Read La Bible en Sango courant – Mbeti ti Nzapa Efeze 6 Bible Online

Efeze 6 - La Bible en Sango courant – Mbeti ti Nzapa bible

Efeze 6

¹Amolenge, ye so *Kota Gbia aye ayeke titene ala ma yanga ti ababâ na amama ti ala; so sarango ye ti mbirimbiri laa.

²“Alingbi mo ne babâ na mama ti mo”; kozo tënë ti ndia so zendo ayeke daa laa.

³“Tongaso, fade mo yeke duti nzoni si gigi ti mo ayo na ndö ti sese so.”

⁴Ala ababâ na amama, ala sara ye ti zia ngonzo na be ti amolenge ti ala pepe. Me ala bata amolenge ni nzoni, ala fa lege na ala si ala mu na ala wango so alingbi na tënë ti *Kota Gbia.

⁵Angbaa, ala ma yanga ti awa ti ala ti ndö ti sese so tongana ti so ala yeke ma yanga ti Christ so. Ala kpe awa ti ala, ala sara mbeto ti awa ti ala si ala sara kua ti awa ti ala ni na be ti ala oko.

⁶Ala sara kua ni gi ndali ti le ti awa ti ala pepe, mo baa mo tene, ala yeke gi ti ga nzoni na le ti azo; me ala sara kua ni tongana angbaa ti Christ so amu be ti ala kue ti sara ye so be ti Nzapa aye.

⁷Ala sara kua ti ala na nzerengo be, tongana ti so ala yeke sara kua ti *Kota Gbia so; ala baa kua ni tongana kua ti zo pepe.

⁸Ayeke nzoni ala hinga atene, tongana mbeni zo asara nzoni kua, fade Kota Gbia ayeke futa lo, ataa zo ni ayeke ngbaa wala lo yeke ngbaa pepe.

⁹Ala awa ti angbaa, ala sara nga tongaso na angbaa ti ala; ala zia ti suku na ala. Ayeke nzoni ala hinga atene, ala na angbaa ti ala kue, ala yeke amolenge ti Kota Gbia so ayeke na yayu; lo yeke mu mbage ti mbeni zo pepe.

¹⁰Ti hunzi na ni, ala kpengba na lege ti kota ngangu ti *Kota Gbia, ngbanga ti so ala ga oko na lo.

¹¹Ala mu aye ti bira ti Nzapa kue, ala yu ni titene ala luti ngangu ti ke aye ti mayere ti Zabolo.

¹²Biani, e yeke tiri bira ni na azo pepe, me na ayingo so ayeke na komandema, ala so ayeke na ngangu na ndö ti dunia so ayeke na ya ti vukongo ndo, so ti tene asioni yingo so ayeke na le ti nduzu.

¹³Ndani laa, ala mu aye ti bira ti Nzapa kue. Tongaso, na ya ti sioni ngoi, ala lingbi ti luti nganganga na le ti wato, ala kiri na peko pepe, me ala tiri bira ni ngbii asi na ndani.

¹⁴Ala luti na nduzu! Ala kanga taa-tënë tongana kamba ti ndö ti bongo ti ala; ala yu sarango ye ti mbirimbiri tongana kazaka ti wen;

¹⁵ala yu nzara ti fango Nzoni Tënë ti siriri tongana ti so zo ayeke yu poro ti hon na ndo kue.

¹⁶Lakue, ala mu mabe tongana *vala ti ala: na lege ni si ala lingbi ti kinda ale ti kokora ti wâ so Sioni wato ayeke tokua na ndö ti ala.

¹⁷Ala mu songo so Nzapa asoo ala tongana kpoto ti wen ti batango na li ti ala. Ala mu nga tënë ti Nzapa tongana yongoro zeme so Yingo amu na ala.

¹⁸Na ya ti aye so kue, ala sambela Nzapa titene lo mu na ala maboko; ala sambela na ngoi kue na lege ti Yingo. Ndani laa, le ti ala akpengba, ala sambela ndali ti azo ti Nzapa kue, ala ngba daa lakue.

¹⁹Ala sambela nga ndali ti mbi titene Nzapa azia tënë ti lo na yanga ti mbi si mbi fa Nzoni Tënë na azo na mbeto pepe; Nzoni Tënë so angba fade na hondengo ni.

²⁰Ataa so mbi yeke na da ti kanga, mbi yeke sara kua ti lembe ndali ti Nzoni Tënë. Ala sambela si mbi lingbi ti fa tënë ni na legeni, na mbeto pepe.

²¹Mbi ye si ala nga, ala hinga asango na ndö ti mbi nga na ndö ti aye so mbi yeke sara. Tishike, ita ti e so mbi ye lo mingi si lo yeke sara kua ti *Kota Gbia na legeni, fade lo yeke fa na ala atënë so kue.

²²Mbi tokua lo na ala gi titene lo tene tënë ti dutingo ti e na ala si lo mu nga ngangu na be ti ala.

²³Ayeke nzoni Nzapa Babâ, na *Kota Gbia Jésus Christ amu na a-ita siriri, ndoye na mabe!

²⁴Ayeke nzoni Nzapa asara nzoni be na azo so kue aye Kota Gbia ti e Jésus Christ si ala ngba lakue ti ye lo!