Read La Bible en Sango courant – Mbeti ti Nzapa Efeze 1 Bible Online

Efeze 1 - La Bible en Sango courant – Mbeti ti Nzapa bible

Efeze 1

¹Mbi Paul, mbi yeke *watokua ti Jésus Christ na lege so be ti Nzapa aye; mbi tokua mbeti so na azo ti Nzapa so ayeke na gbata ti Efeze, ala so ama na be na Jésus Christ si ala ga oko na lo.

²Ayeke nzoni Nzapa Babâ ti e na *Kota Gbia Jésus Christ asara nzoni be na ala si amu na ala siriri.

³E gonda Nzapa, Babâ ti *Kota Gbia ti e Jésus Christ! Lo mu na e anzoni ye ti Yingo so kue ayeke na yayu, na lege ti gango so e ga oko na Christ.

⁴Kozo si dunia abaa gigi, Nzapa asoro e titene e ga azo ti lo na lege ti gango so e ga oko na Christ, tongaso si e ga azo so ayeke nde si ayeke nzoni kue, azo so na le ti lo, tënë ayeke na li ti ala pepe. Na lege ti ndoye ti lo,

⁵Nzapa aleke na be ti lo kozoni ti sara si e ga amolenge ti lo na lege ti Jésus Christ. Na lege ti nzoni be ti lo, ye so lo ye ti sara laa.

⁶Ayeke nzoni e sepela gonda ti Nzapa ndali ti anzoni ye so lo mu na e gbani gbani na nzoni be na lege ti molenge ti lo so lo ye lo mingi.

⁷Na lege ti gango so e ga oko na Christ, a zi e na ya ti sioni na lege ti mene ti lo; a zi nga asiokpari na li ti e na lege ti nzoni be ti lo so ahon ndoni.

⁸Nzapa amu na e anzoni ye mingi na lege ti nzoni be ti lo; lo mu na e ndara na hingango ndo kue.

⁹Ye so lo leke na be ti lo si angba na hondengo ni, lo sara si e hinga ni: so ti tene, ye so lo leke kozoni na lege ti nzoni be ti lo ti sara ni na lege ti Christ.

¹⁰Lo leke na be ti lo titene, tongana lango ni alingbi awe, lo yeke bongbi ye kue ti yayu na ti sese na gbe ti makonzi oko so ayeke Christ.

¹¹Na lege ti gango so e ga oko na Christ, Nzapa asoro e kozoni titene e ga azo ti lo alingbi na ye so lo leke na be ti lo, lo sara ye so kue tongana ti so be ti lo aye.

¹²Tongaso, e sepela gonda ti Nzapa, e so e yeke akozo zo ti zia be ti e ti ku Christ!

¹³Na lege ti gango so ala ga oko na Christ, ala nga, ala ma taa-tënë so ayeke Nzoni Tënë si ayeke soo ala na kuâ; ala ma na be si Nzapa asara nzoroko na tere ti ala, nzoroko ni ayeke Yingo-Vuru so lo mu ando zendo ni.

¹⁴Yingo so e wara afa atene, anzoni ye so Nzapa abata ndali ti e, e yeke wara ni kue na ndembe so a yeke zi e na ya ti sioni biani biani. Tongaso, ayeke nzoni e sepela gonda ti Nzapa!

¹⁵Mbi ma tënë ti mabe ti ala na ndö ti *Kota Gbia Jésus nga na tënë ti ndoye ti ala ndali ti azo ti Nzapa kue. Ndani laa, ti londo na ndembe so mbi ma atënë so,

¹⁶mbi yeke ngba ti mu singila lakue na Nzapa ndali ti ala si mbi yeke zia ala na ya ti asambela ti mbi.

¹⁷Mbi hunda na Nzapa ti Kota Gbia ti e Jésus Christ, Babâ so ayeke na gonda, titene lo mu na ala Yingo ti ndara. Fade Yingo ni ayeke fa Nzapa na ala, tongaso si ala hinga lo nzoni.

¹⁸Mbi hunda nga titene lumiere ti Nzapa aza na ya ti hingango ndo ti ala, tongaso si ala lingbi ti hinga ye so lo iri ala ngbanga ni si lo yeke leke ti ku na ala so. Tongaso, fade ala hinga atene, aye so lo bata ndali ti azo ti lo ayeke anzoni ye ahon ndoni,

¹⁹ala hinga nga so lo yeke ngangu mingi, ngangu ti lo ayeke sara ye mingi na ya ti fini ti e, azo ti lo. Gi na ngangu so laa

²⁰Nzapa azingo Christ na kuâ. So Jésus azingo na kuâ awe, Nzapa azia lo ti duti na tere ti lo kâ na yayu na mbage ti maboko ti lo ti koli.

²¹Kâ, Christ ayeke na ndö ti ayingo so ayeke na komandema, ala so ayeke na ngangu nga na ala so ayeke amakonzi. Lo yeke na ndö ti aye so kue e yeke ma iri ni na dunia ti laso nga na dunia so ayeke ga.

²²Nzapa azia ye kue na gbe ti Christ; lo so lo yeke na ndö ti aye kue, lo zia lo kota makonzi na li ti *Eglize.

²³Eglize ayeke tere ti Christ; Christ asi singo na ya ni si Christ asi singo na ya ti aye kue, na ndo kue.