini na lege ti mabe, ala laa ayeke taa *ahale ti Abraham.

⁸Mbeti ti Nzapa atene tënë ti ye ni so kozoni awe: fade Nzapa ayeke sara si azo ti amara nde ayeke ga mbirimbiri na le ti lo na lege ti mabe. Mbeti ni atene nzoni tënë so kozoni na Abraham, atene: “Na lege ti mo, fade Nzapa ayeke sara tufa na ndö ti amara kue.”

⁹Tongaso, azo so kue ama na be, Nzapa ayeke sara tufa na ndö ti ala tongana ti so lo sara tufa na ndö ti Abraham so ama na be.

¹⁰Me azo so azia be ti ala gi na ndö ti sarango aye alingbi na Ndia, deba ti Nzapa ayeke na li ti ala. Biani, Mbeti ti Nzapa atene: “Deba aga na li ti zo so asara ye pepe alingbi na atënë kue ti ya ti mbeti ti Ndia!”

¹¹Tënë so ayeke taa-tënë biani: zo oko alingbi ti ga mbirimbiri pepe na le ti Nzapa na lege ti Ndia. Mbeti ti Nzapa atene: “Zo so aga mbirimbiri na le ti Nzapa na lege ti mabe, fade lo yeke duti na fini.”

¹²Andaa Ndia ayeke luti na ndö ti mabe pepe. Me Mbeti ti Nzapa atene: “Zo so asara ye alingbi na atënë ti Ndia, fade lo yeke na fini ndali ni.”

¹³Christ afuta kota ngere ti zi e na gbe ti deba awe. Deba so Ndia aga na ni na li ti e, lo yo deba ni na li ti lo wani ndali ti e. Biani, Mbeti ti Nzapa atene: “Zo so a kanga lo na nduzu na ndö ti keke, deba ayeke na li ti lo.”

¹⁴Christ asara tongaso titene anzoni ye so Nzapa amu zendo ni na Abraham so, azo ti amara nde nga awara ni na lege ti Christ. Tongaso na lege ti mabe, e wara Yingo so Nzapa amu zendo ni.

¹⁵A-ita, mbi ye ti mu tapande ti mbeni ye so azo ayeke sara ka na popo ti ala: tongana ambeni zo ama tere na ndö ti mbeni tënë si ala leke gere ti tënë ni mbirimbiri awe, mbeni zo alingbi ti buba ya ni pepe, mbeni zo alingbi nga ti zia mbeni tënë na ndö ni pepe.

¹⁶Legeoko nga, Nzapa amu azendo na Abraham na *hale ti lo. Mbeti ti Nzapa atene tënë ti “ahale ti lo” pepe; a tene tënë ti azo mingi pepe, gi tënë ti zo oko: “na hale ti mo”, so ti tene Christ.

¹⁷Tënë so mbi ye ti tene ayeke so: Nzapa asara *mbuki na popo ti lo na Abraham, lo leke gere ti mbuki ni mbirimbiri. Ngu ngbangbo osio na baleota na pekoni si *Ndia abaa gigi. Ndia alingbi ti mingo ngangu ti mbuki ni pepe si peko ti zendo ti Nzapa aga senge ye pepe.

¹⁸Tongana Nzapa ayeke mu fade ye na azo ndali ti so ala sara ye alingbi na Ndia, ka lo mu ye ni na lege ti zendo pepe. Andaa na lege ti zendo laa Nzapa asara nzoni be na Abraham.

¹⁹Tongaso, kua ti Ndia ayeke nyen? Nzapa azia Ndia na tere ti mbuki ni titene e hinga ye so ake Ndia. Nzapa amu Ndia ti ku na gango ti hale ti Abraham, lo so Nzapa amu zendo ti mungo ye ni na lo. *A-ange laa amu Ndia ni aga na ni na azo si mbeni zo ayeke walekengo-songo.

²⁰Tongana zo ayeke gi lo oko, lege titene mbeni zo aduti walekengo-songo ayeke daa pepe. Andaa Nzapa ayeke gi oko.

²¹So ti tene *Ndia ake tënë ti azendo ti Nzapa? Oko pepe! Tongana mbeni ndia alingbi fade ti mu fini na zo, ka azo aga mbirimbiri biani na le ti Nzapa na lege ti ndia awe.

²²Me Mbeti ti Nzapa atene, azo kue ayeke na gbe ti ngangu ti siokpari. Ndani laa, ye so Nzapa amu zendo ni, lo yeke mu ni na azo so ama na be na Jésus Christ, lo mu ni na ala ndali ti mabe ti ala.

²³Kozo titene ngoi ti mabe asi, e yeke lani tongana azo ti kanga na gbe ti Ndia ti ku ngoi so Nzapa ayeke sara titene e hinga tënë ti mabe.

²⁴Tongaso, Ndia ayeke tongana mbeni zo so ayeke baa ndo na ndö ti e ti ku na gango ti Christ titene e ga mbirimbiri na le ti Nzapa na lege ti mabe.

²⁵Me fadeso, so ngoi ti mabe asi awe, e yeke na gbe ti Ndia mbeni pepe, Ndia so ayeke tongana zo ti bango ndo na ndö ti e so.

²⁶Biani, ala kue aga amolenge ti Nzapa na lege so ala ma na be na Jésus Christ.

²⁷Ala kue awara bateme awe, ala ga oko na Christ. Tongaso, lege ti dutingo ti ala aga tongana ti Christ awe.

²⁸Tongaso, zuife wala zo ti amara nde ayeke daa mbeni pepe, ngbaa wala zo so ayeke ngbaa pepe ayeke daa mbeni pepe, koli wala wali ayeke daa mbeni pepe. Biani, ala kue ayeke oko, ngbanga ti so ala ga oko na Jésus Christ awe.

²⁹Tongana ala yeke azo ti Christ, andaa ala yeke *ahale ti Abraham, ala yeke wara ande ye so Nzapa amu zendo ni.